November 8-10 hmang khan Pastor Bial hrang hrang- Zotlang(Aizawl), Vairengte, Republic Vengthlang, Lawngtlai East, Lungsen leh Lengpui Pastor Bialah te  Bial TKP Inkhawmpui leh Bial TKP Rorel hetiang hian neih a ni:-

 

#Zotlang Pastor Bial, Aizawl 

November 8th-10th, 2024 khan Ṭhalai Kristian Pawl Zotlang Pastor Bial, Aizawl te chuan Inkhawmpui vawi 19-na leh Rorel Vawi 31-na BCM Biak In Chawnpui, Aizawl ah an nei a, Speaker atan Rev. F. Zorinkhuma Secretary MṬKP an hmang a,  Speaker bakah hian MṬKP Executive Committee Member te  - Pu Chanchinmawia Fanai, Pu Lalhmunsiama Pautu, Rbt. Zohmangaiha leh Alvin  K. Lalrintluanga, ten tel puiin MṬKP Media Cell member ten anṭawiawm bawk. Anni bakah hian Guest Artiste Nl Rebek Lallawmzuali te, Aizawl Area Baptist Choir leh Zotlang Pastor Bial Zaipawl ten zaia rawngbawlin Inkhawmpui an hmanpui a, Aizawl Area ṬKP leh Aizawl City chhunga Pastor Bial hrang hrang hruaituten Inkhawmpui hi an hmanpui bawk.

November 9, 2024 Inrinni nilengin Rorelna neih a ni a, Rorel palai kal zawng zawng hi member 212 an ni. Kum 2025 Bial ṬKP hmalakna atan - Bial huap a Unit tin OB te orientation neih te, Bial ṬKP Laptop lei te, Christian Hospital Serkawn Poor Patient Fund puala fehchhuah neih te, Bial ṬKP huap Praise & Worship neih rawtna te an remti a, Bial chhung Unit Intlawhthelh, Bial ṬKP huap Chawnghei Ṭawngṭai, Bial ṬKP Sport neih, Bial hruaitute Unit tlawh,  Bial ṬKP in Home Ṭanpuina pek leh Pastor Quarters puala sum dah te pawh tihhlawhtlin turin an pass a, Kum 2025 budget atan Rs 227,600/- pawm a ni. Kum 2025-2026 atana Bial ṬKP hruaitute-Office Bearer thlanna neih a ni bawk.

Secretary Bial ṬKP report-in atarlan danin - ṬKP Zotlang Pastor Bial Aizawl ah hian ṬKP Unit 7 awmin ṬKP Member 1,426 an awm a, Mipa-791 leh Hmeichhia-635 an awm mek a ni. Bial ṬKP Rorel leh Rorel inkarah Member boral mipa panga(5) an awm a, Kohhran Dan Puitlinga Innei tuak  sawmpahnih (12) awmin, Dantea Innei Tuak thum (3) an awm bawk. Aizawl Area ṬKP buatsaihin Thisen Unit 60 an pe a, Bial chhung Unit te buatsaihin Thisen Unit 56 pe bawkin avaiin Thisen Unit 116 an pe a ni. MṬKP Thuzir Exam thei 172 awmin, Unit Exam ṭha te lawmman ṭha tak an siam bawk a ni.

 

#Vairengte Pastor Bial

TKP Vairengte Pastor Bial Inkhawmpui leh Rorel vawi 15-na chu November 8 - 10, 2024 chhung khan BCM Biak In, Town Church-ah neih a ni a, Inkhawmpui thupui-ah ‘Thalaite leh tunlai khawvel” tih hman chu hman a ni a, MTKP Executive Committee member pathum Tv. Lalrempuia Khiangte, Tv. K. Lalremkima leh Pu PC Lalhmangaiha ten Inkhawmpui hi an hmanpui a, Inrinni zanah Tv. Lalrempuia Khiangte-in thuchah a sawi a, Pathianni zing inkhawmah Tv. K Lalremkima’n thuchah sawiin, Pathianni Chawhnu Fellowship hunah “Leadership quality leh Zai hruai dan” tih hmangin Seminar neih a ni a, Resource Person-ah Pu PC Lalhmangaiaha hman a ni bawk. Pathianni Zan inkhawmah Pu PC Lalhmangaiha hian thuchah a sawi leh nghal bawk a ni. Inkhawm apiangin Malzai leh Zaipawl te rawngbawlna leh Special item te a awm bawk.

