September 25, 2024 (Nilaini)chawhnu dar 2:30 khan Upa Biakchungnunga, Office Superintendent, BCM Headquarters Office chu October 1, 2024 atang khian Superannuation pension-a a chhuah dawn tak avangin BCM Headquarters Office-a a thawhpui ten BCM Hall-ah amah thlahna an nei.

Upa Biakchungnunga thlahna inkahwm hi Pu Lalruatkima, Administrative Officer-in  kaihruaiin, Upa B. Singpari’n Pathianthu chhiarin tawngtaina a nei a, Rev. R. Lalnunzira, AGS-Service-in BCM aiawhin thlahna thu a sawi a, Assembly aiawh leh Staff Welfare aiawh ten ngaihhruihna thilpek an hlan zawh ah Upa R. Lalbiakmuana, BCM Office Staff Welfare  Chairman-in thu a sawi bawk. Heng bakah hian Office-a a thawhpui te leh hotute hnen atangin a chanchin leh uina thu sawi hrang hrang ngaihthlak a ni a, Rev. F. Zorinkhuma’n malsawm tawngtaiin hun a khar ta a ni.

Upa Biakchungnunga hi February 14, 1987-ah Headquarters Office–a thawk turin LDC atan lak a ni a, LDC hna a thawh chhung hian Finance  lamah hun tam zawk awmin Cashier hna hun rei tak a thawk a, kum 2001-ah UDC-ah kaisangin, 2009-ah Assistant-ah hlankai a ni a, 1993-1994-ah Executive Secretary Office, Aizawl-ah H.A -in a awm a, 2016-ah Office Assistant incharge-in  pensiona a chhuah ni thlengin he hna hi a thawk a ni.  

Upa Biakchungnunga hi a lawina  BCM Bazar Veng-ah Kohhran Upa niin, Secretary a ni mek a, Bazar Pastor Bialah pawh hruaitu dinhmun hrang hrang luah tawhin, tunah hian Bial Secretary a ni mek bawk. An chhungkua hi member pali niin, a nupui Pi V. Zothanbuangi leh a fate pahnih nen an khawsa mek a ni.