January 11, 2015 (Pathianni) hian Mizoram-a Missionary hmasa ber lo thlen champha phak, “Missionary Day” chu hman a ni dawn a. He Ni hi Mizoram Sorkar chuan Sorkar chawlh (State Holiday) atan a hmang thin a, Kohhran hrang hrang ten awmni khamin inkhawm leh Inpawlhona/zaikhawm-in hun an hmang thin a ni.

Mizoram Baptist Kohhran pawhin he Ni hi urhsun takin a hmang thin a. Kuminah pawh Tualchhung Kohhran tinah Programme siamin an hmang leh dawn a ni. Kumin Missionary Day hi Pathianni a nih avangin Kohhran tam tak chuan ahma ni, January 10 (Inrinni) ah Missionary Day lawmna ruai an theh dawn a, Pathianni-ah Headquarters atanga Progamme duansa angin Kohhran tinah urhsun takin an hmang ang.

Kumin Missionary Day thupui atan chuan “Chanchin Tha malsawmna leh Mizo mipuite” tih hman a ni ang a, Chawhma lamah inkhawm, chawhnu lamah Inpawlhona leh zan lam Inkhawm -ah te Headquarters atanga thupui thlansa leh kaihhruaina hmangin hun changtuten thuchah an sawi ang.

Missionary Day hman dan tur:

1. Thupui: Chanchin Tha malsawmna leh Mizo mipuite

2. Zing leh Zan Inkhawm ni se.

3. Zing inkhawmah hian

(a) Chanchin tha Mizo ten kan dawn hma a kan sakhaw biak dan leh thlarau lama kan dinhmun sawi ni sela,

(b) Chanchin Tha avanga sakhaw thil leh thlarau lam malsawmna kan dawn dante sawi ni se,

(c)Chanchin Tha leh kan missionary-te avanga Pathian hnena lawmnachang hre turin Kohhran hote fuih ni se,

(d) Chanchin Tha la dawng ve lote tana kan mawhphurhnate sawi ni bawk se.

4. Zan lama thusawitu chuan

(a) Chanchin tha kan dawn hma a tisa khawsakna lama kawng hrang hranga Mizote kan la hniam zia sawi sela,

(b) Chanchin Tha avanga tisa lamah pawh Mizo ten malsawmna kan dawn nasat zia sawi bawk se,

(c) Malsawmna tam tak kan dawnte hi a rawngbawl nan leh ropui nana hmang turin Kohhran hote fuih se.

5. Chawhnuah inpawlhona buatsaih ni se. Zo sap missionary ten kan rama rawng an bawl dan sawiho ni se, eg. Zirna, tihdamna leh thuhril hmanga an rawngbawl dan.

6. Kohhran Zaipawl, BKHP, BMP leh KNP Zaipawl ten zing leh zan inkhawmah hla rem se.

................................

Kan hriat theih chinah Missionary Day hmang hotute hun hmanna tur hetiang a ni:

Rev.H. Lianngaia, General Secretary : Kikawn, Lunglei

Rev. Dr.K. Lalrinthanga, AGS : Central Church & City Church, Aizawl

Rev. Lalbiaksanga Chinzah, AGS : Thenhlum

Rev. R. Zohmingliana, Pastoral : Mualthuam North

Rev.V. Vanlalchhunga, CED & Comn. : Zohnuai East

Rev. Dr. V. Laldingliana, ES Aizawl : Ramhlun North, Aizawl

.............................

MISSIONARY DAY THUCHAH

Sap Sipai Officer Thomas Herbert Lewin (Thangliana) chuan 25th December 1871 khan a nupui Dari leh a hote nen Belkhai atanga mel 6 Tuikawi khuaah Krismas hman puiin ngaihnawm takin Lal Isua pian thu hi a lo sawi tawh a, (Lalhluna, RK; Rothangpuia, Thangliana & Darhmelthai, Tlabung Centenery Souvenir). Mizorama Chanchin Tha rawn thlentu hmasa ber a ni thei hial awm e.

