Serkawn: January 9, 2014: Tunkar Inrinni, January 11, 2014 hian Mizoram-a Missionary hmasa ber lo thlen champha phak, “Missionary Day” chu hman a ni dawn a. He Ni hi Mizoram Sorkar chuan Sorkar chawlh (State Holiday) atan a hmang thin a, Kohhran hrang hrang ten awmni khamin inkhawm leh Inpawlhona/zaikhawm-in hun an hmang thin a ni. Mizoram Baptist Kohhran pawhin he Ni hi urhsun takin a hmang thin a. Kuminah pawh Tualchhung Kohhran tinah Programme siamin Kohhran tam tak chuan awmni khamin ruai nen an hmang leh dawn a ni. Kumin Missionary Day thupui atan chuan “Dak ulang, Lote en rawh u” (Johana 4:35) tih hman a ni ang a, Chawhma lamah inkhawm, chawhnu lamah Inpawlhona leh zan lam Inkhawm -ah te he thupui hmang hian hun changtuten thuchah an sawi dawn a ni. Missionary Day kan hman thin hi Mizorama Chanchin Tha rawn thlentu, Sap Upa (Rev.F.W.Savidge) leh Pu Buanga (Rev.J.H.Lorrain) te’n Arthington Aborigine Mission tirha Mizoram (Sairang) an lo luh ni champha a ni.  January 11, 1894 khan Sap Upa (Rev.F.W.Savidge) leh Pu Buanga (Rev.J.H.Lorrain) te chuan Mizoram leilung rawn rapin Sairang-ah an lo lut a. Hemi atanga kum -100-na, 1994-ah Mizoram pum-ah Gospel Centenary lawm a ni a,  Mizoram Kohhrante ngen angin Mizoram Sawrkar chuan he mi ni hi sawrkar chawlh (State holiday) ah a puang ta a ni.  Vawiin thlengin hei hi hman a la ni ta zel a, Kohhran hote pawhin kan ngaipawimawh chho tawlh tawlh a,  Kohhran tam tak chuan urhsun takin, awmni khamin an hmang chho ta zel a ni.

Thuchah:

Zorama Chanchin Tha lo thlen dan:

