February 22, 2024 (Ningani) Dar 10:00AM khan Mizoram Ṭhalai Kristian Pawl (MṬKP) rorèl vawi 70-na, BCM Biak In, Gilgal, Theiriat-ah neih a ni a, rorêl palâi 573 kalin, palai riak lùt hi mi 189 an awm. Rorêl hi President Upa R. Lalrochama’n kaihruaiin, kum kal tàa ṬKP member ropuina rama kalte mi 173 (Mipa 150 leh hmeichhia 23) sûnna hun hman a ni a, Rev. ZD Rodingliana, Director, Fellowship Department-in an kalsan chhûngkua leh rawngbâwlpuite tâna ṭawngṭàisakna hun a hmang.
Secretary - Rev. F. Zorinkhuma hnèn aṭangin MṬKP hma lâkna hrang hrang report ngaihthlâk a ni a, kum 2023 rorèl leh 2024 rorèl inkârah ṬKP member innei tuak 618 awmin, Kohhran Dân Puitlinga innei tuak 401 leh Dân tea innei tuak 217 an ni. Mizoram Ṭhalai Kristian Pawl (MṬKP) hnuaiah bial ṬKP 92 leh unit ṬKP 433 awmin, tun dinhmunah member 48793 (mipa 29791 leh hmeichhia 19002), an awm mek a, kum 2023 aṭanga member punna hi 1569 a ni.
Finance Secretary leh Tresurer report in a tarlan dan in kum 2023 - 2024 chhûngin Rs 60,83,978/- hmuh niin, hèng aṭang hian Rs 56,63,067/- hman a ni a, kuta la awm hi Rs 4,20,911/- a ni. Editor Thalai Entu hnen atangin Ṭhalai Êntu copy 13,050 tihchhuah mêk a nih thu report a ni bawk.
Rorêl hian kum 2024 - 2025 chhûng atan budget Rs 15,00,000/- a ruahman a, hmalakna tur hrang hrang hetiang hian a rel: –
- BCM Pandal Structure siamna atân sum thawh ni se;
- MṬKP hma làkna-a inzirtîrna hi kum khatah pakhat neih ṭhin ni se;
- Kristian chhungkaw din chungchâng inzirtîrna neih ni se;
- MṬKP Youth Centre pual fehchhuah vawikhat neih ni se;
- ṬKP Platinum Jubilee (2026) lawm ni se;
- Sorkar ṭha kan neih theih nân, Pathianni tlâi vawikhat chaw nghei ṭawngṭài neih ni se;
- Ṭhalai Êntu Electronic form-a subscribe theih tûrin buatsaih ni se;
- Hrisêlna chungchângah ṭhalaite’n hmâ kan sàwn theih nân hmâ lak ni se;
- ṬKP thutiam leh ṬKP dinchhan sawi rual dân inang tláng hmang tûra hma làk ni se;
- MṬKP hruaitute’n Unit tê/tlêm zàwkte tlawh tam zêl ni se tih te leh
- ṬKP member tinte’n Christian Hospital Lawngtlai-a Operation Theatre Light leh Adjustable Table lei nân Rs 20/- ṭheuh thawh ni se, tih te a ni.
