Mizoram Baptist Kohhran Pastor, Pension thlenga thawk leh BCM General Seceratry hna lo chelh tawh - Rev. Dr. F. Hrangkhuma chu March 26, 2022 khan Bangalore –ah a boral a. A ruang hi March 31 (Ningani) khan Mizoram phurh thlen a ni a, Lengpui Airport ah kohhran hoten lo hmuakin, thlahna hun tawi hman a nih hnu ah, AICS Tanhril panpui a ni a, Pastor Thanzinga Chapel, AICS-ah thlahna Inkhawm neih a nih hnu ah Lunglei, Serkawn panpuiin, Serkawn-ah hian  Pu  R. Saichhunga (L) inah nghah a ni a, April 1, 2022 (Zirtawpni) chhun dar 12:00-ah BCM Biak In, Serkawn-ah Vuina Inkhawm neihpuiin, Serkawn Thlanmual-ah ropui taka thlah liam a ni.

Biak In lama Vuina inkhawm hi Upa K. Lalnuntluanga'n a kaihruai a, BCM President, Rev. Dr. R. Zolawma'n vuiin, BCM aiawh-in General Secertary Rev. F. Ramdinmawia'n thu a sawi a, Tualchhung Kohhran aiawh, Chhungkaw aiawh,  AICS aiawh leh Bangalore Mizo Chriatian Fellowship aiawh ten thu an sawi bawk.

Biak in lama vuina inkhawm hman a nih hnu hian, Serkawn thlanmual panpui a ni a, thlanmual ah hian Upa. C. Lalzarmawia'n tawngtaina hun hmangin Rev. Dr. F. Hrangkuma lei taksa chu thlahliam a ni ta a ni.

BCM chuan Thahnem ngai taka Lalpa rawng a lo bawl tawhna te hre rengin a rawngbawlna avanga lawmthu sawi chungin, ui leh zah takin a thlah liam ta a ni.

………………

Rev. Dr.  F.  Hrângkhûma chanchin tlangpui

Rev. Dr. F. Hrângkhûma hi Fanai hnam a ni a, ft 5.6”-a sâng a ni, June 30, 1941-ah Dârzo khuaah a  piang a. A pa chu Sawikûnga a ni a, a nu chu Dârchawngpuii a ni. An unau mipa 9 leh hmeichhe 2 an ni a, a naupang ber dawttu a ni. Kum 1956-ah Dârzo khuaah Rev. F. Aihrânga kut-ah Baptisma a chang a. December 25, 1966-ah V. Chhâwnkimi nên S.Vânlaiphai BCM Biak inah an innei a, Rev. F. Aihrângan a invawntîr.  Pi V. Chhawnkimi nen hian fanu pali an nei, chungte chu:-

1. Ma-i Lalhmingsiami
2. Kriystalin Laltlansangi
3. Nocole Lalthanpuii
4. Toni Lalhmangaihzuali

A lehkha zir dân leh a zirna hmunte: 1967    -           B.A, Shillong St Anthony College. 1971    -           B.D, Union Biblical Seminary, Yavatmal. 1976    -           M.Th, United Theo. College, Bangalore. 1987    -           Ph.D. Inter-Cultural Studies, Fuller Theological Seminary, Pasadenia, USA.

Pathian thu a zir hmain  Transport Commissioner Office, Shillong-ah LDC hna a thawk a, Shillong a chhuahsan hnuah S. Vanlaiphai High School-ah  zirtîrtu hna a thawk a, Nagaland Baptist Mission School  Asst. Headmaster hna a thawk tawh bawk.

Rawngbawl hna a chelh tawhte leh a thawhna  hmunte: 1971   - Pro. Pastor- Phâwngpui Bial, Vârtek 1973   - Lunglei Venglai Assembly-ah Minister atan Rev. C.L. Hmingan a Ordained. 1973-1944       - U.B.S, Yavatmal & Pune. 1994-1998       - Serampore College, Serampore 1998-2001       - General Secretary, BCM 2001-2008       - SAIACS, Bangalore. 2006-2008       - Principal, SAIACS, Bangalore. 2008-2029       - Furlough, Fuller Pasadena, CA 2008-2010    -  Professor, SAIACS 2010-2012       - Professor, SAIACS/Director SIM A lehkhabu ziak te:

• • Hruaitu Puitu (1975)
  • Effective Christian Leadership (1980)
  • Umzui Rawngbawlna (1981
  • Missionary Puitu
  • An Introduction to Church History (1997)
  • Chanchinṭha Matthaia Ziak Hrilhfiahna (2001)
  • Christianity in India: An Introduction (2017)

Heng bakah hian Christian Book leh Magazine ah te Editor leh Author niin lehkhabu engemawzat a ti chhuakin a edit a ni.

Rev. F. Hrângkhûma hian Mizoram chhûngah Pastor hna kum 2 leh thla 5  a thawk hman chauh a ni. Union Biblical Seminary a zirtîr tûrin an rawn sâwm a, Ordained a nih hnuin chu hna chu a zawm ta a. Kum 1998-ah BCM General Secretary-a thlan a ni a, chu hna chu term 1 (kum 3) chhung a chelh a. Chumi bâk chu Mizoram pâwna Institution hrang hrangah zirtîrna hna a thawk ta a ni.

Pathian rawngbâwl hi nuam a ti a. Pathianin a rawngbâwla a ko ve hi an nupain lâwmawm an ti a. 2001 kuma pension-a an  chhuah hnuah SAIACS-ah zirtirtu atan sawm a ni a, SAIACS ah hian Professor leh Principal hna te chelhin, kum 2012  thleng a thawk a ni.