September 28-29,2024 khan Sakawrdai Pastor Bial chuan BCM Biak In, Zohmun-ah KNP Inkhawmpui an nei a, Speaker-ah Rev. H. Lalrammawia, Bialtu pastor niin, Inkhawmpui thupuiah I Samuela 15:12 thu tlawh chhanin “Thuawihna” tih thu hman a ni.

Inrinni-zanah Inkhawmpui tan ani a, Speaker hnen atangin thuchah tha tak ngaihthlak a ni a. Pathianni zing leh zanah te Inkhawmna neiin thuchah bakah Speal item hrang hrang ngaihthlak leh thlir ho a ni bawk. Hei bakah hian Pathianni chawhnu-ah Thu leh hla hmanga inelna leh Bible Quiz neih a ni bawk a ni.

Sakawrdai Pastor Bialah hian KNP Unit paruk – Ratu, Lungsum, New Vervek, Sakawrdai, Zohmun leh Mauchar Unit te an awm a, Bial pumah KNP member 180 vel an awm mek a ni.

Inkhawmpui tluang taka an hman zawh hnu-ah mahni khua theuh an thlen hnuin, Mauchar KNP te chu an motor hman Pickup-in  naupangte a thlah kual lain, an chuanna motor hi chesualin kopang a su a. Vanduaithlak takin KNP member Benjamin Lalrimawia(Kum-9) S/o Pu Lalsiamkima(Driver) chu a hmunah a boral nghal a. KNP member 5 bakah Driver leh a nupui te (an vaiin mi pasarih) in hliam an tuar a ni.

BCM General Secretary Rev. Dr. R. Lalbiakliana chuan Vanduaina tawk chhungkua te leh hliam tuarte hi BCM-in a tuarpui takzet thu sawiin, vanduaina tawka boral ta leh hliam tuarte kan na atan BCM hmingin cheng sing nga (Rs 50,000/-) pek turin ruahman a nih thu a sawi a. Fellowship Deparmtent Director Rev. ZD. Rodingliana leh KNP Promoter Nl. K. Lalramthianghlimi te pawhin Lusun chhungte an tawrhpui thu leh hliam tuarte an lo dam leh thuai theih nan duhsakna hlanin an tawngtaipui reng thu an sawi bawk.