February 13-16, 2025 chhunga Lunglawn mual, Lunglei-a neih tur Mizoram Thalai Kristian Pawl (MTKP) inkhawmpui vawi 48-na atana pandal sak hnatlang an kalpui mek zel. Inkhawmpui pandal structure hi BCM Hqrs-ta, Alluminium alloy structure Rs nuai 150 man hman a ni. Structure awm sa hi an duh aia a tet deuh avangin tihzauh belh tura ruahman a niin, Inkhawmpui pandalah hian mi Sangriat Atanga mi sangkua (8000-9000) vel leng tura beisei a ni. Inkhawmpui pandal zau zawng hi a dung ft 230 leh avang ft 184 tura duan a ni. Tunah hian Pandal hi pum thawkhat tawhin, Pandal extension hi Ceilling siam tur a ruahman a ni bawk. Committee peng hrang hrangte pawn chak takin hma an la chho mek zel bawk.
Pandal sak hna hi Lunglawn bial TKP hian a inchhawka an neih bakah, Lunglei khawpui chhunga Pastor bial hrang hrang a unit hrang hrangte bak-ah Kohhran pawl hrang hrang ten chhun leh zan-ah a in chhawkin hnatlang an nei thin a ni. January 21, 2025 (thawhlehni) khan MBMP member 288 lai he pandal sak hnatlangah hian an thawk bawk.
Haulawng Bial TKP te chuan pandal sak nana mamawh dap chiksa, truck trip khat an thawh. Hetih rual hian Lunglei South bialtu MLA Lalramliana pawhin pandal panna kawng cheibawl nan thil tul hrang hrang a lo ngaihtuahpui tawh thu MTKP hotute hian an sawi bawk.
Lunglawn Pastor Bial in a thlen tur inkhawmpui senso atan Rs nuai 70 ruahman a ni a. Inkhawmpui thupui-ah hian ‘Pathian hnaih rawh u (Jacob 4:8)’ tih a ni ang.
