Pathianni lo awm tur, January 8, 2017 hi Mizoram Baptist Kohhran chuan Sunday School tan ni leh Pawl siamremna atan a hmang dawn a. Pathianni Chawhma Inkhawm banah Sunday School hun pangngaiah hming ziak leh pawl siamrem hi neih nghal tur a ni ang. Christian Education Director, Rev. Pc Liandula chuan Kohhran member te Sunday School ngaipawimawha, thahnem ngai taka kai theuh turin a sawm a. Kumtir atanga theihtawp chhuah a Pathian thuzir ngaipawimawh turin a chah a ni.
Mizoram Baptist Kohhran-ah hian Sunday School Department hrang hrang hetiang hian siam a ni:-
- Nursery
- Beginner
- Primary
- Junior
- Baptistma zir
- Intermediate
- Senior 'A'
- Senior 'B'
Kum 2017 atan hian Sunday School Zirlaibu tur pawh peih felin hralh chhuah mek a ni a, la nei lo tepawhin a hnuaia tarlan ang hian BCm Bookshop hrang hrangah ngaihven tur a ni.
Kumin-ah hian Senior ‘B’ tih loh a hnuai lam zawng (Beginner-Senior ‘A’) chuan Kum 2-na Zirlaibu hman tur a ni ang.
| Department |
Zirlaibu hming |
Ziaktu |
A man |
| Senior ‘B’ |
Chanchin Tha Marka Ziak |
Rev. Dr. Vanlalchhawna Khiangte. |
Rs.150/– |
| Senior ‘A’ |
Kristian nun leh Kohhran |
Rev. Vanlalmuankima |
Rs. 50/– |
| Intermediate |
Tun lai khawvel leh Kristian nun |
Rev. Lianchhunga Khiangte |
Rs. 50/– |
| Baptisma |
Baptisma Zirlai |
(Revised Edition) |
Rs. 50/– |
| Junior |
Bible-a Pathian hnathawh ropuite |
Rev K. Lalnunsanga |
Rs.50/- |
| Primary |
Isua leh A hnathawhte |
Rev. H. Ramthianghlima |
Rs. 60/– |
| Beginner |
Isua chanchin |
Rev. V. Lalthlamuana |
Rs. 60/– |
| Nursery |
Nursery Kaihhruaina |
H. Lianchhungi |
Rs. 50/- |
.............................
Director's Message:
PATHIAN THU, CHATUANA AWM TUR
Vawiin hian Pathian thu hlutzia te, a pawimawhzia leh zir a tulzia hre nawn leh ila. Kan S.S hi tihluin ngaipawimawh ila, vawiina inkhawm zawng zawngte hming ziak theuh turin kan insawm a ni.
Lo kal ru, a that chu,
Kan ramah zung kai sela,
Hemi hi a hlu si,
Kan hnam a chawimawi ang a.
Khawvel hmun dang leh Mizoramah ngei pawh Sunday School din a nih tirh chuan Pathian thu zir nan chauh ni lovin ziak leh chhiar zir nan te, nungchang mawi zirna hmun atan te hman a ni. Kan ramah pawh chutiang tho chu a ni a, tunah erawh chuan Pathian thu zir nan deuh chauh kan hmang ta.
Thupui dah dan tak pawh ka thiam chiah lo va,
“Pathian thu chatuana awm tur,” tiin ka han dah ngawt mai a ni.
“Mi zawng zawng hlobet ang an ni a, An ropuina zawng zawng pawh hlobet par ang a ni. Hlobet chu a vuai a, a par chu a tla a, Lalpa thu erawh chu chatuanin a awm reng a ni,” (I Pet. 1:24 & 25) .
Khawvelah hian thil an lo awm a, an ral leh thin. Mihringte pawh kan lo piang a, kan thi leh thin a.
“Thil an lo awm an ral leh thin,
Mihring an ral kumte nen;
A hmangaih erawh a ngai fo,
Chatuana dang chuang ngai lo,”
tih hla kan sak ang khan.
Chutiang bawkin thil dangte pawh kumhlun tur a awm lo. Pathian thu erawh chatuanin a awm reng ang.
