Kan Zosap Missionary hnuhnung ber Miss J.T. Smith (Pi Zomawii) chuan Dt 26. 6. 2023 (Thawhtanni) zing dar 9.30 (IST) khan ropuina ramah min lo chawlhsan ta a. BCM Puipate leh Department hruaitute inrawnkhawm chuan July 2, 2023 (Pathianni) zing inkhawm-ah hian Pi Zomawii sunna hi Tualchhung Kohhran tinah nei tura ngen ni se tiin an rel. Sunna hunah hian a chanchin tawi chhiar chhuah tur leh Bible chhiar leh tawngtaina neih a ni ang. A chanchin chhiar tur chu hetiang hi a ni e.
..............
MISS JT SMITH (PI ZOMAWII) SUNNA HUN HMAN DAN TUR
- Pathianni zing inkhawm tan tir lamah Sunna hun hi hman ni se, a kaihruaitu tur Tualchhung Kohhran Committee-in ruat se.
- Bible Chhiar tur: Hebrai 11: 13-16
- Tawngtaina: Thupui
- Pathianin Pi Zomawii Zofate tana min pek avangin lawmthu sawi ila.
- Zofate tana a hnathawh tam tak avangin lawmthu sawi bawk ila.
- A hnathawh chhunzawm zel tura Zofaten tan kan lak zel theih nan.
Miss JT Smith (Pi Zomawii) Chanchin tlangpui (chhiar tur)
June 26, 2023 (Thawhtanni) zing dar 9:30 khan Mizorama zosap Missionary lo chhuak te zinga Mizoram chhuahsan hnuhnung ber, Pi Zomawii (Miss JT Smith) chu Scotland, Dundee khuaa kum upa te enkawlna hmunah kum 85 mi niin Lalpa hnenah min lo chawlhsan ta a ni.
Pi Zomawii (J.T. Smith) hi August 14, 1938-ah Dundee, Scottland-ah a piang a, a pa chu John Samson Smith a ni. Nurse a zir zawh hnu-ah Missionary-ah inpe-in Baptist Missionary Society (BMS) chuan Mizoram-a thawk turin 1964-ah a rawn tir a. Mizorama awm phalna a nghah chhungin Colcutta ah thla riat a awm a, July 15, 1965-ah Serkawn lo thlengin, Medical Quarters-ah amah lawmna neih a ni a, Kristian Hospital, Serkawn-ah Nurse hna chu a zawm ve ta nghal a ni. Damdawi in leh Nurse Trainingnaah zirtirtu hna a thawk a. Mizo tawng thiam tak niin, Kohhran enkawlna kawng ah pawh TKP leh BKHP ah te theihtawpa inhmang in, Kristian Naupang Pawl enkawltu te zinga mi pawimawh tak a ni bawk. Mizoram a buai tak avangin 1968-ah BMS-in Mizoram chhuahsan turin an ko haw a, 1972-ah Mizoram-ah lo let lehin, 1977 thleng a thawk ta a ni. Mi zawng zawngin an ngainat a ni a, mizo hmingah ‘Pi Zomawii’ tiin an phuah a, chu chu a thihni thlengin Mizo hming-ah a pu hlen ta a ni.
Mizoram a chhuahsan hnu hian chawl mai lovin ama sum sengin China ramah Missionary-te puiin a thawk leh a, hetah hian BCM Missionary te nen pawh in be pawpin, a tulna apiangah an in chhawmdawl tawn veleh nghe nghe a ni. China ram bakah Khawvel hmun hrang hrang ah mahni inchawm (Self Support)-in kum upa tak a nih thlengin missionary rawngbawlna hna a thawk zel a, tar chaklo tak a nih hnu-ah, a pianna khua Dundee, Scotland ah kum upa te enkawlna hmunah awm-in, hetah hian a hun tawp a hmang ta a ni.
Pathianin Mizo te min hmangaihna chu Pi Zomawii kal tlangin nasa takin a rawn tar lang a, hetiang missionary duhawm tak Pathianin min pek avangin Pathian hnenah lawmthu sawi ila, Pi Zomawiin Zofate tana a rawngbawlna hlu tak hi kan theihnghilh tawh ngai lo ang.
