Mizoram Baptist Kohhran Rorelna sang ber – BCM Assembly vawi 123-na BCM Biak In, Venglai, Lunglei a neih mek chu, vawiin-ah Rorel nithumna an hmang zo a. Naktuk, Pathianni chawhma inkhawm hi Ordination Service atan hman a ni ang a. Hetah hian Probationary Pastor kum thum lo thawk tawh leh Pro.Pastor Exam hrang hrang paltlang tawh mi 8  Minister atan nemngheh (Ordain) an ni ang.

Ordination Service-ah hian BCM President, Rev. Pc. Liandula’n kaihruaiin  nemnghehna pawh a hmang nghal ang a,   BCM Choir  leh Mualthuam 'N' Pastor Bial zaipawl te an zai ang. Ordain turten Testimony tawi an sawi bawk ang.

Pastor/Minister atana nemngheh turte chu hengte hi an ni.

S.No	Hming	Awmna Bial
1	Eddie C. Laldinsanga	Chawngte
2	Eden Remnalalduhawma	Diltlang
3	Lalawmpuia Chinzah	Thingfal
4	Lalhruaitluanga Chawngthu	Zotlang, Aizawl
5	Lalnunsiama Sailo	Republic, Aizawl
6	Lalramchuana	Zemabawk, Aizawl
7	T. Lalniropuia	Serchhip
8	Zabiaka	S. Vanlaiphai

Pathianni chawhnu dar 1:00-ah Sacament Inkhawm a awm ang a, Rev.V. Vanlalchhunga’n Lalpa Zanriah a buatsaih ang,  Zaipawl  –   Zobawk ‘S’  Pastor Bial  leh  New Serchhip Pastor Bial Zaipawl te an zai bawk ang. Pathiani zan dar 6:45-ah Assembly kharna Inkhawm leh BCM Hruaitu thar hlanna Inkhawm awm ang a, Rev. Pc.Liandula, BCM President thar-in Inkhawm kaihruaiin Hruaitu thar hlanna a nei nghal ang a, General Secretary, Rev. F. Ramdinmawia’n Rorel  Report tlangpui pein President kal chhuak- Lalbiaksanga Chinzah-in ‘Isuan ro a rel- Thiltihtheihna leh Hnehnain’ tih thupui hmangin thuchah a sawi ang. Hemi zan hian  Bawngkawn Pastor Bial, Phawngpui ‘S’ Pastor Bial leh Bazar Pastor Bial Zaipawl ten Pathian fakna hla an rem ang.