Mizoram Baptist Kohhran, Pastoral Ministry-a Pension thlenga thawk, Rev. R. Lalchamliana, chu June 25, 2021 tlai dar 5:10 khan, an chenna In, Zotlang, Lunglei-ah Chatuan ram min pan san ta. Rev. R. Lalchamliana ruang hi zanah tlaivarpui niin, a tuk, June 26, 2021 (Inrinni) chawhma dar 10:00-ah In lamah thlahna neiin, chhun dar 12:00-ah BCM Biak In, Zotlang North-ah Vuina Inkhawm neihpuiin, Zotlang Thlanmual-ah ui tak chungin thlahliam a ni.

Biak In lama vui Inkhawm tan hma hian In lamah thlahna hun serh tawi hmangin Upa R. Lalduhan  a kai hruai a, a fanu upa ber, Pi R. Zomuanpuii leh Upa KMS Dawngliana ten a chanchin tlangpui sawiin  Rev. B. Lalrinawm-an tawngtaisakna leh malsawmna-in a thlah.

Biak In lama Vuina inkhawm hi Upa RL Thianghlima’n a kaihruai a, BCM aiawh-in Rev. F. Ramdinmawia, General Secretary, Tualchhung Kohhran aiawh Upa Thanzinga Sailo, Secretary, BCM Zotlang North leh BSI aiawh Rev, Pc Liandula, Vice President, BSI Lunglei North Branch ten thu an sawi bawk. Pro.Pastor Lalhlimpuia Khiangte leh Upa V. Raldotluanga ten Bible an chhiar a,  Kohhran leh Pawl aiawh bakah Minister te leh Zotlang North, Tualchhung Kohhran Committee member ten a kuangah zahna pangpar an dah hnuah Rev. R. Lalbiakliana, AGS (Service)-in Rev.R.Lalchamliana rawngbawlna avanga Pathian hnena lawmthu sawina leh Chhungkaw tana tawngtaisakna a nei bawk. Rev. V. Vanlalchhunga, Bialtu Pastor, Zotlang Pastor Bial-in vuiin, thuchah a sawi zawhah, Rev. Lalthangliana Hnamte-in Malsawm tawngtaiin Vuina Inkhawm a khar ta a ni.

Inkhawm banah Biak In chhungah thla lakpui niin Thlanmualah kalpui nghal a ni a. Thlanah hian Rbt. R. Lalchhandama’n tawngtaiin a thlah liam ta a ni.

Rev. R. Lalchamliana thihna hian Mizoram Baptist Kohhran pumpui a fan chhuak a, a chanchin hria apiangin an uiin, an sun takzet a.  BCM chuan Thahnem ngai taka Lalpa rawng a lo bawl tawhna te hre rengin a rawngbawlna avanga lawmthu sawi chungin, ui leh zah takin thlah liam ta a ni. A kalsan, a nupui  leh fate, an chhung te leh a rawngbawlpui zawng zawng te Lalpa’n thlamuanin awmpui zel rawh se.

“A mi thianghlim thihna chu LALPA ngaih chuan hlu tak a ni”

........................

REV.R. LALCHAMLIANA  CHANCHIN TLANGPUI

Rev. R. Lalchamliana hi October 24.1948 khan Tlabungah Zosiama (s/o Rev Zathanga) leh Z.D.Liantluangi te inkarah Tlabungah a piang a, unau paruk zinga naupang ber dawttu a ni. An unau  upat dan indawt hetiang hi a ni:- 1. R.Hranghmingthanga (L) h/o Lalramthangi, Zotlang 2. R.Lalthlamuani w/o K.L.Rokhuma (L) Zotlang 3. R.Lalengzami w/o R.Lalsawia, Zotlang 4. R.Lalrochami(Senpuii),Zotlang 5. R. Lalchamliana H/o C. Lalmuanawmi, Zotlang 6. R. Zochami (L) w/o C.Zohranga (L) Zotlang

Kum 1964, November 15 ah ah Rev. K.T.Chungnunga’n Baptisma a chantir a, Kum 1980 ah Salvation Camping ah kalin a damchhunga Isua zui tur leh a rawngbawl turin a inpe ta a ni.

Pi F. Zobuki nen inneiin, fanu 3 leh fapa pakhat an nei a, Pi F. Zobuki chuan vanduaithlak takin October.7.2001 ah Chatuan ram pan sanin, October 24, 2007-ah C. Lalmuanawmi nen an innei a, a ni nen hian fapa pakhat an nei a ni. A fate chu:-

1. Zomuanpuii w/o K.Lalawmpuia, Serkawn 2. Lalnunpuii w/o Lalfakawma, Bazarveng Lunglei 3. Lalthakimi (Maseni) w/o Laltanpuia, Pukpui 4. Zomawia 5. Zothanpuia ZIRNA LAM

Zirna lamah Primary School hi Zotlang-ah kalin, MiddleSchool, chu Serkawn Midle School-ah a chhuak leh a,  Kristian High School Serkawn atangin Matric a passed hnu-ah Lunglei leh Shillong  lamah College a kal leh a. Pathian rawngbawlna atan in buatsaih zelin, kum 1981-1984 –ah Serampore College ah BD zirin tha takin a zo a, BCM Pastoral Department a lut chhovin, 1996 -1998 –ah Eastern Theological College, Jorhat-ah M.Th (Theology) a zirin tha takin a zo veleh ta a ni.

