October 2, 2023 khan TKP Zonuam Unit, Luangmual Bial, Aizawl chuan kum 25 an tlinna (Silver Jubilee) an lawm a. Jubilee Thupuiah Mathaia 5:14 thu “Khawvel êng” tih chu hman a ni.
Silver Jubilee lawmna hi chawhnu dar 1:00 tan a ni a. Biak In kawtah Jubilee dar vua-in, Silver Jubilee hriatrengna (Monument) chu Rev. T. Lalawia, Bialtu Pastor, Luangmual Pastor Bial-in a hawng bawk. Hemi zawh hian Jubilee lawmna leh Pathian Biak Inkhawm neih zui a ni.
Inkhawm hi Tv. Biakthansanga, unit President-in a kaihruai a, Upa PS Sanghluna, TKP Sr. Adviser-in Silver Jubilee Souvenir tlangzarhin, Unit hruaitu (OB) lo ni tawh te leh Sr.Adviser lo awm tawh te chawimawina thilpek an hlanna neih a ni bawk. Aizawl Area TKP leh Luangmual Pastor Bial TKP aiawh te hnen atangin Jubilee chibaibukna ngaihthlak a ni a, Rev. R. Lalrintluanga, Executive Secretary in thuchah a sawi a, Aizawl Area Baptist Choir leh Pu Zorema Khiangte te hnen atangin Pathian fakna hla ngaihthlak a ni bawk. Inkhawm banah Jubilee lawmna ruai kilho nghal a ni.
Zan lamah Jubilee lawmna inkhawm neih chhunzawm lehin Pu Hmangaihropuia, Unit Vice President-in inkhawm a kaihruai a, Pro Pastor Jacob Lalnunhlua hnen atangin thuchah ngaihthlak niin, Silver Jubilee Male Voice te, Pi Esther Lalhruaitluangi Zongte, Nl C. Lalrinzuali leh Luangmual Bial Zaipawl ten fakna hla sa-in, TKP hlimthla thlirhona leh Hruaitu hlui kawmna te neih a ni a, Group intihsiak result puanna leh lawmman semna neih a ni bawk. Upa Lalthawmliana, Senior Adviser-in tawngtaiin Silver Jubilee lawmna a khar ta a ni.
BCM Zonuam hi Luangmual Pastor Bial-a awm niin, kum 1998-ah an ding tan a, hemi kum vek October ni 2, 1998 hian แนฌKP Zonuam Unit hi din ve nghal a ni. Tunah hian member –mipa -105 Hmeichhia -78 an vaiin 183 an awm mek a ni.