Hemi hnu kum 20-ah 1891-ah The Welsh Calvinistic Methodist Foreign Mission hnuaia Khasi and Jaintia Hills hnuaia thawk lai Rev. William Williams chuan Mizoram a rawn tlawh ve a. Mizote chanchin a lo hriat thawi tawh avangin missionary intirh nan a tha dawn awm em? tih enthlithlai tura lo kal a ni. Thla khat chauh Mizorama awm phalna pek a ni. March 14, 1891-ah a lo kalpuite nen Mualvum khaw bul Kutbul lui chhuah an lo thleng a, March 15, 1891 hi Pathianni a ni a, Kutbul lui chhuah bulah hian an cham. Chawhnu thlang herah Mualvum khaw mipa naupang 10 vel hnenah Bible milem an kente an pe a, hlate pawh an sa a ni awm e. (Lianzual P.L.; Zofate Chanchin Tha Rawn Hlantute 2012).

January 11, 1894 khan kan rama Missionary hmasa berte Sap Upa leh Pu Buanga-te chuan Sairang, Mizoram an lo thleng a. Heta tanga chhiar tana a kum za-na, Mizoram Gospel Centenery chu Mizoram kohhran lian pahnih Presbyterian leh Baptist-te chuan in lungrual takin Mizoram pum pui huapin 1984 khan an lawm a. Kan pioneer missionary-te lo thlen champha vawi 120-na chu vawin January 11, 2015 hian Pathianin min lo hruai thleng leh ta a ni. He hun pawimawh takah hian Kohhran member zawng zawngte Mizoram Baptist Kohhran Headquarters Office atangin Chibai kan buk a che u. Sap Upa leh Pu Buanga ten Mizo hnam tana an thawh nasat zia leh Mizo hnam tana an hnathawh hlut zia hi hun reilo te chhunga sawi sen pawh a ni lovang.

Isua Krista Chanchin Tha min hrilh a, Chhandamna kawng min kawhhmuh a, Kohhran min dinsak a. A AW B leh lehkha chhiar tur min siam sak bakah zirna sikul min din saka, lehkha min zirtir bawk a. Kan Thlarau leh taksa tihdamna rawngbawl hna thawkin nun dan mawi leh tha te min zirtir a. Kan hnam hmasawnna lungphum phumtute an ni. Ramhuai biakna leh hlauhna lak ata Lal Isua Krista Chanchin

Tha-in min chhan chhuak a, chatuana nunna min pe a. Silh leh fen mumal tak pawh la inbel nachang hre lo, saruak deuh thaw kha an rawngbawlna avangin khawvel pumpui huapa inchei dan pangngaiin kan lo inchei ve ta a.

A AW B CH nei lo kha India ram hmar chhak state pariat zingah ziak leh chhiar thiam tamna ber kan lo ni ta reng mai. Maurap in chhe te te-a khawsa thin zofate kha tunah chuan in tha tak tak mawi leh nuam tak takah kan lo khawsa ve ta. Ei leh in tur tuihnai engmah nei ngai lo zofate khan kan missionary te Sap Upa leh Pu Buanga rawngbawlna kal zel avangin ei tur tuihnai leh tha tak tak kan lo eiin kan lo in phak ve ta. Mizo mipuite chhim leh hmar chhak leh thlang ami ten tun dinhmun kan lo thleng ta hi an mahni vang liau liau a ni. Lalpan kan pioneer missionary-te Sap Upa leh Pu Buanga-te hmangin thil ropui tak min tih sak avangin I lawm ang u.

Kan ram sorkar, kohhran leh mipui zawng zawngte hian January 11, Missionary Day hi hlut na chang hria ila, kohhran tin ten Pathian hnena lawmthu sawina inkhawmna hun atan I hmang theuh ang u. He hun ropui leh awmze nei takah hian lam thei lam ila, a lawm nan ruaite hial pawh theh thei chuan theh ila, kan missionary te rawngbawlna avanga Lalpa fak leh chawimawi nan i hmang theuh ang u. Kan ram sorkar-in chhuti ni atan a lo puang hi a lawmawm tak zeta, zofate khawvela kan awm ve chhung chu tihdanglam tawh loh nihial se a va tha dawn em!

He ni ropui takah hian keini anga Chanchin Tha Malsawmna la dawng ve lo tam tak ten malsawmna an lo dawn ve theihna turin I in hlan thar zel ang u. Hlim taka Missionary Day hmang theuh turin Lalpan awmpui che u rawh se.