Inrinni nilengin Bial TKP Rorel Inkhawm neih a ni a, an rorel thu pass zingah  - missionary Support pek te,  Pastor Quarter tih changtlunna budget dah te, ⁠leadership training & Seminar neih te, ⁠inkhawmpui/Rorel in buatsaihna budget a dah te, ⁠bial pawn feh chhuah neih te, ⁠blood donation neih te, ⁠Bible leh FD inkaihhruaina dan atangin ral chhan buatsaih te, ⁠bial chhung unit tinte hun in angah chaw nghei tawngtai neih rawtna te, ⁠bial chhung a unit tinten bible chhiarchhuah rawtna te,  ngaihtuahin an remti a, bial tkp a chhunluh turin unit tinin vawi khat tal fehchhuahna neih te, pastor bial fang bial tkp hruaituten tawiawm te, ⁠bial tkp member zingah mi pahnih talin solfa zir tur in tirh rawtna te pawh remtih a ni bawk. Kum 2024-2025 budget atan cheng 95000/- an pawm bawk.

Bial ṬKP Secretary report-a a tar lan danin Vairengte Pastor Bialah hian TKP Unit 6 awmin TKP member hi Mipa -110, Hmeichhia - 81, an vaiin 191 an awm mek a, Kum 2023  Rorel leh kumin Rorel inkarah hian ṬKP member mitthi an awm lo a ni.

 

#Republic Vengthlang Pastor Bial

TKP Republic Vengthlang Bial Inkhawmpui vawi 4-na leh Rorel vawi 10-na chu November 9 leh ni 10, 2024 chhung khan BCM Biak In, Salem Veng, Aizawl-ah neih a ni a, Inkhawmpui thupui-ah ‘I Pathian tawk turin inpeih rawh’ (Amosa 4:12) thu hman a ni a, Speaker-ah Rev. C. Lalrochama, Bialtu pastor  hman a ni. Rorel leh Inkhawmpui hi Aizawl Area ṬKP Coordination hruaituten an telpui a ni.

 

Inrinni nilengin Bial TKP Rorel neih a ni a, Bial TKP hmalakna  tur hrang hrang te relin kum 2024-2026 atana Bial hruaitu thlanna neih a ni bawk. Inrinni zan, Pathianni zing leh Pathianni zan-ah te Pathian biak Inkhawm neiin Bial chhunga Unit hrang hrang atangin zaipawl, Malzai leh Groui zai te ngaihthlak a ni a, Speaker hnen atangin thuchah tha tak tak ngaihthlak a ni bawk. Pathianni chawhnu-ah Fellowship hlimawm tak neiin Special Item hrang hrang ngaihthlak leh thlir ho a ni bawk.

 

#Lawngtlai East Pastor Bial

November 9 (Inrinni)  khan ṬKP Lawngtlai East Pastor Bial te chuan BCM Biak In, Nazareth, Lawngtlai-ah Bial TKP Rorel Vawi 21-na tluang takin an nei. Bialtu Pastor Rev. Tc Lalmalsawma’n Bial Rorel hi telpuiin, Rorel palai 157 zet an tel a ni. Kumin Rorel-ah hian Agenda 23 (Bial ṬKP Executive Committee thu - 12, Unit atanga thu lut - 11) rel a ni a, Agenda 21 passed a ni. Budget atan Rs.2,20,000 ruahmanin an thu pass dang te chu  -  Ruihhlo ngaite pualin hmalak te, Ruihhlo ngaite pualin Unit tinah ṭawngṭaina neih te, Ruihhlo ṭhat loh zia tarlanna Hoarding Bial chhunga veng tinah tar te, Bial huap Crusade neih rawtna te an remti a, Rilru Hriselna Inzirtirna (Mental Health Awareness) Unit tinah neih te, Baptist Masihi Choir, Lawngtlai Area rawngbawlna atan Unit tinin Fehchhuah vawikhat ṭheuh neih te,  Bialtu Pastor Quarters-ah  Wall Fan pathum dah leh Bial aṭanga Missionary, Pathian thuzir, Evangelist leh Pastor an chhuah zel theih nan hmalak ni se tih te an remti bawk.

Bial ṬKP Secretary report-a a lan danin ṬKP Lawngtlai East Pastor Bialah hian member 993 (Mipa - 616, Hmeichhia -377) an awm a. Kum 2023 Rorel leh kumin Rorel inkarah hian ṬKP member mitthi - 4 (Mipa 3, Hmeichhia 1) awmin Kohhran Dan Puitlinga Innei mi sawmpakhat (11) (Tuak 10) an awm bawk.

 

 

 

# Lungsen Pastor Bial

November 8-10 hmang khan ṬKP  Lungsen Pastor Bial pawhin Amosa 4:12 thu “I Pathian tawk turin inpeih rawh” tih thupuia hmangin BCM Biak In Venglaiah inkhawmpui an nei a. Speaker-ah Rev. Dr. Lalzarliana, Director Communications Deparmtent hmangin, Tv. R. Lalhmingmawia (Mapuia), Lungmawiin zaia rawngbawlin inkhawmpui hi a hmanpui bawk.

