Mizoram Baptist Kohhran Chanchin-a rahbi tam tak lo chhu tu Rev. B. Thangchina chuan February 2, 2024 zing dar 2:40 khan kum 84 mi niin khawvel chhuahsanin a rawng a lo bawl thin, Lalpa hnenah a chawl ta. Hemi ni vek, chawhma 11:00 ah a chenna inah thlahna neih a ni a, Rev. R. Zohmingliana, Kohhran Chairman-in a kaihruai a, chhungkaw aiawhin Rev. Dr. B. Lalramhluna’n thu a sawi.
Chawhnu dar 01:00-ah Mizoram Baptist Kohhran Biak In, Zotlang North-ah vuina inkhawm neihpui a ni a, Rev. Joseph Vanlalruata, Bialtu Pastor-in inkhawm kaihruaiin, General Secretary Rev. R. Lalbiakliana’n vui in, thlamuanna thuchah bakah amah uina leh sunna thu a sawi nghal a, Upa Dr. B. Laldinliana’n Chhungkaw aiawhin thu a sawi bakah, Tualchhung Kohhran aiawhin - Upa Thanzinga Sailo, Secretary BCM Zotlang North - in thu a sawi bawk. Vuina inkhawm ah hian Upa R. Lalsawia leh Upa RL Thianghlima ten Bible chhiarin Zotlang North Kohhran zaipawl ten fakna hla an rem a. Pastor te leh Upa leh rawngbawltuten a kuang chungah pangpar dahin an thlah hnu in, Malsawm tawngtaina in Vuina inkhawm khar a ni a. Hemi hnu hian Zotlang Thlanmualah ropui taka thlah liam a ni ta a ni.
Rev. B. Thangchina hi April 20, 1940 khan Bualpui(H) ah a piang a. A pa Pu B. Thawngduna ni in, a nu hi Pi H. Tialhliangi a ni. Kum 1962 ah K. Zonawni nen inneiin fapa 3 leh fanu 3 an nei a, an fate hi Kohhran leh khawtlang tana mi tangkai tak tak niin, Dr. B. Laldinliana (MS-Christian Hospital) leh Rev. Dr. B. Lalramhluna (Asst.Professor, AICS) te chu Kohhrana hun puma rawngbawla thawk mek an ni.
