Mizoram Baptist Kohhran hnuaia Nurse hna thawk hmasak berte zing ami leh Pension thlenga lo thawk tawh, Pi K. Lianchhingi, Lawngtlai chuan February 14, 2024 (Chhun dar 12:30) khan kum 94 mi niin chatuan ram min pan san ta. Hemi ni vek hian an chenna Salem, Lawngtlai-III lamah ah phurh phei a ni a, zanah tlaivarpuiin, a tuk, February 15, 2024 (Ningani) chhun dar 11:00 khan Rev. Lalbuakhlua Chawngthu-in vuiin, Salem thlanmualah ropui taka thlah liam a ni.
Pi K. Lianchhingi hi kum 1930-ah Darzo-ah a piang a, Pawl 3-pawl 5 leh Upper class IV thleng Serkawn-ah zir chhuakin, Lunglengah Hmeichhe Sikul, Pi Zirtiri Sikul an tihah Pawl 6 a zir zo leh a. Pawl 6 a pass hnu-ah Serkawn-ah Zosap Missionary Pi Zirtiri (Miss EM Chapman) hnuaiah Nurse zirin kum 4 a awm a. Serkawn-a an zir chhuah hian Durtlang Hospitalah Nurse Trainingin kum 2 a awm leh a ni. Nurse a zir zawh fel hnu hian Kristian Hospital, Serkawn-ah kum 1959 January ni 1 atangin Nurse hna thawkin, Serkawn Hospital-a Mizo Nurse puitling thawk hmasa ber a ni. Kum 1959-ah Upa K. Vanmawia nen an in nei a, fapa 3 leh fanu 5 an nei a, tu chhuan 42 an nei bawk.
Serkawn-ah hian thla hnih chauh a thawh hnu-in Kohhran tirh thovin S.Vanlaiphai Dispensary-ah Nurse hna thawk turin dah a ni a. Hetah hian kum rei tak a thawk a, Chhim lam leh Khawchhak lam tlangdung-ah Nurse leh Doctor an awm mumal loh avangin thingtlang khaw hrang hrangah nau chhar leh dam lo leh hliam tuar te enkawlin a kal kual thin a ni. Kum 1972-ah S. Vanlaiphai atangin Lawngtlai-ah Diapensary-a thawk turin sawn a ni a, hetah pawh hian rim leh hah takin a pension thlengin a thawk a ni. Kum 1984-ah Sister-ah kaisangin, 1989, January 1 ah a lo pension ve ta a ni.
Pi K. Lianchhingi hian kum 2008 khan India rama Nurse hna thawk thate chawimawina sang – National Florence Nightingale Award for Nursing Personel a dawng a, a service chhung 1959-1989 chhung hian nau 1300 chuang a chhar hman a, pension-a a chhuah hnu-ah pawh nau chhar leh dam lo enkawl-in hun rei tak ama tlawmngaihna-in a la thawk zui zel a ni.
Mizoram Baptist Kohhran chuan Mizo te zinga mi chhuanawm leh entawn tlak – Pi K. Lianchhingi a nei hi a chhuangin a rawngbawlna te a ngai hlu tak zet a, a chanchin leh a sulhnu te hi a hre reng tawh dawn a ni. A kalsan a chhung leh khat, tu leh fa te zawng zawng Lalpa’n thlamuanin awmpui zel rawh se.
A damlai a amah kawmna ngaihnawm tak hi lo thlir ve rawh le : Pi K. Lianchhingi kawmna
