Kum 2022 kumtawp lam Covid 19 hripuiin min kiansan tak hnu atangin hmalak chhunzawm leh a ni a, Department Committee - in mawhphurhna a pek Sub-Committee chuan, Film lam a tawnhriat nei tawhte thawhpui tur zawn ni se a tih angin, M_SPACE Production (Pu Malsawma Fanai) thawhpui tur a sawmin,thawhhona thuthlung (MoU) ziak fel a ni ta a ni.

Sub-Committee chuan ruahmanna hrang hrang te siamin, ‘Script’ ziak turin Pu C. Lalengkima, Sr. Production Assistant  ruatin. Film chanphung (Screenplay) ziak turin Pu HP Lalremtluanga leh, a film hi tawng hnih (English leh Mizo) hmang tute tana en theih tura buatsaih tur a nih avangin, tawng danga a script dah turin Upa Dr. Lalchhanhima Fanchun ruat a ni bawk. He Documentary Film buatsaihna atana sulsutu leh hmalatu atan C.Lalhmachhuana, Manager, Audio Visual Production chu ruat niin, ani hi Film Director atana ruat nghal a ni bawk.

February 14, 2023 atangin Film shooting hi neih tan niin, January 12, 2024 ah zawhfel a ni.

He documentary film hi Mizoram chhunga kohhran hmunhma thenkhat te, missionary ten sulhnu an neihna, Mizoram hmun kilkhawr tak tak, India leh Bangladesh ramri te, Silchar-a kan missionary hmasa ten awmhmun an khuarna te, Arunachal Pradesh-a rawng an lo bawl tawhna ah te tih a ni.

Sub-Committee in a lo rel angin Sap Upa leh Pu Buanga chang tur te hi sap ngei hman ni se tih angin, UK atangin chah chhoh an ni a. Sap Upa a chang hi hmar lam Zosap Pu Loyd-a tupa a ni a, Pu Buanga a chang hi mizo makpa niin, shooting pawh tluang taka neih a ni.

He documentary film  a lo hlawhtlin theih nana, tha leh zung, Sum leh pai  ngaituahna sengtu te zawng zawng chung ah BCM chuan thinlung takin lawmthu a sawi tak meuh meuh a ni.

He documentary film hi January 10, 2025 @ Zirtawp zan-ah NCM Hall Serkawnah, Vanapa Hall Aizawl leh, CYLA HallLawngtlaiah ah te  a rualin tlangzarh a ni. Headquarter Area hian BCM Hall Serkawn, ah General secretary Rev.Dr. R. Lalbiaklianan  tlangzarh in, Aizawl Area, Vanapa Hall ah Rev. Dr. C.Vanlaldika President Ellect-in a tlangzarh a, Lawngtlai Area-ah  Rev.F. Ramdinmawia President in a tlangzarh bawk a ni.

January 11,2025 chhun 12:00 chhun lai takah ah kohhran mipui te a duh a piang en theih turin BCM Khawnvar You tube channelah  dah a nia, he mi tlai Dar 3-ah LPS 12 leh Zonet Rinna ah te en theih a ni bawk ang.