Indian ram sorkar hnuaia Tuihna humhalh kawnga hma latu, Ministry of Jal Shakti (Department of Water Resources) chuan BMS Missionary- Sap Upa leh Pu Buanga ten an siam, Saptui, Serkawn, Lunglei ami chu India rama tuihna humhalh leh enkawl tha leh tlo 75 a thlan zingah a telh a. Hemi chungchang tarlanna leh Water Heritage Forthnight kharna Inkhawm hi Saptui, Serkawn-ah November 30 zing dar 7:30 khan neih a ni.
Serkawn Local Council te kaihhruaina in he inkhawm tawi hi neih a ni a, Pi Ramdinliani, IAS, Deputy Commissioner, Lunglei chu khuallian niin, Er. K. Zohmingliana, SE, PHED, Lunglei WATSAN Circle-in Saptui water heritage atana thlan a nih dan report pe-in, Rev. R. Lalnunzira, AGS – Service in Saptui zosap missionary ten an siam dan leh vawiin thlenga enkawl a nih dan a tarlang. He hun ah hian Sorkar lam mi pawimawh te, Serkawn Khawtlang hruaitute, BCM Headquarters hruaitute leh Serkawn khawtlang hruaitu engemawzat an tel a ni.
Saptui hi kum 1903-a Sap Upa leh Pu Buanga ten Serkawn-a awmhmun an khuar tan tirh atangin tui tlan berah an nei nghal a. Kum 1907-ah BMS atanga tanpuina cheng 150 sengin Tuikhur chu pindan pathum-a in thlifim tur leh, a In pawh Lungrem leh RCC –in an sak hnan a, kum 1920-ah BMS atanga tanpuina pawisa cheng 350 hmangin chei leh thuam that a ni leh a, hemi hnu hian BCM leh Serkawn khawtlang in a tul angin an chei chhunzawm zel a, tun thlengin he tuikhur hi khawtlang mipui te hman theih leh chhawr theihin tangkai takin a la awm a, Serkawn Khawtlang leh BCM Property Department in an enkawl mek a ni.