Sailam lal Bengkhuaia leh a pasalthate chuan Cachar ram an runa, chuta thingpui huan siamtu  James Winchester chu thatin a fanu Mary Winchester chu sal atan an hruai haw ta a. He thu hi British Sawrkarin a hriat ve leh Mary Winchester chhanchhuak turin Mizoramah kum 1871 khan a sipai rual a rawn tir a, Mary Winchester chu an hruai kir leh ta a ni. Hei hi Vailian I-na an tih chu a ni. Mizote hian mi thaha an lu lak chu huaisenna leh pialral kalnaah an ngaih avangin hnamdang an run fo va, chuvang chuan British sawrkar chuan tukdawl vek thain a hria a, 1888 khan sipai tam tak a rawn tir chhuak a, hei hi Vailian II-na tih a ni. Mahse Mizo lalte chuti maiin an tlawm duh bik lova, theihtawp chhuahin an lo do let ve a. British sawrkar chuan tudawl thei ngei tur sipai tam zawk kum 1889 khan a rawn tirh belh leh ta a, Mizo lalho chu tukdawlin an awm ta a, British sawrkar chuan Mizoram chu a awp hlen ta a ni. Sap ram nitin chanchinbuah James Winchestera thah anih dan leh Mary Winchester man anihdante, chhanchhuah leh anih dante leh mizoho chu lu la hnam, mi that a, an lu lak chu huaisenna leh pialral kainaa ngai an nihdante an ziak chuai chuai mai a ni. Sap mi hausa Robert Arthington a rilru pawh chu chanchin chuan a khawih hle. Ama hming chawia Mission pawl din Arthington Aborigin Mission chuan Rev. JH. Lorrain (Pu Buanga) leh Rev. F.W. Savidge (Sapupa) te chu Mizo, lu la hnam zinga Chanchin Tha hrilh turin an rawn tir ta a. An ni hian 11th January 1894 khan Sairang lo thlengin hemi ni vek hian an mahni puanthuah tel (bedding) zawnin Aizawl an lo thleng chhova, he mi ni hi “Missionary Day” tiin Mizo Kristian zawng zawngin pawmin ni 11 January 1994 khan Chanchin Tha thlen champhaphak vawi 100-na (Centenary) chu kohhran hrang hrangin hlim leh lawm taka lawmho a ni a, Mizoram sawrkar pawhin sawrkar chawlh (holiday) ah a puang ta hial a ni. Wesh rama Calvinistic Methodist Foreign Mission chuan Mizote zinga mission hnathawk tura a rawn tirh  Rev. D.E. Jones chuan 31^st August 1897 khan Aizawl a lo thleng ve leh a. Pu Buanga leh Sapupa chuan Mission pawl hrang thawhkawp chu dikin an hre lova, tin, Robert Arthington hian hmun khatah kum thum aia rei cham lova, hmun danga Chanchin Tha la hrelote hnena kal a hril zel turin a ti bawk nen, duh taka hna an lo thawh lai mek chu Rev. D.E. Jones a kutah hlanin Abor ram (Arunachal Pradesh) ah an kalsan ta a ni. British sawrkar chuan Mizote Bengali tawnga lehkha min zirtir turin an lo buatsaih a, zirtirtute pawh an lo ruatfel tawh, amaherawh chu Pu Buanga leh Sapupa chuan Mizo A, AW, B. min lo siamsakin mi thenkhatte an lo zirtir hman der tawh a, chu chu British sawrkarin a hriatin an thil tum chu thulh lehin tuna kan hawrawp kan neih hi min pawmsak ta zawk a ni. Chuvangin Sap upa leh Pu Buanga hi tisa leh thlarauva Mizote chhanchhuaktu, hnam lungphum min phumsaktu an nih avangin engtikahmah Mizote hian kan theihnghilh tawh ngai lovang. Tunlai hian mi thenkhatten Sap upa leh Pu Buanga aia chawi lansarh tum neiin “Mizorama Chanchin Tha thlentu hmasa ber chu William Williams a ni” te an ti. William Williams Mizorama a lo kal hma kum 10 kal ta-ah khan Sap Sipai Officer Thomas Herbert Lewin (Thangliana) leh a hote leh a nupui Dari chuan 25^th December 1871 khan Belkhai atanga mel 6 Tuikawi khuaah Krismas hmanpuiin  TH. Lewin hian ngaihnawm takin Lal Isua pian thu hi a sawi tawh a ni.(Lallhluna, RK; Rothangpuia, Thangliana & Darhmelthai.  Tlabung Centenary Souvenir). William Williams kha missionaryte an thawh theihna tura ram enthli tura (survey) lo kal a ni. Tlawng lui “Kutkawk kaiah thu a sawi” tih hi a dik ang. Mahse he mi hma kum 10-ah hian TH. Lewin (Thangliana) hian Krismas thuchah Tuikawi khua-ah ngaihnawm takin a lo sawi tawh a ni. Tuipui ral atanga Chanchin Tha eng min rawn pe tura Lalpan zosapte a rawn tirh avangin he Missionary Day hi lawmna ni a ni a, Pathian hnenah tihtak zetin lawmthu i sawi ang u.   ....................................

Related Sermon:

LÂWMTHU KAN HRILH CHE - A ZÂRAH

- Rev. Lalbiaksânga Chinzah Vawiin 11^th Jan. 2014, Mizoram-a Missionary hmasa berte lo thlen ni champhaah hian chhiartu zawng zawngte chibai ka bûk a che u. He ni champha phâk lo thleng tur ka ur lâwk laiin hetiang hian ka rilru-ah a lo awm a, keimah chauh ni lovin ngun taka ngaihtuahtute chuan min tâwmpui vekin ka ring. Vawiinah hian Pathianin Sâp Upa (Rev. F.W.Savidge) leh Pu Buanga (Rev. J.H.Lorrain) min pek te leh an hnua Mizorama Missionary min pêk te zawng zawng ngaihtuah ila, Lalpan he kan Mizoram leh a chhûnga chêngte min hmangaihzia kan hre thei ngei ang. Awle, vawiinah chuan heti hian i ngaihtuah teh ang.  

