Rev.H. Killuiaia Kum 87- chu July 11, 2025 (zirtawpni) zinglam Dar 1:00 khan Trinity Hospital, Aizawlah a boral.
Rev.H. Killuaia hi August 20,1939-ah Chawnhu khuaah a pianga, a pa hi Mangsaia a ni a, A nu hi Lawngdawhi a ni. Unau Mipa 13 leh Hmeichhia 3 an ni a, Rev. H. Killuiaia hi Unau 16 zinga Pakua na a ni. A naupan lai aţanga naupang chak leh hrisel, huaisen tak, a thil tih tum tawh chu hlawhtlin ngei ngei tum mi a ni.
April 22, 1969-ah Chhunkimi nen Godomoni Christ Church Dibrugar-ah inneiin, Fa pathum an nei a ni.
Zirnalamah Matric thleng kalin he mi hnu hian Kum 1960-1965-ah Lawngtlai Middle School-ah zirtirtu a ni a, Kum 1963 September thlaah chhandam nih inhriatna neiin, He mi kum vek hian rawngbawl tura kohna a dawnga, Kum 1964-ah Chawnhu-ah rawngbawltu atan lak a ni. Kum 1965-ah Bangladesh (E.Pakistan) Mire ramah Ramthim Board, Lawngtlai tirhin a kal a. heta rawngbawlna a neih chhung hian Passport / visa a neih loh avangin sawrkarin an man a Kum hnih chhung Comilla Central Jail-a a tan hnuin kum 1967-ah a rawn chhuak a.
A tan chhung hian rawngbawlna chawlhsan tum mai lovin thlaraubo veina chu anei lian zawk emaw tih turin a awm a, Kum 1968-1972-ah rawngbawlna zau zawk zawh theih turin L.Th ziriin Jorhat-ah a awma, hetah hian Kohhran Upaa thlan a ni nghe nghe.
Kum 1968 – 1972 - L.Th ETC, Jorhat
Kum 1986 - B.Th ETC, Jorhat
Kum 1987-1989 - BD. ETC, Jorhat
A RAWNGBAWLNA: June 1, 1972-ah Pro Pastor a ni ţan a. 7th March 1975-ah Rev KT. Chungnunga’n Ebenezer Kohhran Biak In, Zobawk-ah Pastor atan a nemnghet a. Pastor hna a thawh chhungin Ṭawipui Bial, Phawngpui Bial, Chawngte Bial, Vaseitlang Bial leh Theiriat Bial-ah te a awm a ni. Principal, Jubilee Bible School Serkawn, Principal, Missionary Training Institute Serkawn, Chaplain (Christian Hospital Serkawn, Lunglei Civil Hospital leh District Jail Sazaikawn) hna te a chelh hman bawk.
Ṭawngţai mi a ni: A pension hnuah Nehemia Prayer Mountain, Tlawng hnar, Zobawk ami hi harsatna tam tak paltlangin a sual chhuak a ni. Hla 80 chuang phuahin, “Lalpa min ţawngtai tir rawh” “Indona” “Tho la, Lalpa hnenah ţawngţai rawh” “Chhun zanin ţawngtai rawh” tih leh Zoram dung leh vanga Pathianin a hman tak tak hla a nei nual a ni. Lehkha ziakmi a ni a, lehkhabu 33 a ziak hman a ni.
Rev. H. Killuiai hian Kohhran leh khawtlangah rawngbawl Chanvo pawimawh tak tak engemawzat chelh tawhin Award pawh vawitam tak a lo dawng tawh bawk a ni. February 9. 2023 khan World peace Institute of United Nations a tangin Doctor of Divinity (DD) a hmu a, April 26, 2023 ah khan South Asia Theological Seminary Bengaluru a tangin Doctor of Ministry( D.Min) a dawng leh bawk.
A HUN TAWP LAM
June 5, 2025 a zan zung tur a che suala, a tukah Christian Hospital Serkawn-ah admit a ni a. A thaw a hah tak telh telh avangin englai pawhin oxygen hip a ngai a, Hma a sawn theih lutuk loh avangin 13th June, 2025 khan Helicopter-in Aizawl panpui a ni a, Ebenezer Hospital-ah admit nghal a ni a. A natnain zual lam a pan zel avangin a chuapa harsatna awm chhan hriatchhuah theih beiseiin ZMC Falkawnah June 30th, 2025 khan an insawn phei leh a. Bronchoscopy hmanga a chuap dawt vel te en in sample te lak a ni a. 10th July, 2025 khan nidang aiin a chau zual a, ZMC lamah ICU ruak a awm mai loh avangin, tlai dar 4:00 vel khan Trinity Hospital ICU ah dahluh leh a ni a. Zan dar 8:00 velah zia awm lam a pan theih loh avangin Ventilator vuah a ni a. Beiseina sang tak nen kohhran leh mimal te’n Pathian hnenah a damna dila kan kun lain, Damna hlen zawk turin July 11th, 2025 zinglam dar 1:00 khan kham lo taka rawng alo bawlsak ţhin hnenah chatuana chawl tawh turin min lo kal san ta a ni.
July 11th, 2025 chawhma Dar 11:00 khan a chenna in Chanmari, Lunglei-ah Thlahna hun hman a ni a, Upa Joseph H. Thanzuala’n a kai hruaia, Samuel Ramdinthara’n chhungkaw aiawhin thusawina a neih zawhin BCM Biak In Chanmari-ah Vuina inkhawm hman chhun zawm leh a ni.
Biak Inah hian Rev. V. Lalzarliana Biatu Pastor in vuina inkhawm a kai hruaia, Rev. R. Lalrintluanga AGS-Mission in a rawngbawlna chanchin sawiin, Chanmari standing choir te’n Rev. H. Killuaia thlahna hla sain, Rev. Vanlalmuankima AGS-Service in malsawmna in vuina inkhawm hi a ţin a ni.
Mizoram Baptist kohhran chuan Rev. H. Killuaia hi a uiin, BCM tan sulhnu tam tak a hnutchhiah tawhte thlirin, a kalsan tak a tu leh fate Pathian in thlamuana awmpui zel rawh se tih hi kan ţawngţaina a ni.
