July 30, 20112 (Thawhtanni) hi TKP Day vawi 61-na a ni a. Hemi ni hi Mizoram pumah TKP member ten kan hmang leh dawn a ni.  MTKP atangin Progamme guide siamin hemi zulzui hian Unit tinah hman a ni ang:-

1.    Unit tinin mahni remchan angin zing/zan ah thupui, Rawngbawlna  (Marka 10:45)) tih hmang a inkhawm nise. 2.    Unit remchan angin Social Service pawh neih tum nise. 3.    Kohhran member te leh Fellowship dang te pawh tel tur a sawm nise. 4.    Thawhlawm lakkhawm a ni ang a, Bial kaltlangin MTKP ah thawn tur a ni a, Mission rawngbawl nan hman a ni ang. 5.    Special item neih tum nise. 6.    Inkhawm Prog hi a tul angin Unit ten an siam danglam thei ang.

1950 vel atang khan Kohhran thenkhatah chuan Thalai Pawl angin hming hrang hrang neiina lo ding tawh a. Mahse, an inzawmkhawm chuang lova, mahni kal kalin an kal mai a. 1952-ah chuan Assembly chuan T.K.P. din chu rem a tihpui a, 1955 October 22-23-ah Baptist Kohhran pum huapa inkhawmpui hmasa ber Pukpuiah an nei thei ta a. Chu mi ni chu T.K.P. te hian an din champha-a ngaiin an hmang thin a. Kohhran Calendar-ah pawh dah a ni thin a. Amaherawhchu T.K.P. lo din tanna hi District T.K.P. Inkhawmpui neih hmasak ber 1955 October 22 kha ni lovin kum 1951 July ni 30-a Serkawna a lo din tanna kha T.K.P. din tanna atan Assembly chuan a lo pawm ta a ni. Chuvangin Calendar-ah chuan he mi ni hi dah a lo ni ta a ni.

Thalai Kristian Pâwl hi, July 30, 1951,  zan 7:00 khan missionary te leh  Upa Committee aiawhte kaihhruaina-in Serkawn Sikulpui (Middle School)-ah din a ni a. Thalai Kristian Pawl tih hming hi BMS (Baptist Missionary Society) missionary zinga pakhat, Mrs. F.J.Raper phuah chhuah a ni ngeh nghe a ni. Hemi zan hian hruaitu thlanna te neih a ni a, hengte hi thlan an ni:-

President         : Lungruala Vice-President        : Vanlalkunga General Secretary     : K.Lalliana Treasurer         : T. Ropianga

Senior Advisers :-   

1) Rev. H.S. Luaia 2) C.Saizawna 3) Lalmama 4) Mrs. F.J. Raper

......................

TKP Rawngbawlna tlangpuite:

 1. Mission:

TKP hian a din tirh atangin Ramthim veina lian tak a neih nghal avangin Mission lamah hian theih tawpin hma a la ve thin a, tun thleng hian hei hi kan phak ang tawkin kan la kalpui ve zel a ni. Nikum 2010-2011 chhung khan Missionary Relief atangin Missionary dam lo leh tanpui ngaite tanpui nan Rs 40000.00 (Singli) hman a ni. Tin Bial 63 leh Unit 174 ten Missionary Support an pe a. MTKP Budget atangin Rs 135000.00 (Nuai khat leh singthum sangnga) Missionary Support atan pek a ni bawk.

 2. Kohhran kutke tangkai:

TKP hian a din tirh atangin Kohhran tana kutke tangkai nih tumin theih tawpin hma a la ve thin. Music leh Zaipawl lamah hma kan sawn theihna turin Music Training, Musical Meet leh kawng dangtein hma a la ve thin a. BCM Project chi hrang hrang, Disaster Relief, Theological College, Hospital, Education leh Mission-ah te theih tawpin BCM tan tangkai a tum ve thin a. Bial leh Unit te pawh mahni bial leh kohhran tana tangkai turin kan la infuih ve reng a, mahni pual project-a inhmang zo ringawt lova, Kohhran tana a tam thei ang bera inhman hi kan tum fo a ni.

