Mizoram Baptist Kohhran, Assembly vawi 128-na chu BCM Biak In, Electric veng, Lungleiah neih chhunzawmin, vawiin, March 10, 2024 (Pathianni) zing dar 10:00 khan Pastor leh Minister nemngheh inkhawm (Ordination Service) neih a ni.
Rev. R. Lalbiakliana, General Secretary-in inkhawm kaihruaiin, Rev. Vanlalmuankima, Director, Pastoral Department-in Minister nemngheh turte hmelhriattirna a nei a, Rev. Dr. R. Lalthanmawia’n tawngtaisakna neiin, Rev. F. Ramdinmawia, BCM President-in nemnghehna a neih hnu-ah fuihna thu leh thuchah a sawi. Nemngheh Inkhawmah hin BCM Choir leh Electric Pastor Bial Zaipawl ten Pathian fakna hla remin, Rev. R. Lalnunzira, AGS-Service-in malsawm tawngtaiin inkhawm a tin ta a ni.
Tun tumah hian minister atan mi 15 nemngheh niin, an zinga 12 te hi probation hun hmang zo tawh, Pastor Biala awm turte an ni a, mi pathum te chu AICS a Assistant Professor hna thawk mek an ni. Pastor leh Minister atana nemngheh te chu hengte hi an ni: -
Pastor atana Nemngheh te:
- Rev. Lalruatdika Pautu, Upa P. Vanlalhriata fapa, Vaisam Bial-a awm tur
- Rev. V. Lalrozuala, V. Vanlalsiama fapa, Khumtung Bial-a awm tur
- Rev. C. Lalnunsiama, Upa C. Thantluanga fapa, Phuaibuang Bial-a awm tur
- Rev. Rosangzuala, B. Biakthuama fapa, Tawipui ‘N’ Bial-a awm tur
- Rev. Danmawia Chawngthu, Rev. VL.Nithanga fapa, Bunghmun-a awm tur
- Rev. Lalramhluna Chhangte, C.Zanawla fapa, Phawngpui ‘S’-a awm tur
- Rev. H. Lalrinsanga, H. Remmawia fapa, Vairengte-a awm tur
- Rev. Benjamin Lalremruata, Dr. HC. Thangkima (L) fapa, West Phaileng-a awm tur
- Rev. Jacob Lalnunhlua, Lalsangliana fapa, Phuldungsei-a awm tur
- Rev. R. Lalramchhana, R. Zothanliana fapa, Serte-a awm tur
- Rev. Laldinmawia Hnamte, Lallianmawia Hnamte fapa, Kawrthah-a awm tur
- Rev. F. Lalramzauva, F. Remthanga fapa, N. Vanlaiphai-a awm tur
Pastor nilo, Minister atana nemnghehte:-
- Rev. Dr. Andrew Lalhmangaiha, C. Dozuala(L) fapa, Asst. Professor - AICS
- Rev. Vanlalpeka, S. Laingia fapa, Asst. Professor - AICS
- Rev. Johny Lalhmingmawia, C. Lalremruata fapa, Asst. Professor - AICS
Chawhnu dar 1:30 hian Lalpa Zanriah (Sacrament) inkhawm awmin, Rev. F.Ramdinmawia’n dawhkan a buatsaih ang a. Zan dar 6:45 ah Pathian Biak Inkhawm awm lehin, President Rev. KV Thanga’n inkhawm a kaihruai ang a, President kalchhuak Rev. KV Thanga'n thuchah a sawi ang.
