April 22-24, 2022 chhung khan Tripura Baptist Christian Union (TBCU) Assembly vawi 83-na, Chailengta Baptist Church, Hachhuk Hapar Baptist Association (HHBA)-a neih ah BCM aiawhin Rev. RC. Lalthanzama, Rahsiveng Bialtu; Upa H. Sangchungnunga, BCM Chaltlang, Bawngkawn Bial leh Upa Laldika Ralte, BCM Emmanuel, Mamit Bial te an kal a. TBCU Assembly thupui thupui atan “Feed My Sheep” (John 21:17) tih thu hman a ni.

BCM aiawhte hi Inrinni zan inkhawmah hun pek an ni a, Upa H. Sangchungnunga’n BCM aiawha Greetings sawiin BCM Reports a pe a. Upa Laldika Ralte a tawngtai a, Rev. RC. Lalthanzama’n thuchah a sawi bawk a.

TBCU Annual Assembly-ah hian rorel palai 319 an ni a. TBCU Assembly-ah hian President charge inhlanin President Elect tur pawh an thlang nghal a. Tuna TBCU puipa ni mekte chu - President: Rev. Kamalesh Uchoi; President Elect: Rev. Nagendra Debbarma; General Secretary: Rev. Rantuasanga Darlong; Associate General Secretary: Rev. Kishore Kumar Debbarma te an ni.

TBCU hnuaiah hian Association sawmpasarih (17) an awm a, Tualchhung kohhran 977 an awm a; chhungkua 24,693 an awm a; member zawng zawng hi 107,770 an ni. Tripura Field-ah hian BCM Missionary -29; Volunteer -21 leh Native Worker -36 an bung mek a ni.