Assam Field, Dhubri Area a BCM in rawng kan bawlna kum 50-na (Golden) Jubilee chu September 16-18, 2023 chhung khan Assam Field Headquarters Dhubri-ah hman a ni a. Dhubria Area huam chhung, North-West Assam Baptist Church (NABC) hnuaia Kohhran hrang hrang atangin he Jubilee hmang hian mi 300 Chuang an kal khawm a, Mizoram atang pawhin Audio Visual Production thawktu te Jubilee lawmna Video Coverage tih sakin an kal a ni.
Golden Jubilee ah hian NABC pastor pahnih leh Assam Field a Field Director lo ni tawh Rev. C. Zatawna leh Rev. PC Lalnunzira, Regional Director Guwahati te speaker ah hman an ni a, Jubilee lawmna ah thupui 'Isua Krista Khawvel Chhandamtu' tih hmangin an hnen atang hian thuchah ngaihthlak thin a ni. Pathian Biak inkhawm bakah Cultural Programme te awmin, NABC huamchhunga Hnam hrang hrang lam leh zai te entir a ni.
Dhubri, Assam ah hian 1973, September ni 18 khan Rev. C. Khuala te chu Rawngbawlna turin an thleng a, Rawngbawlna tura an thlen ni hi helai Hmuna Chanchintha a thlen ni ah hmangin Kohhran, North-West Assam Baptist Church din tan ni atana hman a ni nghal bawk a ni. Tun dinhmun ah Kohhran 10 leh Fellowship pakhat awm in, member 1161 an awm mek a, a tam ber hi Adivasi Kohhran an ni a, an ni bak ah hian Nepali, Garo, Assamese leh Rajbongshi te an awm a ni.
