Upa KL Rokhuma[/caption]
Mizoram Baptist Kohhran Chanchin-a mi pawimawhber te zinga chhiar hmaih loh tur Christian High School, (tuna Baptist Higher Secondary School) Principal hna leh BCM ban pawimawh tak, Upa KL Rokhuma(86) chu November 3, 2015 (Thawhlehni) dar 6:10 khan Lalpa hnenah a chawl ta. A tuk, November 4, 2015 (Nilaini) khan Mizoram Baptist Kohhran Biak In, Zotlang North-ah vuina inkhawm neihpuiin, Zotlang thlanmual-ah phum a ni.
Upa KL Rokhuma rawngbawlna leh BCM tana a hnathawh te avangin Mizoram baptist Kohhran chuan Pathian hnenah lawmthu a sawi a, a kalsan a tu leh fate zawng zawng, Lalpan thlamuanin awmpui zel se tih hi Kohhran hote tawngtaina a ni.
[caption id="attachment_7627" align="aligncenter" width="604"]
Upa KL Rokhuma vui inkhawm[/caption]
CHHIM BIAL KOHHRAN HRUAITU HMASATE ZINGA MI UPA KL. ROKHUMA
KL. Rokhuma pa Upa K. Thanchhinga hi Lungmawia awm thin a ni a, Lungmawi atangin Zotlang ah a pêm a, Zotlang-a kum khat leh a chanve a awm hnuah July 13,1923-ah Zotlang Baptist Kohhranah Rawngbawltu atan lak a ni a, a hnuah Kohhran Upa atan thlan a ni zui ta a ni. A mah hi lehkha thiam lo zopa a ni a, lo neiha ei zawng a ni. Ziak leh chhiar thiam turin School-ah ni khat mah a kal lo va, a mahin tapchhak mei êngah ziak leh chhiar a zir thiam a. Bible a ngainain, hun awlah chuan a kuah chawt thin a, ram riahnaah pawh tlaivara chhiar tum te a nei hial a ni! Upa K. Thanchhinga hian unau pakhat Chhinghnuna (L) a nei. A nu Thanzingi te unau hi paruk an ni a, an vaiin khawvel an chhuahsan vek tawh a ni. A nute unau chu hengte hi an ni:
1. Rev.Zathanga h/o Chawngthuami
2. Thanzingi w/o K.Thanchhinga 3. Rothangi w/o R.Thanghuta 4. Chawngchawli w/o T.Vanhnuna 5. Laikungi w/o Thanglianchhunga 6. Rochhunga h/o ParchhingiKL. Rokhuma hi Zotlang, Lungleiah a seilian a. Naupan lai atanga nu leh pa thuawih thei, chhawnchhaih nuam tak a ni a. Tleirawl sual nei lo, zûk leh hmuam, ruih theih thil lam ti ngai lo a ni. A hnam hming hi Khiangte a ni nain a hming bula KL. a dahna chhan hi K. Lalrokhuma chu kai tawiin KL. Rokhuma tiin a ziak thin a ni.
Zirna LamPi Zirtiri Hmeichhe School, Serkawnah zirna bul a tan a. Nurse Hostel bathlar-ah lung lehkha leh lung pencil hmangin A, AW, B leh number ziak a zir thin a. Chuta tang chuan Hotu Rokunga School, Serkawnah a insawn a. Chutah chuan ziak leh chhiar, hisap bakah hnang deh leh tah dan te an zir a. An hotupa Hotu Rokunga hi pa ze mak tak a ni a, Thumbawh leh Bawhtah dan an zawh pawhin, a thiam lo nge ni, “Tah ringawt rawh, a dik meuh chuan a ze thung mai a ni,” a lo ti mai thin a ni. Hotu Rokunga School atang chuan Zotlang Primary School-ah a insawn leh a, chuta tang chuan Class-III a zir chhuak a. Middle School chu Serkawn Middle School-ah a zir zawm a, an Headmaster chu thu leh hla lama hmingthang tak Pu Lalmama a ni a. Baptist Missionary Society, Missionary H.W. Carter pawhin a ho ve thin a ni.