Zirtawp zan, Inrinni zan, Pathianni zing leh Pathianni zanah te Inkhawmna neih thin a ni a, inkhawm apiangin Speaker hnen atangin thuchah leh Zaipawl hrang hrang leh mimal zaithiam te hnen atangin zaia rawngbawlna ngaihthlak thin a ni a, Speaker tawiawmtu Tv. R. Lahmingmawia pawhin inkhawm apiangin zaia rawngbawlna a nei thin a ni. Pathianni chawhnu-ah ‘Mental Health Awareness neih a ni a, Resource person –ah Speaker hman niin, rilru hrisel neihna tura inbuatsaihna leh rilru hrisel neih a pawimawhna te zirhovin hlawk takin hun an hmang  ani. Inkhawmpui chhunga thawhlawm tlingkhawm te hi BCM Biak In, Chhumkhum sak mek tanpui nan pek a ni.

Inrinni nilengin Bial TKP Rorel inkhawm neih a ni a, Rorel palai 120 an kal a, an thu pass zingah – Faina kawngah hma lak te, Bial hruaitute Unit tlawh te, Kohhran dan puitlinga innei an tam theih nana hma lak te, BCM Biak In, Chhumkhum sak mekah Bial TKP ten hnatlang vawi khat neih te, Lungsen PHC-ah Poor Patient Fund pek te, Ruihhlo do kawnga hma lak rawtna te rem tiin an pawm a, Bial TKP hminga Misisonary Support te, Christian Hospital, Lawngtlaiah Poor Patient fund pek te, Bial TKP ten Blood Donation Camp neih te, Bial TKP sports Meet neih te, Pastor Quarters compound samfai hnatlang vawi hnih neih te, Lungsen PHC-ah Pastor, Missionary leh Evangelist dam lo an awmin Bial TKP hminga kan ni se tih te an remti bawk. Heng bakah hian kum 2024-2025 budget atan cheng nuai 1, sing 3, sang 8 leh 100 pawmin Kum 2024-2026 atana Bial TKP hruaitu thlanna neih a ni bawk.

Bial ṬKP Secretary report-a a lan danin ṬKP Lungsen Pastor Bialah hian TKP Unit 6 – Chhumkhum, Lungsen, Mahanaim(Lungsen), Venglai(Lungsen), Phairuangkai leh Rangte unit te awmin TKP member 630 an awm mek a, Kum 2023 Rorel leh kumin Rorel inkarah hian ṬKP member mi pathum (mipa vek) in Chatuan ram an pan a, Kohhran Dan Puitlinga Innei tuak 2 leh Dan te-a innei tuak 4 an awm bawk.

 

 

# Lengpui Pastor Bial

Thalai Kristian  Pawl Lengpui Pastor Bial te chuan Inkhawmpui vawi 19-na leh Rorel vawi 30-na BCM Biakin Model, Lengpui ah neih a ni a, Speaker atan Upa. R. Lalrochama MṬKP President an hmang a, Speaker bakah MṬKP Executive Committee Member aṭangin Rbt. Lalbiaknia Chhakchhuak, Pu. Jeffrey Lalremruata leh Nl. Nancy Lalmuankimi ten an ṭawiawm bawk ani, an ni bakah hian Ni 10/11/2024 Pathianni zing inkhawmah Aizawl Area Co-Ordination hruaitute aṭangin Pu. Rony Lallianmawia'n Greetings sawina a nei a Nl. H. Lallawmi'n a rawn ṭawiawm bawk a ni.

November ni 9, 2024 Inrinni nilengin Rorelna neih a ni a, rorel palai hi mi 50 an kal thei a ni. Kum 2025 Bial ṬKP hmalakna tur atan - Bial hruaitute'n Unit tin tlawhchhuah te, Pastor Quarter chei ṭhatna tura Rs 5,000/- dah, Bial huapa thisen pek te, Bial huapa fellowship vawi khat neih, Bial hminga Lengpui leh Sairang Damdawiin a Poor Fund pek, Meet & Sport neih te relin an pass a, tin Inkhawmpui neihloh kum a Meet & Sport hman ṭhin tih te a ni. Kum 2025 Budget atan Rs 93,00/- pawmin, Kum 2024 – 2026 atana Bial ṬKP Office Bearer thlanna neih a ni bawk.

Secretary Bial ṬKP report - TKP Lengpui Pastor Bial ah hian Unit 4 awmin ṬKP Member 296 awmin, Mipa - 173, Hmeichhia - 123 te an awm mek a ni. Bial ṬKP Rorel leh Rorel inkarah Member thi an awm lova, Kohhran Dan Puitlinga innei hi tuak 1 awmin, Dantea innei hi tuak 4 an awm bawk. Aizawl Area ṬKP buatsaihin thisen Unit 27 an pe thei bawk a ni.