  3. Inkhawmpui & Palaina:

MTKP hian ama pualin inkhawmpui kum tin a nei thin a, kum 1986 hnu lamah chuan kum khat danah inkhawmpui hi neih thin a ni a, kum 2010 atang chuan kum hnih dana inkhawmpui neih nise tiin rorelna chuan a lo ruahman leh ta a ni. Heng inkhawmpuiah hian Thalaite tana rawngbawlna leh hmasawnna lam hawi prog tha tak tak buatsaih a ni thin. MTKP hian ram chhung leh pawn hmun hrang hrangah rawngbawlna leh inkhawmpuiahte palai a tir bawk thin a, India ram pawnah hian vawi sawm zet chu inkhawmpui leh Leadership training-ahte palai a lo tir ve tawh a. Exchange programme neiin India ram hmun hrang hrang pawh MTKP hming hian tlawh a lo ni ve tawh bawk a ni.

 4. Evangelical Cell & Junior TKP:

Thailaite thlarau nun tiharh tur leh thlarau lama hnung tawlh leh tanpui ngaite tiharha, tanpui turin TKP hian Camp, Crusade etc a buatsaih thin a, Tualchhung Kohhran leh bial nena tangkawpa hma an lak pawh a awm thin. Tin, hetiang lama chak zawka hmalak a nih theih nan Unit TKP hnuaiah Evangelical Cell pawh din a ni a. Unit hrang hrangah tangkai taka hman a ni. Thalai, kum lama naupang zawk ten ngampa zawka TKP huanga an rawn zuan luh theih nan Unit hrang hrangah Junior TKP kalpui a ni bawk a. Hei hi pawl thar din tumna leh TKP hnuaia group hran din tumna ni lovin naupang zawkte TKP huanga seng luhna kailawn tangkai tak atan kan hman thiam deuh deuh a duhawm hle.

 5. Social Service:

TKP te hian kan thutiamah khawtlang thatna tura inhmang tura kan intiam avangin kan theih tawkin khawtlang thatna tur leh hmasawnna turin hma kan la ve thin a. Mahni khawtlang theuh leh rampum huap pawhin kan theih tawkin kan la inhmang ve zel a ni. A langsar zual zingah chuan Voluntary Blood Donation, Environment humhalh (Kang mei ven, Nungcha humhalh, etc), khawtlanga mi harsa zawkte chhawmdawl leh khawtlangah faina kawnga hmalakte hi a ni awm e. Thahnemngai leh zuala tan la zel tur pawhin kan insawm nghal a ni.

 6.Thalai Entu:

MTKP Chanchin bu Thalai Entu hi 1978 atanga chhuah tan a ni a, tunah hian  thla khatah copy 8350 (July 2011) sem chhuah mek a ni. Thalai Entu hi Pathian thua infuih thar nan te, chanchin inhriat tawn nante, rawngbawlna report tarlan nan te leh thalaite tana thu bengvar thlak tak tak inhrilh hriat nan te hman a ni thin a. TKP te rawngbawlna pawimawh tak a ni. Tun hnaiah hian thawktute thahnemngaihna azarah kan semchhuah zat pawh a pung nasa ve hle a, Unit leh Bial lam pawhin min phurpui a ni tih kan hriatin kan lawm hle a ni.. A man pek thuah thahnemngai lehzuala tan kan lak erawh kan duh hle a ni. Tin, hun rei tak atanga kan buaipui tawh RNI pawh tihfel a ni a, kan lawm hle. Kan Registration No chu MIZMIZ/2010/34665 a ni. Postal Registration pawh kan tifel ta a, hei hian a thawn chhuahna lamah min zangkhai hle a ni. Registration kan neih theihna atana thahnemngai taka thawktu zawng zawng chungah lawmthu kan sawi nghal a ni.

  7. Inchhiarna:

 2010-2011 inchhiarnaah khan TKP te hi Pastor Bial 69 ah Unit 374 neiin, member zawng zawng hi 35198 kan ni a, BCM hnuaiah bial siam belh a nih avangin tunah chuan bial 72 kan lo awm ve ta a, member pawh kan la pung chho ve zel a ni.