Mizoram Baptist Kohhran hnuaia Pastor hna leh Missionary hna Pension thlenga thawk tawh, Rev. Vanlalhruaia – Non-Mizo Pastor ti-a kan hriat lar thin chuan August 20, 2024, zing lam dar 3:15 khan kum 79 mi niin chatuan ram min pan san ta. Hemi ni vek hian BCM Biak In, Bazar Veng, Lunglei-ah vuina inkhawm neiin Bazar Veng thlanmualah ropui taka thlah liam a ni.
Chawhma dar 11:30-ah a chenna In lamah thlahna hunserh tawi hman a ni a, chawhnu dar 1:00 ah Biak In-a Vuina Inkhawm neiin, Upa C. Hrangdula, Chairman BCM Bazar Veng-in Inkhawm a kaihruai a, Tualchhung Kohhran aiawh pahnih Upa C. Zairemthanga leh Upa S Vanlalnunga ten Bible chhiarin, Upa Biakchungnunga, Secertary, BCM Bazar Veng-in a chanchin tlangpui a sawi a, chhungkaw aiawhin a fapa Rev. Israel Lalremtluanga’n thu a sawi bawk.
Vuina inkhawmah hian Bazar Veng Kohhran Zaipawl leh Baptist Mashihi zaipawl ten hla an rem a, Rev. K. Lalbiakchhawna, Bialtu Pastor-in thuchah sawiin, Rev. H. Lianngaia’n malsawm tawngtaiin inkhawm a ti tawp ta a ni. Inkhawm banah Pastor te leh BCM Bazar Veng Upa leh rawngbawltu ten thla an lakpui a, Bazar Veng Thlanmualah thlahliam a ni ta a ni.
Rev. Vanlalhruaia hi 28th August, 1946 ah Prabhakar leh Shanti te inkara fa pali (4) zinga pahnihna ni in Mumbai (Bombay) ah a piang a. Puithiam (Brahmin) chhungku-ah piangin a seilian a ni. Puithiam hnam ni mahse mahni ke a din tumin kum 18 chauh a nih laiin mahni in leh lo chhuahsanin Gujarat lamah a awm a. A tum anga thil a kalloh avangin Sipai (Indian Military Force) a zawm ta a, Army Medical Corp a thawk ta a ni. Mizoram buai laiin Lungsenah a hna chu a zawm ta a, hetah hian a nupui Pi Vansiami nen intawngin 16th January, 1969 ah Ringtu Baptisma a chang a, 17th January, 1969 khan BCM Lungsen Biak Inah Rev. Sialngena'n a invawn tir a ni.
An fate chu:-
1. Vanlalthlengliani W/o Upa C. Hmingliana, Bazar Veng, Lli
2. Lalbiakengi W/o B. Laltlanzauva, Birpara, West Bengal Field
3. Rev. Israel Lalremtluanga H/o Zolianpuii Chawngthu,
4. DS. Lalhmahruaia, H/o Ruati, Lawngtlai Bazar Veng.
5. Joseph Lalramthara H/o T. Lalruatfeli, Bazar Veng Lunglei
6. Lalrinzuala H/o Bernadette Zohlupuii, Chaltlang Lily Veng, Aizawl
Heng an fate kaltlang hian Pathianin tu 11 lai a pe bawk a ni.
A rawngbawlna
Rev. Vanlalhruaia hian a pianthar tirh atangin Pathian rawngbawl chu a damchhung hun hman atan a lo thlang tawh a, chumi tihlawhtling tur chuan a hnathawh lai chu a bansan ta a. ATC ah 1974 atangin Pathian thu zirin 21st April, 1978 ah BCM Pastor atan lak niin kum thum chhung Probation hun a hmang a, BCM Assembly 1981 ah Minister atan nemngheh (Ordain) a ni.
