Tv. L. Malsawmtluanga (22) Arunachal East Field, Galo Baptist English School, Tirbin-a Emanuel Kohhran, Luangmual Aizawl chawm (Sponsored) - a Missionary thawk lai chu, July 28, 2024 - tlai lama an Quarters bul hnai luiah inbualin, vanduai thlak taka che sualin, tui zangkhauhin la-in, a chetsualna atanga metre 500 velah hmuh a ni a, theihtawpa a nunna chhan tuma beih a nih hnu-ah a nunna chhan theih a ni ta lo a ni.
Hemi zan hian Tirbin atan hian Aizawl panpui nghal a ni a, July 30, 2024 (Thawhlehni) chawhma dar 11:40 khan an chenna in, Luangmual, Aizawl thlenpui a ni. Tv. Mampuia ruang hi a thawhna Arunachal East Field atangin Rev. Lalsangzuala Sailo. Field Director, Evan C. Pachhunga leh a nupui Pi Rosangzuali Jongte ten an rawn zui a, an chenna in tlawhpui a nih hnu-ah chhun dar 12:00-khan BCM Biak In, Emanuel, Luangmual-ah thlahna leh vuina Inkhawm neihpui a ni.
Tv. L. Malsawmtluanga vuina inkhawm hi Rev. R. Lalrintluanga, Executive Secretary, Aizawl-in a kaihruai a, Tualchhung Kohhran Secertary –in a chanchin tlangpui sawiin, Upa H.Thanzuala leh Upa H. Laltlankima ten Pathianthu an chhiar a, Rev. C. Lalhungliana’n a kalsan a chhungte leh Kohhrante tana tawngtaisakna a nei. Luangmual Pastor Bial Zaipawl leh BCM Emanuel, Lungmual Kohhran Zaipawl ten fakna hla remin, AGS Mission – Rev. Dr. R. Lalthanmawia’n thuchah a sawi a, Rev. T. Lalawia, Bialtu pastor-in Malsawm tawngtaiin Vui Inkhawm a khar ta a ni.
Vui Inkhawm zawhah Kohhran hruaitute leh Kohhran hnuaia Pawl hrang hrang ten thla lakpuiin, Thlanmual lam panpui a ni a, Thlanmual-ah hian P.Pastor F. Lalhmangaihzauva’n tawngtaiin a thlah liam ta a ni.
Tv. L Malsawmtluanga (Mampuia) hi Rbt L. Johana leh Pi Lalpianmawii te fa pathum zinga a tlum ber niin, June 2, 2002 khan a piang a. January 22, 2017-ah Baptisma changing zirna lamah B.A (Po.Sc) a zo a. Kum 2023 khan Salvation Camp-ah lutin Pathianah lawman thar changin a theih tawk leh phak tawkah Pathian rawngbawlnaah te thahnemngai takin a tel a, TKP Evangelical Cell ah te, Kohhran Sound enkawl leh Wortship Team-ah te a tel thin a ni.
Awm hmuna rawngbawl ringawt chu duhtawk lovin, Missionary a chhuah a duh thu hi Kohhran Committeeah a thlen a. Tualchhung Kohhran chuan Headquarter lam te dawrin Galo Mission School, Tirbin Arunachal East Field a thawk turin June 2, 2024 (Pathianni) khan BCM Biak In, Emmanuel-ah Rev Lalremsiama Ralte, Mission Director-in BCM Emanuel-in an chawm (sponsored) Missionary atan a tir chhuak a, June 4, 2024 khan a thawhna tur panin a kal a. Mission Field-ah hian a hna a zawm fel hnu-ah thla hnih awrh chauh a thawh hnu-in he vanduaina hi tawkin min lo kalsan ta a ni.
Tv. L. Malsawmtluanga thihna hi Mizoram Baptist Kohhran chuan pawi a tiin, a sun takzet a, thahnem ngai taka Pathian rawng a lo bawl tawhna te hre rengin, a rawngbawlna avanga lawmthu sawi chungin ui leh zah takin a thlah liam ta a ni.
