June 28, 2023 (Nilaini) khan Relief & Development Department chuan Puanthui leh Beautician Training chhuak te pualin Skill Training Graduation Programme, Sap Upa leh Pu Buanga Hall, BCM Office, Serkawn-ah neih a ni a. Tun tumah hian Puanthui zir chhuak mi 15 leh Beautician zir chhuak mi 3 hnenah Certificate hlan an ni.
Graduation Service hi R&D Director, Rev. L. Vanlalsanga’n a kaihruai a, Rev. Vanlalmuankima, Director, Pastoral Ministry Department-in Pathian hnena inkawltirna hun hmangin, Pu Lalrinawma, Sr. Coordinator-in report a pe a. Rev. Dr. R. Lalthanmawia, AGS-Mission-in fuihna thu sawiin Rev. R. Lalnunzira, AGS-Service in Puanthui zir chhuakte hnenah Certificate leh Puanthui khawl a hlan a, Pi Baby Lalnunkimi, Tailoring Instructress-in Puanthui zir te dinhmun leh an kalpui dan tlangpui a sawi hnu-ah Rev. ZD Rodingliana, Director, Christian Education Department-in Malsawm tawngtaiin hun a khar a ni.
Youth Skill Training Centre ah hian thiam thil peng hrang hrang Training buatsaih a ni a, Puanthui (Tailoring) Zirna hi 1991 atang khan tan niin, Pathian hruaina-in tun thlengin kum tin la chhunzawm zel a ni a. Tin, Canadian Baptist Ministries leh BCM R&D thawhna in 2022 atang khan skill development program anga kalpui a ni a. Electrician, Beauty & welness leh Computer training te buatsaih leh a ni a, thalai ten eizawnna ngelnghet an neih theih nan theihtawp chhuahin hma lak chho mek a ni bawk.
