BCM Relief & Development Department chuan tûn hnaia Rial avânga chênna In chhiate tanpui (Relief) a theih ang angin a sem mêk a. February 25, 2019 khan Samuksuri-a chênna In chhia chhûngkaw 22 te hnênah Rangva a pe a. A dawngtute an lâwm hle a ni. Hêng tanpuina hi BCM Charity Fund, Kohhran leh mi mal inpêkna tlingkhâwm atangin pêk a ni. Tuna tuma chhiartawkte tanpuina hi BCM R&D budget a tlem deuh avangin BCM Charity Fund atangin pek a ni a. BCM Relief and Development Department chuan Charity Fund atâna sum leh pai petute chungah lâwm thu sawiin, Kohhran leh mi mal inpêknate Lalpa’n kawng tamtakin mal a sâwm ngei an beisei thu an sawi a, Tunlaiin Thli leh rial avângin chhûngkaw tamtakin harsatna an tâwk mêk a. BCM chuan harsatna tawk te a tuarpui takzet thu a sawi bawk.
Khuarêl chhiatna lo thleng tam tak hi kan in dan theih loh leh kan pumpelh theih loh a awm laiin tamtak hi chu kan inrâlrin lâwk leh kan lo inpuahchah lâwk avângin chhiatna nasa lutuk tuar lovin a awm theih a. Tin, Khuarêl chhiatna avânga harsatna tamtak kan tawh thin thenkhat Thli, Leimin te leh mihring fimkhur tâwk lohna avânga Kângmei lo awm thînte kan pumpelh emaw kan tih tlêm zâwkna tûrin Kohhran mipuite pawh theihtâwpa kan fimkhur a pawimawh hle. Kan In leh Lo leh a vêla Kângmei chhuah thei lakah fimkhurin kan Electric Wiring te, kan Gas thuk leh Regulator te uluk takin check thîn ila. Loneitute pawhin Mei kawng uluk taka sialin, zial zu mi pawhin kan mei bung kan paih kawngah te tûn hma aiin fimkhur lehzual ila hei hian chhiatna lo thleng engemaw zât min pumpelhtîr ngei ang.
Tin, hunbi neia lo thleng thin Thli leh Ruah te avânga lei min leh chênna In chhiate kan tih nêp zâwk theihna tûrin mahni In bul tuihâwk luan kawr leh tui chhe paihnate uluk takin siam ila. Chhiatna tam tak kan pumpelh phah dâwn a ni.