Serkawn Middle School-a an kal lai hian zirlai naupangten Concert an nei thin a, ennawm en tur a la tam loh avangin hlut a hlawh hle a ni. Middle School an kal lai hi Indopui-2 na vanglai a ni a. Japan Jet Fighter rual ten Chitagong leh khawpui dang an bomb ri ulh ulh te an hre thin a. Japan Jet Fighter ten an bomb thut hunah pawh an him theih nan School mual sirah tawmrûkna (Trench) an laia, Class lak lawh lai pawh nise Jet Fighter ri an hriat veleh Trench-ah chuan an lût vat thin a. H.W. Carter chu sap pachal tih takah a luhlul in, naupang hoten an tawmkuk an belh thap lai pawhin a ni chu pawnah dingin Jet Fighter thlâwk chu a thlir veng veng thin a ni. Serkawn Middle School atangin 1946 ah Class-VI tha takin a pass a ni.
Lunglei ah High School a la awm loh avangin 1947 ah Mizo High School, Aizawl ah a zir zawm a. Hetih lai hian Aizawl kal a hautakin lirthei a la awm lo va, Thenzawl lamah hian ke in ni 5 kal a ni. Mahni puanthuah, silhfên leh zirlaibu nena thawh chhuah a ngaia, a hreawm zawnga lâk phei chuan hreawm tak a ni. Mahni thuamhnaw leh mamawh dangte ak chungin, ke ngatin Lunglei leh Aizawl inkar ah vawi eng emaw zat an kartawn a. Kawng laka thlenin an hnawn chângte leh in neitute phal lo chunga thlen luih chângte pawh an nei thin a ni. Kum 1951-ah Matric an Exam a, Pathian tanpuina zarah 1-na a ni a. Chung lai hun chuan Matriculation Exam chu Gauhati University in a enkawl a, Mizoram pumah mi pakhat tan chauh Scholarship an pe thei a. Matriculation Examah 1-na a nih avangin Assam sawrkar chuan a zir zawm zel nan Scholarship an pe a, mahse a hriselna a that tak meuh loh avangin College pawh a zir zawm thei ta lova, Scholarship pawh chu a chhawr thei ta lo a ni.
Hun eng emaw chen natna khuma mut hnuin Pathian tih damna a chang a, a hriselna a ziaawm hnuah Lunglei Government High School-ah zirtirtu hna a thawk a. Zirtirtu hna thawk pah chuan Intermediate of Arts (IA) a exam a, mark khat in 1st division a tling lo hlauh a ni. Private a zir zelin 1961-ah BA a pass a. Serkawn Christian High School-a a thawh hnuah Jorhat-ah B.T. (B.Ed tlukpui) a zir a, 1st class ah pass in Dibrugarh University pumpuiah 5-na a ni.
A Pianthar danMatric Scholarship denchhen-a College kal tura a inbuatsaih laiin natnain a tlakbuak hlauh mai a. Civil Hospital Lunglei ah leh Jorhat Christian Hospital-ah te hun eng emaw chen a awm a. November 13,1953 ah Jorhat Christian Hospital-a a awm laiin, thi mai tura a inngaih avangin khawvelah eng mah beisei tur nei tawh lovin a inhria a. Damdawi in khum ruh takah chuan Pathian hnenah tihtak zetin, damna dilin a tawngtaia; a natna a tihdam phawt chuan A rawngbawl turin a intiam a. A tawngtaina chu chawp leh chilhin chhânin a awm a, ‘Pathian thlamuanna, rilru rêng rênga hriat sên loh’ (Phil 4:7) chu a chang ta nghal a. A taksa a dam a, chumi rual chuan a thlarau pawh a dam ta a, a piangthar ta a ni. Tisa leh thlarau-a Pathian tihdamna a chan hi a chiang hle a. Pathian khawngaihna zarah 1953-a a pianthar atangin hnungtawlh lutuk nei lovin vawiin hi a thleng a, Pathianin hrisêlna a pe a, 1953 atanga January 20,2013 thlengin damdawi inah a lut leh ta rih lo a ni.
