Mizoram Kohhran hrang hang te inpumkhatna atana Kohhran hrang hrang aiawh ten ruahmanna an siam angin Council of Churches in Mizoram chu October 27, 2024 (Pathianni) chawhma dar 10:30 khan Mizoram Presbyterian Kohhran Biak In, Missionveng-ah hawn a ni ta. Council of Churches in Mizoram Hawnna Inkhawm hi Rev. Dr. R. Lalbiakiana, General Secretary, BCM-in kaihruaiin, Pathian Chibai buk tur leh Pathian fak tura Kohhran mipui te sawmna neiin Pathian hnenah Inkhawm a hlan a, hemi zawh hian Rev. R. Vanlalnghaka, Moderator, MPC leh Chairman, Joint Committee-in Council of Churchches in Mizoram hawnna leh Pathian hnena hlanna a nei a, Pu Lalruatkima, Joint Committee Recoding Secretary,  CCM-in CCM hruaitu atana ruat te hmelhriattirna a neih hnu-ah Rev. Dr. H Remthanga'n hruaitute lakluhna (Installation) a nei a. Mizoram Chief Miniter - Upa Lalduhoma leh Rev. Ramengliana, North East India Christian Council (NEICC) Secretary ten chibaibukna sawiin, Rev. Dr. Lalhmangaiha, General Secretary, CCM-in thu a sawi bawk. BCM Choir leh LIKBK Assembly Choir ten fakna hla remin Rev. Lalhuapliana (IKK) in malsawm tawngtaiin inkhawm a khar ta a ni.

 

CCM Rorelna hmasa ber chu October 26, 2024 (Inrinni) chawhnu dar 12:30 khan Mission Veng Presbyterian Kohhran Biak In, Aizawl-ah neih a ni a. Rorel inkhawm-ah hian Kohhran Pawl hrang hrang aiawh Rorel Palai 500 chuang kalkhawmin, CCM hruaitu atana Joint Committee-in a lo thlan te pawmin Budget ruahmanna te thlirin an pawm a, heng bakah hian CCM hmalakna tur leh inkaihhruaina hrang hrang Joint Committee-in ruahmanna a siam te thlirin an pawm bawk.

 

Inrinni zan atanga Pathianni zan thleng Council of Churches in Mizoram Inkhawmpui hi neih a ni a, Kohhran hrang hrang atangin Palai 1800 chuangin he inkhawmpui hi an hmang a, a dawltu Mission Veng Presbyterian Kohhran ten hneh takin an lo dawngsawng a, Inkhawmpui hlawhtlinna atana an inbuatsaihna leh an inpekna te avangin CCM hruaitute mai ni lovin, Kohhran hrang hrang atanga palai kal te leh Inkhawmpui chhimtute an lawm hle a ni.

October 28, 2024 (zing dar 7:30)-ah CCM Office chu Rev. Dr. R. Lalbiakliana, Chairman, Council Of Churches in Mizoram-in a hawng a. CCM Office hi General Secretary – Rev. Dr. Lalhmangaiha leh thawktu ten an luah nghal a ni. CCM Office lawilawk hi Synod Conference Centre, Mission veng, Aizawl-ah a awm a ni.

 

Kan tarlan tawh thin ang khan tunah hian Council of Churches in Mizoram-ah hian Kohhran pawl 8 – Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran, Bualpui (Ng), Wesley Methodist Church, Mizoram leh Independent Church of India te an awm mek a ni.

 

CCM din chhan leh kalpui dan tur Press Statement an siamah chuan “Council of Churches in Mizoram hmanga Kohhran inpumhatna hi conciliar Unity anga kalpui tur a ni a, Kohhran hrang hrang te kan chin dan inang leh lungrualna (common ground) atanga thawhhona neih tum a ni. Thurin (doctrine) leh chin dan (tradition) lama kan inan lohna chu dahthain,kan rama mimal nun, khawtlang leh sawrkar thlenga kan inrelbawlna tihhmasawnna kawngah Kohhran ten hma kan lak theihna turin inpumkhatna hi kalpui tum a ni.” tiin tarlan a ni.

 

CCM Puipate:

President	:	Rev. Dr. R. Lalbiakliana (BCM)
Vice Presidents	:	1) Rev. B. Zazawna Lai (LIKBK) 2) Rev. Lalrodinpuia LS Nghaling (IKK Bualpui Ng)
General Secretary (Full time)	:	Rev. Dr. Lalhmangaiha (MPC)
Joint Secretary	:	Rev. T Salaw (ECM)
Treasurer	:	Upa R. Lalmalsawma (MPC)
Fin.Secretary	:	Rev. Jesai L. Neitham (EFCI)

 

 

CCM PRESS NOTE

CCM Chanchin leh hawnna Programme te hrechiang duh tan an website Kohhran Inpumkhatna -ah hian tlawh theih a ni e:

...............................

