Baptist Church of Mizoram

Pu Lalfamkima, Missionary, Jhakhand Field chu November 25, 2022 (Zirtawpni) zan dar 7:50 khan, Ebenezer Hospital, Aizawl-ah a boral a, a tuk, November 26 (Inrinni)-ah BCM Biak In, Tlangnuam, Aizawl-ah vuina Inkhawm neiin, Tlangnuam Thlanmualah vuiliam a ni.

Pic: Kima nupui leh fate

Pu Lalfamkima thlahna Inkhawm hi Rev. V. Laltlanzuala, Bialtu Pastor, Mission Vengthlang Pastor bial in a kaihruai a, Rev. R. Lalrintluanga, Executive Secretary, Aizawl-in vuiin, Tlangnuam Kohhran atangin Kohhran aiawh leh Chhungkaw awiawh-in a Pa Rev. LB Khawpuimawia thu sawi te, Lalfamkima farnu Esther Kiangte fakna hla hmanga a thlahna leh Vuitu Pastor hnen atangin thuchah ropui tak ngaihthlak a ni. Rev. Dr. B. Lalramhluna, Assistant Professor AICS in malsawm tawngtaiin Vui Inkhawm a khar a, Thlalakpui a nih hnu-ah Tlangnuam Thlanmuala-ah ropui taka thlah liam a ni.

Pic: Vuitu Pastor - Rev. R. Lalrintluanga, Executive Secretary, Aizawl

A CHANCHIN TLANGPUI

Pu Lalfamkima hi Rev. LB Khawpuimawia leh Pi CV Thanpuii te fa upa ber niin kum 1978, May 15 khan a piang a, pianpui unau pathum a nei a ni. Kum 2004-ah BCM Missionary atan lak a ni a, Arunachal West Field, Sagalee hmun ah, Nishi hnam zingah Music Teacher hna a thawk a, kum 3 chhung Sagalee Kohhran thalaite zinga music rawngbawlna hlawhtling tak a neih hnu in, Nisi hnam zing ah tho, an khawpui Naharlagun-ah music rawngbawlna nei turin a insawn a, Naharlagun-ah hian kum 7 a awm leh hnu-ah 2013-ah AICS ah Missionary Training; Diploma in Mission Study zir in a awm a. Training a zawh hnu hian West Bengal Field, Bagdogra hmunah Evangelist-in dah a ni a, West Bengal Field-a a thawhlai 2015-ah C. Lalhmingthangi nen innei in, fapa pahnih - Josuah Lalvensanga (kum 6) leh, Sarah Lalvenpuii (Kum 2) mi te an nei a ni. West Bengal Field-a kum 7 a thawh hnu ah, 2020 khan Jhakhand Field ah a sawn niin, chhungkua-in hlim leh phur taka an thawh laiin tun hi a thleng ta a ni.

A HUN HNUHNUNG

Pu Lalfamkima hi Missionary Conference hmang tura inbuatsaihin, Mizoram rawn panna tur ticket pawh an la fel tawh a, chutihlai chuan pumna avangin an hnaih ber Damdawiin pan a ngai ta thut a, Damdawi in-ah lut in, a mit (gal) ah lungte a awm tih hriat a ni a. Mizoram lama inenkawl turin na tak chung in an rawn haw chho a, an rawn haw kawng ah pawh hian Field Director Rev. K. Lalhnehliana ruahmanna in Jharkhand Field-a Evangelist Nurse N. Remremi'n a rawn zui a, kalkawng ah te pawh nachhawkna in an rawn jection zel a. October 29 ah Aizawl rawn thlengin, ZMC Falkawn ah October 31 ah admit a ni a. A mit a vung a, infection te a awm avangin ni 15 an enkawl phawt a, hemi hnu hian a mit a lungte awm chu hipchhuah tumin doctor ten an bei a, an hlawhchham tak avangin, November 17 ah Ebenezer Medical Centre panpui a ni a, Doctor ten an han en a, a rang lama Kolkata panpui turin an rawn a. Doctor te thurawn angin November 18-a Kolkata panpui turin thlawhna ticket lak nghal a ni a, in lam pana hawpui a ni ta a. Ebenezer atanga hawpui a nih hnu hian tlai lamah a na a rawn zual leh a, Ebenezer ah bawk kalpui a ni leh a, a tuk November 18 ah emergency-a zai tura buatsaih a ni ta a, darkar 2 zet zai a nih hnu in ICU ah ventilator nena enkawl a ni ta a ni.

Hma sawn chho hret hret in November 24 ah ICU atanga Cabin-a sawn a ni a. Tha chho zel tura beisei a nih lai in, November 24 zan lamah pumna leh khuh in tibuai leh in, chu chuan an harsatna dang siam zelin bleeding a nasa tak a siam a, thisen te pe a theihtawp chhuaha doctor ten an beihh pawhin chhan theih a ni ta lova, November 25 zan dar 7:50 khan a rawng a lo bawl thin Lalpa hnenah a a haw ta a ni.

Mizoram Baptist Kohhran chuan Missionary tha leh inpe em em, Lalfamkima a chan ta mai hi pawi a tiin a sun takzet a. A rawngbawlna te avanga lawmthu sawi chungin, a kalsan a nuipui leh fate, a nu leh pa leh a unau te, a thawhna pui Missionary zawng zawng te Lalpan’n tlamuanin awmpui zel se tiin ui leh zah takin a thlahliam a ni.

"Jharkhand Field-a kan rawngbawlpui, kan la thlakhlelh ngawih ngawih Pu Lalfamkima, Pathian mi, Pathian ram tana mi thahnemngai, mi retheite ui lova thilpek pe thintu, thawhpui nuam leh midangte tana inpe zo tak maiin heti teh thuta min kalsan hi kan tiam lovin hriatthiam a harsa hle mai. I hmun ruak hi a va zau dawn tak em! Rawngbawlna hmachhawp kan neihte kha i tel lova bawhzui ngai turte, loh theih loha i hnu chhui ngai han chhuite hi ka va zuam lo em! I pual programme hnuhnung berah i ruang dai kilin ka rawn thlah ve thei lo che a, hreawm ka tiin pawi ka ti hle mai. Chunglam kohna a na em a thlamuang takin chawl nang che. I kalsan takte tan tawngtaina nen theih tawp kan lo chhuah dawn nia. Remruattu fel tak Pathianin engkim a relin a ngaihtuah fel vek mai ang.

Chatuan khawvar hma atan mangtha le."

Rev. K. Lalhnehliana,
Field Director,
Jharkhan Field.

Pu Lalfamkima, Missionary, Jharkhand Field thlahliam a ni ta

Medical & Health Department, Christian Hospital, Serkawn-a Thawk lai, Pu C. Vanlalnghaka kan then ta.

AICS-a Pathian Thu zir tur leh Church Music zir tur lak thar a ni.

BKHP Day hman a ni.

Welcome

Downloads

Materials

​​​​​​​Pu Lalfamkima, Missionary, Jharkhand Field thlahliam a ni ta