Mizoram TKP Roreln-in Ruihhlo ngai te pual leh kan ramah Rorelna dik a awm theih nan Ram pum huap Chawnghei tawngtai ni se tia an thurel bawhzuiin, August 20 (Pathianni) thian ram pumah TKP Unit tin ten MTKP atanga Tawngtai Thupui siam sa hmangin chawnghei tawngtai hi an nei dawn a ni. Tawngtai thupui tur hetiang hian siam a ni:-
MIZORAM THALAI KRISTIAN PAWL
RUIHHLO NGAITE PUAL & RORELNA DIK A AWM THEIH NANA
CHAWNGHEI TAWNG TAI THUPUI 2023
A hun: Ni 20 August 2023 (Pathianni tlai)
Tawngtai thawh 1-na
RUIHHLO NGAITTE PUAL
- Ruihhlo ngaite hmangaih tak tak leh duhsakna nei chunga tawngtai thei turin kan dil ang.
- Ruihhlo ngai ten kawng dik lo an zawh mek tih an inhriat a, Pathianah nun tuihalna an neih theih nan.
- Ruihhlo ngai ten ruihhlo that lohzia hria a, an bansan ngam theih nan leh simna thinlung neia Pathian hnena kir a, piantharna tak tak an neih theih nan.
- Mahni Unit theuhah ruihhlo ngaite an hming lama tawngtai ni se. (Kan hriat ang angte thawh khawm ni se)
- Ruihhlo ngai chhungkuate tan tawngtai ila, an chhungkuaa ruihhlo bawiha tang mekte ruihhlo laka an chhuah theihna tura enkawl thiamnate, finna leh hmangaihna nena an enkawl theih nan i dil ang u.
- Ruihhlo avanga chhungkaw kehchhiate tan Pathian awmpuina i dilsak ang u.
- Kohhran hian ruihhlo ngaite veina leh chhan chhuahna kawngah tun aia nasa zawka hma kan lak theih nan.
- Ruihhlo zuartute tan tawngtai ila; nunna hlu tak tichhhetu leh nunna tam tak suattu ruihhlo zawrh hi Pathian Thlarau Thianghlim tanpuinaa an bansan theih nan, eizawnna tha leh thianghlim zawk an neih theih nan i tawngtaipui ang u.
- Ruihhlo ngaite chhawmdawla enkawltu, Home hrang hranga thawktu ten hmangaihna nena ruihhlo ngaite an enkawl zel theih nan.
- TKP-in ruihhlo that lohzia inzirtirna kan kalpui mekah hian Pathian hnathawh a lo lan a, he inzirtirna hi hlawhtling taka kan neih theih nan.
Tawngtai thawh 2-na
RORELNA DIK A AWM THEIH NAN
TAWNGTAI THUPUI
- Kan ram hruaitu ten Pathian tih chung leh rawn chunga ram rorelna an kalpui theih nan.
- Ram hruaitute rorelna dik lo laka an fihlim theih nan.
- Ram hruaitute, department head-te, sorkar office-a thawk ten kan ram tan an hnate rinawm taka an thawh zel theih nan.
- Zirna in hrang hranga hotu lu ber (head of institution) leh a hnuaia thawktu zawng zawng ten an zirna in theuhva rorelna dik an vawn nun theih nan.
- Zirtirtute zingah rorelna leh dikna vawn nun a nih a, an zirlaite hnenah dikna vawng nung tura an zirtir theih nan.
- Kohhran rorelna dawhkanah rorelna dik leh thianghlim a awm theih nan, tualchhung kohhran tinah rorelna dik leh thianghlim tung ding tura hma lak a nih theih nan.
- Kumin (2023) Assembly Election-ah hian inthlanna felfai leh thianghlim a awm theih nan, inthlanna buatsaihtu leh buaipuitu zawng zawngten rinawm leh dik taka an tih tur an tih theuh theihnan.
- Rorelna dik keng kawh ngam tur mi dik leh rinawm kan thlan chhuah theih nan leh candidate zawng zawng ten sum hmachhuana mipuite hnena an inzawrh lohna turin dilpui ang.
- Inthlan dawna sum thianghlim lo leng vel lakah thalaite leh Zoram mipuite kan fihlim theih nan leh hlemhletna rilru pua fehchhuak inthlan campaigner te kan hnawl ngam theih nan.
- Candidate zawng zawng ten kan ramah rorelna dik a awm ngei theihnana huaisen taka hma an lak theihnan leh inthlan an hma chhawn theihnan.
Note:
- Tan hun dar bi leh hruaitu inruat hi chu Unit tin ten kan remchan angin ruat mai ni se, chawlhlawk chungchang pawh hi Unit kutah dah a ni.
- Hun hman rei zawng chu Unit-in tha a tih danin siam rem mai se. Urhsun leh tihtakzetin chawnghei tawngtai hi hmang turin kan inngen a ni.
- Thupui hi a tam lamin kan rawn dah a, hengte hi a kaihhruaitu ten kal khawmte a zirin siamrem leh siksawi theih a ni. a. Hun awm dan a zirin tawngtai thupui thawhna hun siam theih a nih chuan lawmawm hle ang.
