Tunkar Pathianni, November 20, 2016 hi Mizoram Baptist Kohhran Nipawimawh "Naupangte Ni" a ni a. Tualchhung Kohhran tin ten a vawikhat nan he Ni hi Pathianni chawhma Inkhawm-ah hmang theuh tura beisei an ni. Headquarters atanga thlan sa “Tho la Naupang kha kai tho la, i kutin   chelh rawh” (Gen.21:18 ) tih thupui hmangin Pathian thuchah ngaihthlak a ni ang a. Tawngtai thupui siam sa pathum - 1. Naupangten nun kawng dik an zawh theih nân. 2. Naupang enkawltu Nu leh Pa te tân 3. Kohhran leh School-a naupangte kaihruaitute tân tih te hmangin tawngtairual a ni bawk ang. BCM Assembly 2015 chuan 'Naupangte Ni' hi kum tin Pathianni zing inkhâwm vawikhat hun hman ni se tih a lo rêl chu a hun atân Assembly Executive Committee 2015 (Aug) chuan November Chawlhni vawithumna apiang hi hman thin ni se a ti a. Naupangte ngai pawimawha anmahni pual ngeia 'Naupangte ni' hmang tûra Assembly-in a lo rêl hi thil lâwmawm tak a ni a, Tualchhung Kohhran ten theihtawpa inbuatsaih chunga hmang theuh turin Heaquarters chuan a chah a ni.

............................

NAUPANGTER NI PAWIMAWHNA

Isua'n Naupang a ngai pawimawh:

Isua rawngbawlnaa dinhmun pawimawh tak luahtute chu naupangte an ni. Hmân laiin Nausênte chu an piancham-ah an nuten Rabbi hnênah malsâwmna dawntîr tûrin an kalpui thîn a. Isua pawh hi Rabbi (zirtirtu) a nih avângin a hnên atanga malsâwmna dawng tûrin naupangte an rawn hruai a ni. Isua hnêna a malsâwmna dawng tûra naupangte an rawn hruai chu Isua zirtîrte chuan an tihbuai hlauvin an lo hauva. Hetah hian Isua zirtîrten naupang an ngaihdân leh Isuan naupangte chunga a rilru put dân hi a in ang lo hle a ni. Keini pawh Isua rilru ang pua naupangte kan en hi thil tûl tak a ni.

Hmân lai chuan mizoten naupang kan en dân pawh kha a hniam hle a, 'Uite rim in nam, pâwnah awm rawh u' tih a nih kha. Isua hian a ngaih pawimawhte chu naupangte an ni a, a zirtîrten Isua rilru hriatthiampui lova an hauh pawh khan a lungni lo êm êm a ni tih kan hria. Isuan Naupangte chu a hnêna awma a malsâwmna dawntîr a duh a. Chuvângin naupangte chu hnar a phal lova, a hnênah kaltîr tûrin a ti zâwk a. 'Naupang tête ka hnênah kaltîr ula, hnar suh u; Pathian ram chu hetiang mite ta a ni si a' (Mk 10;14). Lal Isuan heti taka naupangte a duhsaka an thlavâng a hauhva a ngai pawimawh ang hian keini pawh hian kan tu leh fate hi kan ngaihsakin kan ngai pawimawh anga, an thatna tûr kan duhsakin kan thlahthlam tûr a ni lovang. Isua hian naupangte chu Pathian ram neitu an ni a ti hial a ni.

Isua rawngbâwlnaah naupangte an pawimawh:

Isuan mipui sângnga a hrainaa a hmanraw pawimawh tak chu mipa naupang a ni. Mipui tam tak ei tûr nei lova an awm laiin an zînga mipa naupang chuan chhangpêr Panga leh Sangha pahnih a lo pai khiau a nih kha. Mipa naupang chhangpêr leh Sangha pai hmang chuan mipui Sangnga te chu hrai puar an ni a, an ei bâng pawh bâwmrâng sâwm leh pahnih lai a tling a nih kha. Naupangte hi Isua rawngbâwlnaah hmun pawimawh tak luahtu, mi tangkai leh rawngbâwlpui nuam tak, mi thilphal leh an neih chhun tlêmtê pawh mi dangte tâna pe chhuak zo vek phalte an ni.

Isua Jerusalem Temple a luh laiin naupangte chuan "Davida fapa Hosanna' tiin Amah fakin an lo au va. Chutia naupang têtêin Amah faka an lo au a hmuh chuan a lâwm êm êm a, "Nausênte leh hnute hne laite kaa chhuak chuanin fakna a ti tha famkim ta" a ti a. Naupangten an theih tâwka Amah an fakna ri chu Isua tân a mawiin a va hlu dâwn êm! Isua thinlung khawihtute leh a rawngbâwlnaa Amah faka lo chawimawitute, amah lo lâwmtute hi Naupangte an ni. Isuan naupangte fakna a lo dawnsawn dân hi a va duhawm êm. Naupangte hian Pathian fak hi nuam an ti êm êm a ni.

