January ni 30, 2024 (Thawhlehni) khan Mizoram Ṭhalai Kristian Pawl Executive Committee Meeting Vawi 545-na chu Sap Upa leh Pu Buanga Hall, BCM Hqtrs.Serkawn-ah neih a ni a, Meeting hi Upa R. Lalrochama, President MṬKP chuan kaihruaiin, MṬKP Secretary Rev. F.Zorinkhuma'n MṬKP rorel bawhzuina leh hmalakna hrang hrang report a pe a. Report kim chang hi rorel member te hnenah ziaka sem a ni. MṬKP Treasurer Nl. J.Lalrintluangi chuan sum hman dan ziakin report a pe a, Tv. Lalruatkima, Fin.Secretary MṬKP pawhin sum hmuh dan ziakin report a pe bawk.
Report-in a tarlan zingah Pastor Bial 92 zingah Bial 91-in MṬKP Target an pe tlak tawh thu leh ṬKP Ramthim ni thawhlawm Bial 90 in an thehluh fel tawh thu te, ṬKP Day thawhlawm thehlut tawh bial 91 atangin an dawn tawh thu te a tarlang a. Heng bakah hian MṬKP Inkhawmpui dawltu ṭanpuina, Youth Centre Pual Fehchhuahna leh Raltlan ṭanpuina puala vawikhat Inkhawm thawhlawm theh lut tawh Bial tam zawk an awm thu report ah hian tarlan a ni a, Sub-Committee hrang hrang Secretary te hnen aṭangin report ngaihthlak a ni bawk.
Meeting ah hian thu pawimawh tam tak rel a ni a. MṬKP Rorel 2024 Palai lawm inkhawm programme leh Agenda te thlirin, MBMP leh MBKHP rorel inkhawma MṬKP aiawha Palai tur te an ruat a, Asia Pacific Baptist Youth (APBY) Conference 2024, Malaysia-a neih tur chungchang te, Bial leh Unit hrang hrang aṭanga sawmna te ngaihtuah a ni bawk.
