Rev. Pc.Lalsanglura, Bialtu Pastor, Hrangchalkawn Pastor Bial chu October 11, 2023 (Nilaini) zan dar 8:45 khan, Stroke avangin Chatuan ram min pan san ta. Rev. Pc.Lalsanglura hi October 12, 2023 - chawhhnu dar 01:00 ah BCM Biak In, Central Church, Aizawl-ah vuina Inkhawm neihpuiin, Venghlui thlanmualah ropui taka thlahliam a ni.
Biak In lama Vuina inkhawm tan hma hian In lamah thlahna hunserh tawi hman a ni a. Rev. K. Lalnunsanga, Bialtu pastor-in hun kaihruaiin, chhungkaw aiawh leh mi hrang hrang thusawi te ngaihthlak a ni a, tawngtaina-in a thlah a ni.
Biak In-a Vuina Inkhawm hi Rev. R. Lalrintluanga, Executive Secreatry-in kaihruaiin, BCM aiawhin Rev. Vanlalmuankima, Director, Pastoral Ministry Department-in a rawngbawlna chanchin a sawi a, Upa F. Aikunga, Chairman, BCM Central Church leh Upa Laltlanhlua Zathang, Secretary, BCM Central Church ten Pathianthu chhiarin, Rev. R. Lalbiakliana, General Secretary, BCM-in thuchah a sawi a. BCM Central Church Zaipawl ten fakna hla sa-in Rev. C. Lalhungliana, Aizawl Area Development Committee Chairman-in Malsawm tawngtaiin vui Inkhawm a khar ta a ni.
Rev. Pc.Lalsanglura vuinaah hian a kuang chungah BCM Assembly aiawh te, BCM thawktute aiawh te bakah Pastor te leh Kohhran Upa leh Rawngbawltute, bakah Pawl hrang hrang aiawh ten pangpar an dah a. Vui inkhawm banah thla lakpuina neih a nih hnuah, Venghlui thlanmualah Upa C. Lalropuia, Secretary, BCM Venghluiin tawngtaiin a thlah liam ta a ni.
Rev. Pc.Lalsanglura thihna hian Mizoram Baptist Kohhran pumpui a fan chhuak nghal a, a chanchin hria apiangin an lainatin an sun takzet a a ni. BCM chuan Thahnem ngai taka rawng a lo bawl tawhna te hre rengin a rawngbawlna avanga lawmthu sawi chungin ui leh zah takin thlah liam ta a ni. A kalsan, a nupui fanau te, a chhung te leh a rawngbawlpui zawng zawng te Lalpa’n thlamuanin awmpui zel rawh se.
A chanchin tlangpui
Rev. Pc Lalsanglura hi September 15, 1972-ah Reiek-ah piangin Upa Pc. Ramliana leh Pi Laldangliani te fa pasarih zinga a upa lam atanga pathumna a ni a, a u naute hi mipa panga leh hmeichhia 2 an ni. Kum 1997-ah Laldinthari nen W.Phaileng-ah an innei a, fapa pahnih leh fanu 1 an nei a ni.
Kum 1991-ah Piantharna changin, hun puma Pathian rawngbawl turin a inpe a. A pian thar kum hian Filadelfia Bible College (FBC), Udaipur Rajasthan ah B.Min a zir a. Kum 1997 ah Filadelfia Bible College, Udaipur Rajasthan ah tho M.Div a zir zo leh a ni. Kum 1997-ah I.K.K Assembly-ah Minister atan nemngheh a ni.
Kum 2007 –ah BCM-ah lutin Champhai Pastor Bialah, pastor puitu atan dah a ni a. Kum 2008-ah Pastor puitlingah lakluh a ni. BCM-a a awm hnu hian Champhai Bial, Sakawrdai Bial, Phuldungsei Bial, Cherhlun Bial leh Thingfal Bial-ah te awm tawhin, 2023 April thla atangin tuna a bial enkawl mek Hrangchalkawn Bial-ah a thihni thlengin a awm ta a ni.
Lawmin nakinah kan intawk ang,
Van angel var rual zawng zawngte nen,
Lungngaihna rama rumna zawng hi,
Kan Lalpa hmaah lawmna hla tur.
.............................
Watch:
Rev. PC Lalsanglura Vuina Programme (Live)