RAWNGBAWLNA

BCM Pastoral Ministry-a a luh hma hian LDC leh High School zirtirtu hna te a thawk a, BD a zawh hnuah 1984 Pastoral Ministry-ah lutin, 1984-1987 –ah Hnahthial leh Zotlang Bial, Lunglei-ah Pro. Pastor-in a awm a. March 8, 1987 BCM Assembly-ah Rev.Dr.C.L.Hminga’n a ordain a ni.  Ordain a nih atanga a pension thlenga Pastor Bial a enkawl leh a hna chelh te hengte hi a ni:

Kum 1988 – 1992 Lungchem Pastor Bial 1992-1999 -MTKP Secretary 1999-2002- Pangzawl Pastor Bial 2002-2004- Director, Christian Education Department 2004 -2007 Director, Communication Deptt. 2007-2008 Chaplain, Christian Hospital Serkawn 2008-2010 LawngtlaiEast Pastor Bial 2010 - 2013 Director, Communication Deptt. 2013-2015 Bazar Pastor Bial, Lunglei Rawngbawlna dang: 1984-1985 ah Hnahthial Pastor Bial ah Bial Chairman 1986-1987 Secretary, Lunglei North, Area Baptist Council Lehkhabu ziak: i)Itawngtai ang u ii)Thuhriltu bu hrilhfiahna. Kum 2005Senior B zirlai Heng bakah hian Seminar Paper leh Sunday School Training paper tam tak a ziak bawk. A mizia:

Rev.R. Lalchamliana hi fiamthu duh, nun tlang, thil vei ren run engmah nei lo, midang nunin a tihbuai phak loh leh mi hriat thiamna ngah tak a ni a.Kum upa lam bakah thalai lam, biak in thleng pha lo te thlenga ngainat pawh a hlawh hle a ni. Rawngbawlna lama a tuina te chu evangelism te teaching (Christian Education) leh Home visit te a ni. Natna khuma a awm lai pawhin a dam leh huna a tihtur a sawi pakhat chu kan khawtlang a in hrang hrangaha rawngbawl a ni.

Bible chang ngainat zual te : Sam 73:23-28

Nimahsela i hnenah ka awm fo va; ka kut ding lam hi i lo chelh thin a. Nangin i remruatnain mi hruai ang a, chu mi hnuah chuan ropuinaah khian mi lawm ang. Van ah khian nanglo chu tu nge ka neih? Leiah pawh hian nang lo chu ka duh tumah an awm lo. Ka tisa leh ka thinlung hi a chau ta a, nimahsela Pathian chu kumkhuaa ka thinlung chakna tur lehka chanvo tur a ni. Ngai teh, nangmah hlat a awmte chu an  boral dawn si a. A uiresantu apiang che chu i tiboral ta a. Kei atan erawh zawng Pathian hnaih hi a tha a ni. Lalpa Pathian chu ka inhumhimna an ka hmang a. I  hnathawh zawng zawng thu chu ka hrilh theih nan.

Kolosa 3:1-4

Chuti chuan Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awm te chu zawng rawh u. Chung lama thil awmah te chuan in rilru nghat tlat rawh u, leia thil awmahte chuan nghat lovin. In thi tawh a, in nunna chu Pathianah chuan Krista hnenah thuhrukin a awm si a.

Hla duh zawng :          KHB No.203 - “A saw raltiang tlangah” KHB No.380 -  “Damchhungin i thawk thuai ang u”.   A NAT DAN

November 2019 thla tir ah ke na a hre tan a, a theih ang anga in enkawl chhovin dam leh mai turah an ngai a. Mahse, beisei anga a dam mai loh avangin uluk zawk a check a ni a.  November 11.2019 ah chuap Cancer a ni tih hriat a ni a, chemo leh radiation te ti nghal in, Christian Hospital Serkawn leh Civil Hospital Lunglei a Doctor leh Nurse te chuan theihtawp chhuahin anenkawla, an chungah kan lawm tak zeta ni.

A mah pawh a ding chung viau a, zing tawngtai inkhawm ah pawh a kal ve thei a. Mahse, a natna chuan zawi zawiin zual lam a pan zel a March 2021 thla tawp lam atang chuan nachhawkna chakchi (morphine) nena enkawl hial a ngai ta a. Damdawiin ah pawh a lut ta zeuh zeuh a. Hma erawh a sawn lutuk thei lo. Natna khuma a awm lai hian Pathian nen inpawlna hlimawm tak an nei thin a. Vanram te fangin, a nawm zia te a sawi a ni.

Rawngbawlna ah a induh khawp lovin, tlinglo a inti em em a, ‘William Carey, Pathian tana mi ropui pawhin a thih dawn hnaih khan Pathian hmaah chuan Changpat ang mai ka ni a lo ti a. Kei Pastor satliah ve mai hi, Pathian hmaah hian eng tak ni ve ang maw tih ka ngaihtuah thin,’ tiin a tlinloh zia a sawi a ni.

June 25.2021 tlai dar 5:10 ah a rawng a bawl thin Lalpa hnenah chatuan-a chawl hahdamturin min lo haw san ta a ni.