Chhungkaw lamFebruary 8,1960 ah R.Lalthlamuani d/o R. Zosiama (L) nen dan puitlingin Zotlang Biak in, Lunglei ah an innei a, Pathian khawngaihna changin fapa pahnih leh fanu pahnih an nei a, chungte chu-
1. Biakthansanga Khiangte h/o R.Vanhlupuii 2. Ramdinpuia h/o C. Zonunsangi 3. K. Lalrammawii w/o Upa V. Laltanpuia 4. Biaksiampuii w/o R. LalramhlunaA fate hian nupui pasal an nei vek tawh a, a fapate pahnih hian rawngbawlna lamah a hniakhnung zuiin Kohhran Upa an ni ve ve a ni.
Rawngbawlna ChanchinTlangval lai atanga kohhranah a phâk ang tawka inhmang thin a ni a. Zotlang-a TKP dintu zingah pawh a tel a. Zotlang Unit TKP ah term ruk (kum 6) Office Bearer a ni a, term 20 Senior Adviser a ni bawk a. TKP bakah BKHP ah kum 9, KNP ah kum 5, BMP ah kum 2 te chawl lovin Senior Adviser a ni chho reng a, kum 2011 thleng BKHP-ah Senior Adviser in a awm a ni. Kum 1961-ah Rawngbawltu atan lak a ni a, 1964 ah Zotlangah Kohhran upa atan thlan a ni a. Tualchhung kohhranah hun rei tak Chairman mawhphurhna a chelh a, tualchhung kohhran bakah kohhran a mawhphurhna a chelh tawh te:-
1. Chairman, Zotlang Pastor Bial - 1986, 1991, 1994, 1997, 2000, 2004, 2009, 2010 2. Secretary, Zotlang Pastor Bial - 1987-90 3. Senior Adviser Zotlang Pastor Bial TKP -1985, 1986-1987 4. Chairman, Lunglei North ABC - 2009 5. Asst. Secretary, Mizoram TKP term - 4 (1957-1967) 6. Treasurer, Baptist Church of Mizoram - kum 20 (1974-1994) 7. Secretary, Baptist Church of Mizoram - Term 1 (1991-1992) 8. Assembly Chairman, Baptist Church of Mizoram - kum 2 (1978, 1992)BCM Account Auditor ah kum eng emaw zat ruat a ni a, Tualchhung, Bial, ABC leh Assembly hnuaia Committee hrang hrang eng emaw zatah te telin tul takin hun a hmang thin a. Kum khat chhungin Committee Meeting vawi 100 chuangte a nei thin a ni. Rawngbawlna hrang hrangah a inhambuai viau laiin Mizo Cultural Organisation, Lunglei-ah term khat Secretary mawphurhna a chelh ve a, Bible Society Lunglei Chapter ah term khat Secretary mawhphurhna a chelh tawh a. Mizoram Board of School Education (MBSE) ah member a ni tawh bawk a ni.
A kum lam a tam ve tak bakah a taksa a chak that vak tawh loh avangin February 26, 2012 atangin Kohhran Upa atangin a pension ta a ni.
HnathawhnaPathian rawngbawlna atana a hun tam ber a hmanna chu zirna, Education ah a ni. Lunglei Government High School-ah 1955 atangin a thawk tan a. Baptist Church of Mizoram chuan 1961-ah Christian High School, Serkawnah a din a. A damloh laia Pathian hnenah a rawngbawl tura a thutiam tihhlawhtlinna atan Lunglei Government High School-a a hna chu bansanin, Christian High School, Serkawnah a thawk a. Chutah chuan 1961 atanga 1991 thleng a thawk a. Christian High School, Serkawn-a a thawh laiin naupang zingah HSLC Exam-ah top 10 a lang mi 6 an awm a, chungte chu:-
C. Lalbiakthanga - 1972, 6-na Lalramzauva - 1980, 3-na David V. Laldingliana - 1984, 6-na C. Rochamliana - 1986, 3-na H. Lalnunzuala - 1986, 5-na C. Vanlalmuana - 1987, 1-naKristian High School-ah hian kum tin vawiin thlengin School naupangte pualin Gospel Meeting an buatsaih thin a. A remchan angin Speaker atan Evangelist te Pastor te sawmin hun an hmang thin a. Gospel meeting atang hian naupang tam takin piantharna duhawm tak an changa, BCM hnuaia Pastor eng emaw zat leh Missionary tam tak te Gospel Meeting atanga piangthar leh Gospel Meeting atanga Pathian rawngbawl tura inpe te an awm a ni.