1978 ah Pro. Pastor hna zawmin BSSUM (Sunday School lam buaipuitu) ah hna a thawk nghal a ni. 17 September, 1978 ah BCM Bazar Pastor Bial ah Rev. Dr. HS Luaia kaihhruaina hnuai ah Pro. Pastor hna a thawk a ni. 17th Dec, 1978 ah khan Maharashtra (Korku Field) ah BCM Missionary kal hmasa ber niin chhungkuain an chhuk a, 1994 ah Non-Mizo Evangelism (Tun hnua Baptist Masihi Mission) enkawl turin an rawn chhuak chho a, a pension (31st Aug, 2011) thlengin Pastor In-charge Non-Mizo Evangelism hna hi a thawk a ni. Pastor hna thawk tura kohhranin a lak ni mahse kum 33 a service chhungin kum 32 zet Missionary hna thawkin mi thahnem tak Lal Isua ke bulah a hruai hman a ni.
A natna leh a hun hnuhnung lam
Pathian khawngaihna avangin Rev. Vanlalhruaia hi mi hrisel ve tak a ni thin a. Lirthei a chuanna ah vawi 2 accident a tawk a, chumi tih lo ah chuan damdawi In-a enkawl ngai khawpin a damlo ngai meuh lo. Kum 2011ah khan a nupui chuan lung lam natna avangin Aizawl ah enkawl a mamawh a, chumi enkawl tura Aizawl lama an awm laiin Heart Attack neiin Pathian khawngaihna avangin nunna em a chân lo a ni. Chuta tang chuan a khat tawkin Kolkata ah te, Aizawl lamah te inenkawl turin hruai a ni ta fo mai.
Kum 2018 khan thih ngamin a chau a, a dam that leh beiseiawm loh khawpin damdawi In-ah a awm hial a, a chhungte pawhin rei tak dampui turin an tawngtai ngam lova, a kum leh mai 2019 an inneih Golden Jubilee thleng tal dam hram turin Pathian hnenah an thlen a ni. Pathianin Kohhran hote leh amah hmangaihtute tawngtaina chhangin January 17, 2019 khan dam tha takin Inneih Golden Jubilee chu an hmang thei a ni.
Kum 2020 chawhma lama Aizawla a in entir leh bak kha chu Lunglei a chhuahsan thei ta meuh lova, hetih mek lai hian a nupui Pi Vansiami chuan rin loh takin August 10, 2020 ah chatuan ram a pansan ta mai si a, a hriselna a that loh bakah nupui a han sun leh ta chu a tuar hle a, a hriselna pawh a nghawng phah hial a ni. Lung lam harsatna nei a nih avangin he natnain a kaihnawih natna dang hrang hrang chuan a tihbuai chho ta zel a, damdawiin tih loh chu pawn a chhuak meuh tawh lo, May 1, 2022 a BCM Bazar kohhran Platinum Jubilee lungphun hawng tura Biak In-a a kal bak kha chu Biak In pawh a thleng zo ta meuh lo a ni.
May 31, 2024 khan a chauh zual deuh avangin zanah Christian Hospital Serkawn- ah entir niin admit nghal a ni a, hemi zan atang hian ngai a awh zo ta meuh lova, that ve leh deuh chang nei mahse a bet ta tial tial a ni. July 23, 2024 khan in lama enkawl zui turin damdawiin atangin hruai haw a ni a, chutah chuan a ngaihtuahna te a la fimin, a tu leh fate pawh a la be thei vek a ni. Beiseina sang tak nen enkawl chhoh zel a nih laiin August 12, 2024 khan Internal Bleeding a nei ta tlat mai a, a chauh pui em avangin damdawiinah enkawl a ni leh ta a, Doctor leh Nurse ten hmangaih takin theih tawp chhuah mahse, August 20, 2024 zing lam dar 3:15 khan rawng a bawlsak thin Lalpa hnenah a chawl ta a ni.
Rev. Vanlalhruaia thihna hian Mizoram Baptist Kohhran pumpui a fan chhuak nghal a, BCM chuan Thahnem ngai taka rawng a lo bawl tawhna te hre rengin a rawngbawlna avanga lawmthu sawi chungin, ui leh zah takin thlah liam ta a ni. A kalsan, a tu leh fa te, a chhung te leh a rawngbawlpui zawng zawng, Lalpa’n thlamuanin awmpui zel rawh se.
Rev. Vanlalhruaia chanchin ngaihnawm tak hrechiang lehzual duh tan amah kawmna hi a hnuaia links tarlan - BCM Khawnvar Channel-ah en theih a ni e.
Khawnvar : Bihchianna (Rev. Vanhlalhruaia)