CCM din anih chhoh dan tlangpui

Ziaktu - Pu C. Lalruatkima, Recording Secretary,  Joint Committee

Mizoram Synod Inkhâwmpui 2015-in Kohhran inpumkhatna zawn ni rawh se, tia a alo rêl tawh leh Mizoram Baptist Kohhran Assembly 2021-in Council of Churches in Mizoram din ni se, tia alo rêl tawh angin Kohhran Inpumkhatna leh thawhhona tûrin hma lâk chhoh a lo ni ta a, Mizoram Baptist Kohhran leh Mizoram Presbyterian Kohhran hruaitute chuan Mizoram chhûnga kohhran hrang hrang hmunpui ṭheuhte tlawhin kohhran hruaitute ṭheuh kawmna hun an hmang hmasa a.

August 26, 2022 khân Mizoram Baptist Kohhran Headquarters Office-ah Mizoram Presbyterian Kohhran aiawha hruaitu mi palite leh Mizoram Baptist Kohhran hruaitute chuan inkawmkhâwmna an nei a, Council of Churches in Mizoram din anih theihna tûrin hmalak chhoh dun an rel. A vawi khat nân January 24, 2023 khân Kohhran paruk (Mizoram Presbyterian Kohhran, Mizoram Baptist Kohhran, Evangelical Church of Maraland, Salvation Army, Lairam Isua Krista Baptist Kohhran leh The Salvation Army) aiawh aṭangin kohhran hruaitu mi 29 an kalkhâwm a, Mizorama Kohhran hrang hrangte inpumkhat nâna ‘Council of Churches in Mizoram’ din tûra hmalâk chu an lo rel chho ṭan ta a, he hmalâkna kawnga mawhphur tûrin ‘Mizoram Kohhrante Inpumkhatna Joint Committee’ chu din a ni. Chairman atân Moderator Mizoram Presbyterian Kohhran, Secretary atân General Secretary Mizoram Baptist Kohhran leh Recording Secretary atân Pu Lalruatkima Administrative Officer, Mizoram Baptist Kohhran te chu ruat an ni.

 

Mizoram Kohhrante Inpumkhatna Joint Committee chu ṭum nga (5) ngawt ṭhukhawmin, kohhran hrang hrang rorêlna leh hruaitu ṭheuh ten kohhran inpumkhatna atâna theihtâwp an chhuah tlângna avangin vawiin hi kan lo thleng thei ta a ni.

 

CCM dinchhan leh kalphung tur tlangpui:

Council of Churches in Mizoram hi Isua Krista duh dân anga Mizorama Kohhrante inpumkhata awm a, Chanchin Ṭha hril kawnga inrem tlâng taka thawhho leh Ram leh khawtlâng siam ṭhatna kawnga thawhho hi a tum bulpui ber a ni.

CCM kaltlang hian kohhran hrang hrangte kan chîn dân inang leh lungrualna (common ground) aṭanga thawhhona neih tum a ni a, thurin (doctrine) leh chîn dân (tradition) lama kan in an lohna te chu dah ṭhain, kan rama mimal nun, khawtlâng leh sawrkâr thlenga kan inrelbâwlna tih hmasâwnna kawngah kohhran ten hma kan lâk theihna tûrin inpumkhatna hi kalpui tum a ni.

CCM Inkhawmpui hi kum khat dana neih thin tur a ni a, kohhran hrang hrang ten a inchhawkin kan thleng thin dawn a ni. CCM hnuaiah hian Hmeichhe Pawl leh Thalai Pawl te pawh la din chhoh tura duan a ni.

 

CCM Hruaitute:

CCM hian Puipa 7 neiin a hmasa ber atan heng mite hi kum 2 atana thlan an ni.

President	:	Rev. Dr. R. Lalbiakliana (BCM)
Vice Presidents	:	1) Rev. B. Zazawna Lai (LIKBK) 2) Rev. Lalrodinpuia LS Nghaling (IKK Bualpui Ng)
General Secretary (Full time)	:	Rev. Dr. Lalhmangaiha (MPC)
Joint Secretary	:	Rev. T Salaw (ECM)
Treasurer	:	Upa R. Lalmalsawma (MPC)
Fin.Secretary	:	Rev. Jesai L. Neitham (EFCI)

 

CCM Office leh thawktute:

Council of Churches in Mizoram hi office nghet leh hun puma thawktu nghet neia kal chho tur a ni a, Synod Conference Centre, Mission Veng-ah office tur luah hawh rihin General Secretary, Office Assistant, Driver leh Attendant-te nen bul tan phawt a ni. Heng thawktu zinga Office Assistant Nl. RC Vanlalhruaii hi Mizoram Baptist Kohhranin thla 6 chhung atana a hlawh pek tura a dah (depute) a ni a, BCM Aizawl West Kohhrana lawi a ni.