Ṭhalai Kristian Pawl, Aizawl East Pastor Bial Sports (Indoor) chu July 31-1 August, 2023 zan khan Electric YMA Hall-ah tluang taka neih zawh a ni.

Bial ṬKP Sports zan khatna hi Tv. M.C. Lalhmingmawia, ECM chuan kaihruaiin Pu Lalzarzova, Vice President-in hunserh a hmang a, he mi zawhah hian inelna hrang hrang neih zui a ni. A zan khatnaah hian Futsal, Volleyball, Badminton, Inkawi kah, Perek in chhut luh siak, Sakuh Uiluh leh Maida games hmang tein Unit hrang hrang parukte an inel a, Tv. Vanlalruata, Bial Secy in lawmthu sawina tawngtaiin zan khatna hi a khar.

A zan hnihnaah Tv. Lalmuanpuia Sailo, ECM chuan kaihruaiin, Rbt. V. Vanlalropuia, Asst. Secretary chuan hunserh a hmang a, Musical Chair, Bucket Ball Head, Hla Inphuah Siak, Mobile Games, Bible Quiz leh Mixed Relay Race te hmangin Unit hrang hrang parukte infiamin an inel leh a ni. 

ṬKP, Aizawl East Pastor Bial Sports hi Sports Sub-Committee te buatsaiha neih a ni a, member ten an hlutin an kal ṭha hle a ni. A kharna hun tawi -ah Sports Sub-Committee Secretary Pu Robert Lalchhuanmawia chuan inelna hrang hrang result a puang a, a pumpuiah Ramthar North Unit an Champion a, Bethani Unit chu 2-na an ni a, Chanmari Unit chu 3-na an ni.

Result puan zawhah lawmman hrang hrang te semna nei zuiin, Rbt. Isaac Laldawngliana, President chuan Outdoor leh Indoor Sport neih chhunga Pathian hruaina avang leh Member ten an ngaihpawimawh avangin lawmthu a sawi a. Bial Sport hlim taka an hmang thei thin chu lawmawm a tih thu a sawi a. Pathian hnena lawmthu sawia a ṭawngṭai zawhah Bial ṬKP Sports (Indoor) hi khar a ni ta a ni.

ṬKP, Aizawl East Pastor Bial hian April 15, 2023 khan Lengpui-ah  Bial ṬKP Sports (Outdoor) hi an lo nei tawh bawk a ni.