1. Lâwmthu sawina ni (Days of Thanksgiving) ah i hmang ang: 

Thupuia kan hman ang hian, he hla thu lo siamtu’n “Aw Pathian nangman Chanchin Tha min pe, lâwmthu kan hrilh che – a zârah, a lo ti ang hian Mizorama chêng leh Mizorama Kohhran pawl hrang hrangte’n lawmthu sawina ni-ah i hmang ang u. Sâp ram tlangvâl pahnih, an ui chaw ang pawh ei zo lo Mizoram-a mite Chanchin Tha hrilh tura an lo kal hi, a va lawmawm em! Pathian hmangaihna luangliam tak zet a ni. Sâp naupang khawngaihthlâk tak (Zolûti) pawh kha kan khawngaih hle, mahse Sâp Upa leh Pu Buanga te thinlung su hawngtu a ni tlat mai a, anni tân vanduaina … keini tân malsâwmna bul a ni si. Pathian leh Chanchin Thaa, Mizoram min rawn zawng chhuaktute avangin lâwmthu i sawi mawlh mawlh ang u.

2. Chhandamna chi hnih kan dawng:

Mizoram-a Pioneer Missionary Sâp Upa leh Pu Buanga te rawngbâwlna kha Mizoram tan “Chhandamna kim” a ni han tih hi ka duh a, mahse hnialtu ka neih ka hlau deuh si a. Thlarau chhandamna Chanchin Tha min rawn pe a, chu chauh ni lovin mawlna leh âtna lak ata chhandamna kan chan theihna atan zirna bul min lo tansak ta, A, AW, B la nei lote tan zirna lungphum (A, AW, B) min siamsak a. Chu chauh ni lovin zirna School bul min tansak a ni. Sawrkarin Mizote zirna atan Bengali Alphabet hmantir min tum lai takin anni’n hna ropui tak min lo thawhsak a, chuti ni suh sela, A, AW, B kan nei hauh lo ang. Chanchin Tha leh zirnain Mizoram chu tih ên kan lo ni ta. “Êntu a lang ta, Isua,” tih hla thu te hian a puang chhuak e.

3. Mission rilru put thar ni atan:

Vawiin hi Mizorama Kohhran pâwl zawng zawngte leh zofa khawvêl hmun tina awmte’n Chanchin Tha puan darhna (Mission) rilru kan put thar lehna ni atan i hmang ang u. Lal Isuan, zirtirte hnênah, “A thlâwnin in hmu a, a thlâwnin pe ang che u,” a tih kha (Mt.10:8) i ngaihtuah ang. Kan Pioneer Missionaryte Silchar atanga Tlawng lui rawn zawha an lo kalna atan khân zofate’n pawisa kan sêng hauh lo, khawvêl chhandamna atana man to tak petu, Lalpa Pathian hmangaihna avang a ni. He ni a lo thlen hian Lal Isua chanchin tha la hre ve lo, thim hnuaia la awmte ngaihtuahin he hla siamtu thinlung hi putpui i tum teh ang.

“Thlifîm, Thlipui zawng zawngte’n

He Chanchin lên ula;

Tui luangte u, Chhandam aw,

Hruai r’u, darh vêl zel se”

4. Zosap Missionary tu leh fate i tawngtaisak ve thung ang:

Kan pioneer missionary te leh an hnua Mizoram chhim leh hmâra misisonary lo chhuak zawng zawngte i hre reng ang u. An hming kan sawi sêng lo, anmahni leh an rawngbâwlna hlu tak avangin lâwmthu sawi kan bâ a, chu chauh ni lovin an thlahte – an tu leh fate he khawvêla la awmte tân Mizorama Kohhranhote, ringtute’n i tawngtaisak ang u. Anmahni leh an tu leh fa hriate phei chuan an hming i lam ngei ang u.

5. Mizoram atanga Missionary zawng zawngte tawngtaisakna Ni-ah i hmang ang:

“Lalpa chu fakin awm rawh se,” Mizorama Kohhranhote hi Ram thim vei kan ni vek mai, a va lâwmawm êm! Vawiinah hian Mizoram atanga ram chhûng leh ram pâwn, khawvêl hmun hrang hranga Missionary-a kal chhuakte i tawngtaisak ang u. Kan ram a rethei a, khawvêl tân pêk tur kan thar chhuak lo. Chutih laiin he kan ram zimte atanga khawvêla Chanchin Tha hriltu kan thawn chhuahte hian tha taka rawng an bâwl theih nân, vawiinah hian an tân i tawngtaisak ang u.

“Aw Pathian, Nangman Chanchin Tha min pe,

Lawmthu kan hrilh che – A zârah,

Halleluia! Amen”

 

 ...................