MTKP hrauitute – Mission Field-ah:
October 29, 2014 (Nilaini) hian MTKP hruaitu mi 9 vel chu, Rev. Samuel Lalremsanga, MTKP Organiser hovin, Nl. Rebek Malsawmtluangi, Soloist hruaiin, Assam Field-a Rabha Area tlawhin an chhuak dawn. Debitola leh Dhubri bakah, Rabha Thalai inkhawmpui an hmanpui nghal ang.
Missionary 2 Tirchhuak dawn :
November 2, 2014 (Pathianni) zing khian Missionary lak thar Tv. R. Laltanpuia, B.D, BCM Shalom, Lunglawn leh Nl. Lalrinzuali, B.A (Hindi), BCM Ebenezer, Serchhip te chu, Lunglawn East Biak inah Tirhchhuah an ni dawn. Tanpuia hi Arunachal East Field-ah Evangelist hna thawk turin a kal dawn a; Rinzuali hi Mizoram chhunga Non-Mizo rawngbawlnaah Evangelist-in a awm dawn a ni. (Karleh lamah Progamme kimchang nen rawn tarlan kan rum ang)
Work Camp :October 20, 2014 (Thawhtanni) khan Lunglawn kohhran chuan Assam Field Dhubri Area-a Kalajara Saljhar khuaa Missionary Quarters sa tur mi 16 a tir chhuak. Chawlhkar hnih vel thang an tum. A tul chuan rei deuh cham zui pawh an awm mai thei. Tv. RC Vanlalhriata, Evangelist awmna tur a ni. Field hi an Balance Rs 100,000/- hman phalsak an ni a; Lunglawn kohhran hian kal leh hawn leh ei leh in senso bakah, Quarters sak nan Rs 50,000/- an thawh belh a ni.
Salvation Camp:
October 23 – 26, 2014 chhung hian Arunachal East Field-a Padu kohhran chuan Salvation Camp an buatsaih a. Resource Person atan Pu C. Pachhunga, Missionary Evangelist, Pu C. Lalramnghaka, Missionary Music Teacher leh Nl. Sarah Tayeng, Adi Baptist Union Worker te an hmang. Camp hlawhtling tak an neih theih nan, i tawngtaisak ang u.
Esther-i lo hawng dawn :
Lunglawn nula Esther Lalrinpuii, Mebo, Arunachal East Field-a Puanthui zirtira thla hnih zuk awm chu October 27, 2014 (Thawhtanni) hian a lo haw dawn ta. Adi nu 18, nula pakhat leh tlangval pakhat a zirtir a, Pi Rosangzuali, Pu C. Pachhunga nupuiin Tawng let leh a tul ang anga puiin, a lo kaihruai a ni. Soloist anih angin Pathian fak hla sain hun a hmang thin bawk.
Mission hotute zin :
# Rev. Dr. K. Lalrinthanga, AGS i/c Mission chuan Jharkhand Field a tlawh mek. Retreat neihpui bakah, Evangelist te Pu J. Lalrinawma, Pu C. Lalremsanga leh Pu H. Hrangchhuana te awmna tur hmun te a enlawk ang. October 29, 2014 (Nilaini) hian Lunglei lo thlen a tum ang.
# October 24 – 26, 2014 chhung hian Tripura-a Sadar North Baptist Association (SNBA) chuan kum 25 an tlin champhaphak – Silver Jubilee an lawm dawn a. He programme hmanpui tur hian Rev. B. Lalrinawma, Mission Coordinator te nupa chu zaithiam Nl. CR Laldingliani hruaiin an kal. Kum 25 kal ta khan Pu Rina hi, Tripura-a Missionary anih laiin, SNBA Executive Secretary (E.S) hmasa ber a lo ni tawh a ni. Hlim taka Jubilee an lawm theih nan, i lo tawngtaipui ang u.
Zohnuai kohhranin Samuksuri tlawh dawn :
November 5, 2014 (Zirtawpni) hian Zohnuai kohhran atangin mi engemawzat chu Chakma Mission Tuichawng Area-a Samuksuri khuaa in tlawh (Crusade) leh hna thawk tura thlen thlak an tum. An tlawh Chakma Kristiante tan thlarau lam leh taksa lam malsawmna an nih theih nan, i tawngtaipui ang u.
Missionary Furlough :
# Nl. Zohmingthangi Khiangte – Leite Bialah Furlough Programme an hmang mek
# Pu ZD Lallungmuana – Tawipui Bialah Furlough Deputation programme hmangin an awm mek a.
#Upa Lalmuanpuia leh Pu B. Laltlanzauva te pawhin A.B.C inkhawmpui zawhah Furlough programme an chhunzawm ang.
# SE-Asia-a ka thawktu Mafaka te chhungkua chu Shillong-ah an la cham a, Zoram Pawn Mizo Baptist Kohhran (ZPMBK) Bial an fang dawn.
#Nl. Eunice Lalrinpuii, ET, ZBMS, Birpara pawhin Furlough programme a hmang tan tep bawk. An tan leh an kohhran tlawhte tan malsawmna anih theih nan, i tawngtaisak ang u.
