April 15 – 18, 2022 khan Serving In Mission (SIM) hruaitu ten Mizoram Baptist Kohhran rawn tlawhin BCM Hruaitute nen inkawmhona leh Tualchhung Kohhran hrang hrang tlawhin hun an hmang.
SIM hruaitute hi Dr. Joshua Bogunjoko, SIM International Director hovin an rawn kal a, Dr. Joshua nupui Dr. Joana te, Pi Christabel Khiangte , SIM Relationship Development Director te, Watson Rajaratnam, Regional Director, SIM East Asia te, Hegui Hiakie, SIM North East India Director leh Rev. Tlohnei Fachai, SIM North East India Deputy Director te an ni.
Inrinni chawhma dar 11:00 ah BCM Headquarters Office-ah BCM Hruaitute nen inkawmhona an nei a. He Inkawmhona hi Rev. Dr. R. Zolawma, BCM President-in a kaihruai a, BCM hruaitute hmelhriattirna te neiin, BCM dinhmun tlangpui report tawi a sawi a. SIM International Director Dr. Joshua pawhin SIM hruaitu lo kal te inhmelhriattirna neiin, SIM rawngbawlna report tlangpui a pe bawk. Hemi hnu hian SIM leh BCM thawhhona chungchang leh rawngbawl ho zel dan tur te sawihovin inkawmna tha tak an nei. 
SIM hotute hi Serkawn an cham chhungin tualchhung kohhran hrang hrangah inkhawmpui an ni a, Pathianni (Easter Sunday) zing inkhawm-ah Kohhran pathum - Chanmari, Venglai leh Ramzotlang -ah te inthen darhin hun an hmang a, Zan lamah Kohhran pahnih Serkawn leh Farm Veng Kohhranah te inthen-in hun an hmang leh a ni. Heng Kohhran an tlawhnaah hian SIM rawngbawlna tlangpui report pe-in, Chibaibukna leh thuchah tawi an sawi a, Pi Christabel Khiangte-in fakna hla sa-in rawngbawlna a nei bawk.
SIM hotute hi April ni 18 thawhtan khan Aizawl panin an let phei leh a, a tuk April ni 19 zing ah SIM International Director Dr. Joshua leh a nupui Dr, Joana ten AICS tlawhin Principal Rev. Dr. C. Vanlaldika leh thawktu dang ten lo dawngsawng in, zing inkhawm ah thu te sawi in, AICS zirtirtu leh zirlai te nen inkawmhona tawi an nei a ni.
Serkawna an awm chhunga BCM hruaitu te leh tualchhung kohhran hrang hrang ten an lo dawnsawn danah an lawm in, BCM leh tualchhung kohhran te chung ah lawmthu an sawi mawlh mawlh a ni.