“Ama thu ring rawh,
A thutiam nghet tak kha;
Kristaah ‘Amen’ a ni e,
Lei hi ral mah se, a ral ve dawn lo ve,
Chung chu Bible-ah a chuang e.”
Pathian thu hi i zir ang u. Chatuana awm tur chu a ni si a.
Hebrai ziaktu chuan, “
Isua Krista chu, niminah nen, vawiinah nen, kumkhua pawhin a pangngaiin a awm fo ang,” (Heb 13:8) a ti a. Ani chu Thu Tisaa lo chang chu a ni. Tin, Pathian thu chu chatuana awm tur a ni tih Bible-in min hrilh bawk.
“Lei leh van a ral ang a, ka thu erawh chu a ral lo vang,” (Matt 24:35)
Isua Krista chu a pangngai reng. Lalpa thu chatuanin a awm reng ang.
Kum za bi tam tak a liam a, Pathian thu chiah a dinna ngaia ding a awm. Sipai lal ram an lo ding a, an tluchhia a, theihnghilh an ni a, Pathian thu erawh a tluchhe lo vang a, theihnghilh a ni hek lo vang.
“A thutiam zawng zawng ang zela a mi Israelte chawlhna petu Lalpa chu fakin awm rawh se, A chhiahhlawh Mosia hmanga a thutiam tha zawng zawngte kha thu pakhat mah a thlawn lo va,” (I Lalte 8:55 & 56)
“Leia mi ropuite chu lallukhum khumtirin an awm a, mahse paihthlak sakin an awm leh thin”. Kan Pathian thu erawh chu chatuana awm reng tur a ni.
“Paihthlak tumtute chu paihthlakin an awm hlauh zawk thin”. Lalpa chu fakin awm rawh se.
“Mihringin Pathian a awm lo tiin sawi thin mah se, Pathian thu erawh chuan a ni telin thudik a puang chhuak zel si a”.
Pathian thu (Bible) chungchanga mi ropui thenkhatte thusawi :
- Bible hian lehkhabu dang min pek theih loh hlimna min pe a, harsatna min hnehsak a, hlauhna hmunah thlamuanna min pe a, thihna lui dai kai dan min hrilh a, ka dam chhungin hriat vek ka tum a ni.
- Dr. Billy Graham.
- Bible hi zawhna siam theih loh khawpa bulpui ber, khawvel pumin a pawm rawn theih thudik nghing ve thei lo chu a ni.
- Dr. Robert A. Millikan (Scientist).
- Lal Isua hnen atanga thil tha kan dawn zawng zawng hi Bible kal tlanga kan neih a ni a, Bible hi Pathianin mihringte hnena a thilpek ropui ber a ni.
- Abraham Lincoln.
- Bible tel lo chuan tun lai khawvela naupangte kan zirtirna hian kan society-ah awmzia a nei thei lo vang.
- Count Leo Tolstoy (Russian writer).
Heng mi ropuite hian Bible hlutzia leh pawimawhzia an hre chiang hle.
“Eng ang pawhin miten ring lo mah se, a dinna ngaiah a ding reng a, ral lakna hriamhrei zum thei ang ber hmangin chhun thler chuk mah se la, Pathian thu chu tihboral theih a ni lo. Meipuiah thlak pawh ni se, a thiltihtheihna chu far khat te pawhin a kiam lo vang”. Chatuana awm thu nung chu a ni.
A thatna leh thlumna pawh tak tak turin Pathian thu hi i zir ang u. S.S hi i tihhlu ila, Pathian thutak, chatuana awm tur chu i zir ang u. Kan nun kawng entu leh hruaitu atan a aia eng tha leh hmantlak a awm lo.
Vawiin hian Pathian thu (Bible) kan zirna SS hi ngai pawimawh ila, hming i ziak theuh ang u. Sunday School-a kan zir thin
Pathian thute hi chatuana awm tur thu nung a ni si a.
“LEI LEH VAN A RAL ANG A,
KA THU ERAWH CHU
A RAL LO VANG”. LALPAN A TI.
LALPAN MAL MIN SAWMSAK RAWH SE. AMEN.