BCM leh Naupangte:

BCM hian Naupangte hi ngaihsakin a dah pawimawh khawp mai a, anmahni puala inkhâwmpui te, inkhâwmnate leh chanvo hrang hrangte pawh a siamsak thîn. Headquarters-ah pawh Naupangte (KNP) hi Fellowship Organisation Department hnuaiah a dah a, hei hi thil lâwmawm tak a ni. Tualchhûng Kohhrante pawhin anmahni thawhchhuaha in enkawltîr mai lovin tûl leh mamawh an neih apiang (Tualchhûng Kohhran tam zâwkte) an sawi chu tihsak an ni zêl a, Kohhran hian naupangte hi a ngaihsaka an rawngbâwlna atân leh an thlarau thanlenna tûrin ruahmanna tam tak a siam thîn. Anmahni enkawl tûrin hruaitu tha tak takte a ruatsak a, naupangte enkawlna kawngah hian Kohhran hian hma tam tak a la a ni. Amaherawh chu khawvêl thang chho zêlah Kohhrante pawh kan hmalâkna a zau ve zêl a, Naupang enkawlna kawngah pawh hmasâwnna tûr tam tak kan la neiin a lang. Pathiannia Kohhran inkhâwm ah te an rawngbâwlna tûr awm tâwk chanvo siamsak thin an ni a.Tûnah phei chuan an mahni pual ngeia Pathianni vawikhat hun hmannate kan lo nei ta hi a lâwmawm êm êm a ni.

Naupangte hi Kohhran timawitu leh tiphuisuitu an nih tlat avângin Kohhranah tlângnêl taka an tel a, phûr tak leh nuam ti taka an awm theihna tûrin thil tlêmtê han târlang ila:

1. Kohhran inkhâwmah naupangte chanvo pêk tam deuh ni se.
2. Pathianni zîng inkhâwmah Sermon sawitu apiangten naupang pual sawi thin hi a tha khawp mai. Naupangte hian puitlingte thu ngaihthlâk hi an man pha lo va, chuvângin an puala thawnthu tawi emaw, an ngaihthlâk thiam tûr sawi thin hi a thil tha tak a ni.
3. Naupangte enkawlna tûr budget pawh tih tam ve deuh ni se.
4. Naupangte Sikul chawlh laia Programme siam thin ni se. Puitlingte hian kum khat chhûngin programme tam tak kan siam thin a, naupangte tân pawh an sikul chawlh laia programme siam thin ni se. entir nân- crusade, camping, hmun pawimawh tlawhpui leh thil dangte.
5. Sunday zîng inkhâwmah (secretary thu puanah)- Naupangte fuihna leh fakna thu tawitê zeh tel thin hi a tha êm êm a ni.
6. Naupangten programme an neiha an hman tûr hmanrua entîr nân- projector, Musical Instrument leh thil dang, ngaihtuahsak theite tân chuan a tangkai thei hle.
7. Nu leh paten naupangte thiltih hlutpui thiam thin ni se. Naupangte hian Kohhran rawngbâwlna leh Kohhran ngaih pawimawhna an neih chuan kal sualna lakah thui tak vênhimin an awm thei dâwn a ni.

Chhûngkuaa naupangte:

Naupangte hi nakin lawka chhûngkua, Kohhran leh Ram hruaitu tûrte an nih avângin chhûngkua atanga enkawlna tha an dawn hi a tûl êm êm a ni. Tûn lai khawvêl tlân chak takah hian, mahni In lum atangin khawvêl thil thleng chi tinrêng an hmu a, hêngte hian nasa takin an nun a kaihruai a, a tha leh tha lo pawh an thliar thiam tawh si lova. An nun hruai sualin a awm a, a pawi êm êm a ni. Tûn laia naupangte chunga thil thleng mêk rûkbo, sumdâwn nâna hman, khawihchhiat, hna thawh luihtîr a tam êm êm a ni. Hetiang hi kan hun tawn mêk a nih tawh avângin nu leh pate hian tu leh fate enkawlna kawngah Pathian chakna ringa tan kan lâk thar a pawimawh takzet a ni. Nu leh pate hi fanau enkawlnaah inthlahdah hman a ni tawh lo. Isuan naupangte a hmangaih a, a hnêna hruai tûrin a ti a. Naupangte Krista hnêna hruai thlen hi khawvêl thil dang zawng zawng aia hlu a ni.

Naupangte nun venhima a awm a Krista hnena hruaithlen an nih theih nan mimal, chhungkua leh Kohhranten tan ila zel ang u.