December ni 1, 2018 khan MTKP Inkhâwmpui 2019, Tlabung Pandal Sâp Upa & Pu Buanga Run chu sak tan a ni. He Inkhâwmpui pandal hi ruahman ang chuan November ni 1, 2018-ah sak tan tum a ni a, amaherawhchu kum 2017 leh 2018-a a kum zâwna tuilianin Pandal sak tumna hmun Licheng chu chîm pila chirh leh Balu chhah taka a chhêk avângin Pandal hi sak theih a ni lo a, November ni 15-ah sak tan tumin ruahmanna siam leh a ni a, hei pawh hi tum anga field thenfai theih a nih tâk loh avângin sak tan theih a ni lo a ni.
Hêng an harsatnate hi Organising Committee-te chuan Mizoram Chief Minister hnênah ziaka thlenin ani chuan Kawrpuichhuah kawng siama Tlabung khawdaia inbun mêk ABCI Company te chu hma lâksak tûrin a hriattîr a. YMA Tlabung Branch chuan bawhzuiin Company lam hi an bia a, an hmalâknain ABCI Company chuan Caterpillar, Excavator, Super Loder, Road Roller leh Tripper engemaw zât thawh chhuahpuiin he field chei that hna hi an thawk a. Anni bâkah UD&PA lamin field chei thatna tur an pêk sum hmang te leh mi mal thahnemngaite’n JCB/Excavator thawh chhuahpuiin Licheng field hi Pandal sak theih tura peih fel a ni ta a ni.
[caption id="attachment_13187" align="aligncenter" width="720"]
Pandal sakna tur Licheng Field thian fai[/caption]
Licheng field siam that hi a hautak hle a, tui lianin chirh leh balu a hnutchhiahte hi a lei a nêm avângin paih fai mai tûrin khâwl a hman theih lawk loh a, Caterpillar leh JCB/Excavator an luh theih hnuah pawh hian a vaia paih fai a hautak avângin 3ft/4ft vêl balu leh tlak lei paih a nih hnuah tripper trip 600 chuang lei tak chhûng lehin Road Roller hmanga chîl mâma rah bel leh vek a ni. MTKP Inkhâwmpui 2019, Tlabung pandal hi a dung 260fts, a vâng 170fts-a sak tur a ni a, pandal design hi Upa T. Lalhlimpuia, Venglai, Lungleia miin a thlâwna a siam sak a ni a, Pandal hi thing leh mau hmanga sak tur a ni a, Pandal sa tur hian a sa thiam Vai Mistiry leh helper mi 14 rawih an ni a, anni bâkah hian khawtlâng mipuiin hnatlângin an sa dâwn a ni.
PROMOTIONAL CONCERT HLAWHTLING MTKP Inkhawmpui 2019, Tlabung inbuatsaihna kal zelah November 23, 2018 zan dar 7:00 khan Thangliana Mual, Zawlpui Veng, Tlabungah MTKP Inkhawmpui 2019, Tlabung Promotional Concert neih a ni a. He concert-ah hian Tlabung atangin zaithiam Lalchhanhimi Palian, Mary C. Lalfakawmi, C. Lalnundinga feat. TKP Tlabung Pastor Bial O.B. Band, TKP Zodin Unit Band, TKP Imanuel Unit Band leh TKP Tlabung Unit Band te an zai bakah C.R. Laldingliani, Lalhlumawii (Bte-i), Vanrammawii Pautu, Michael VL Rema Renthlei te leh Gospel River Band te sawmin programme hlung taka hman a ni. [caption id="attachment_13304" align="aligncenter" width="720"]
MTKP 2019 Promotional Concert[/caption]
