Pu R. Lalhlimpuia BCM Headquarters office-a UDC thawk lai chu January ni 21 2025 khan Ropui takin Serkawn Thlanualah Vuiliam a ni ta.
Pu R Lalhlimpuia hi Upa Hrangkunga leh Pi Zatluangi Hrahsel te fa 8 zinga a naupangber niin 1972 May 29 khan Pangzawl khuaa sawikhawm laiin Lungmawi khaw awm khawmna, Keithah vengah a lo pianga. 1995 khan BCM Headquartes office Serkawnah Peon hna a thawk tana, hnathawk chunga College kalin, BA a zawh hnu July nikhat kum 2000 khan ( 1.7.2000) LDC-ah dah a ni ta a ni. Hna thawk chung bawkin Industries Department Lunglei hnuaiah Computer ‘O’ level a zo leh a, BCM in Computer kan hman tan lai vela hetiang lam thiamna nei hmasa a lo ni bawk a, Office a thawhpuite tan a tangkai em em a, a tulna in a nawr nen, Computer zirna ‘ A hand book of MICROSOFT WORD ( Ms Word User Guide book)’ tih chu a tichhuak a, mi tam takin tangkai takin an hmang nghe nghe a ni. Kum 2008 -2009 ( Kumkhat chhung) khan Bangalore-ah Website lam a zuk zir leh a, a zir chhuah hnu hian BCM official Website a enkawl tan ta a ni. April nikhat 2022 khan LDC atangin UDC ah hlan kai a ni leh ta a, he hna hi a hun tawp thlenga a hna vawn chu a ni ta a ni.
March 24, 2010 khan V. Vanlalremi Serkawn, nen in neiin fanu pakhat Grace Lalchhanhimi an neia, fa dang an neih leh hmain November ni 22. 2013 khan a nupui V.Vanlalremi hian a boral sana, nupui dang pawh nei tawh lovin a fanu nen hian an nunkawng khawhar thlak leh bumboh tak chu an zawh chho dun ta a ni.
A lawina BCM Serkawnah hian TKP, BMP O/B lo ni tawhin, Sunday School lamah Intermidiate Zirtirtu a ni a, MBMP Media cell-ah Member niin, an kut ke ber a ni. BCM Headquarters Staff welfare Committee ah hian Secretary nilai a ni bawk.
Pa mal a nih avangin a kova tla, hlen tur hi a tam em em a, ( In lam leh Office lamah) November 2024 chawhnu lam atang khan nawmsam loh vanga haw hma chang a nei zeuh zeuh va, December ni 17. 2024 ah a ka na a sawi tannin, dam leh mai tura ngaih a nih laia a dam mai tak loh avangin Christian Hospital Serkawnah a in en tir a, hma sawn lam aia zual lam a pan tak a vangin, January ni 4, 2025 khan Christian Hospital Serkawnah admit a ni ta a. Test hrang hrang an tih hnu-ah Pneumonia a ni tih an hmu chhuaka. A natna in ziaawm lam a pan theih tak loh avangin January ni 15, 2025 khan Helicopter-in Aizawlah phurh phei in Ebenezer Hospital Aizawl-ah dah luh nghal a ni. Test hrang hrang a paltlang leh hnuah Covid a ni tih an hmuh leh a, That lam aia hniam lam pan zelin, Kohhran hote leh mimal ten theihtawpa Pathian hnena a dam nana an dilna chu, Chawl hlen tawh tura chhan ni ta zawkin, January 20 zinglam dar 6:25 khan Kohna pawimawh ber Van kohna chu chhangin min kalsan ta ni.
January ni 21, 2025 khan ama chena In Serkawn-ah Vuina hun hman a ni a. Upa F. Aihranga’n hun a vawnga, BCM aiawhin Rev R. Lalnunzira AGS - Service-in hun a hmanga, Headquarters Office, Aizawl leh Lawngtlai ES office aiawhin Pangpar dah a ni bawk. Serkawn Bialtu Pastor, Rev. JC. Vanlalluaia’n vuina thuchah tha tak tak sawiin, Pathian tana chhawr na awm tak, mi nunnem, chhungkaw tana pa nih tling tak leh, a maha mi zawng zawng leng chu, Ropui taka thlah liam a ni ta a ni.