Kum 1991-a a pension hnuiin Zotlang Pastor Bialin Missionary ropui, William Carey hming chawia School an din Carey English School, Zotlang, Lunglei ah kum 16 (1993-2008) a thawk leh a. A vaiin School-ah kum 52 tal tawp hun a hmang a ni. ChawimawinaMizorama zirnain hma a sawn theih nan a phak ang tawk a hma a lakna chu sawrkar lam pawhin an hriatpui a, a phu tawka chawimawi lêt ve tha a hriain, 1982-ah rampum huap zirtirtu thate chawimawina National Awards for Teachers a hlan a ni.
Mizoram Baptist Kohhran rorelna sâng ber Asembly chuan Sunday School-a kum 50 chhung a thawh lawmpui nan March 11,2007 ah JH.Lorrain Memorial Medal & Certificate a hlan a ni. Sunday School zirtirtu a nihna hi 2013 atanga chawlhsanin, a zirtuah a awm ta zawk a ni.
Thu leh hla lamThu leh hla lamah hmuhma a nei ve nual a. Tlangval lai atanga zai leh rimawi ngaina mai bakah solfa thiam a ni a. Biak ina khuangvawtuah te leh zaipawl hruaituah te a tang thin a. A aw in a tlinin zaihruai a thiam hle. Zai ngana fu e ti lo chuan hla phuah lam chu a chemkalna a ni lo a ni ang, hla phuah lamah chuan a hlawhchham der a ni. Sap hla sawm vel bawr Mizo tawngin a letling a, mahse chu pawh chuan a duh thu a sam loh hlawm avangin a thehthang riral ta mai mai a. A hla lehlin zinga pakhat chu, ‘Damlai Thlipui a ral hunah chuan,’ tih a ni a, he hla hi 18.3.1951 a a lehlin a ni. Kristian Hla buah telhin No.575-na a ni a. Mahse Kristian Hlabuah hian a lettu ‘Hriatt loh’ tiin dah a ni a. Kum 2010-ah Kristian Hla bu chhutute hnenah thil awm dan hriattir a ni a, hla bu thar tihchhuah leh hunah chuan a lettu hming tarlan a nih tawh a rinawm a ni.
Lehkhabu buatsaih: A lehkhabute buatsaih tawh te:- 1. Kristian Naupang Pawl (KNP) thuzir 1982 2. Mizoram zirnaa Mission leh Kohhran rawngbawlna, 1998 3. Naupangte Isua hnenah, 2001 4. The Cross and the Switchblade 2005 (lehlin) Hla ngainat: 1) Chhandamtu chatuan nun nan (Kr. Hlabu No.270) 2) Pathian angchhung thianghlim ah chuan (Kr Hlabu No.496) Pathian Thu ngainat: 1) ‘Kei atan erawh zawng Pathian hnaih hi a tha a ni’. Sam 73:28 2) ‘Kei atan erawh zawng nun hi Krista a ni’ Philipi 1:21 A Nuna Chhinchhiahtlakte: 1. Tawngtai mi a niPelh miah lovin zing leh zanah Bible chhiara tawngtaina a nei thin a, pawn lama a vah chhuah tak meuh loh hnu phei chuan nitin mumal takin vawi thum Pathian pawlna a nei thin a ni. Kristian High School Serkawn ah a thawh lai pawhin naupang sual, awm tha duh lote chu a room-ah ko lutin an lu chungah kut nghatin a tawngtai sak thin a. College Principal pakhat chuan tun dinhmuna a din theihna chhan chu Pu K.L.Rokhuma tawngtaina vang a nih thu a sawi a ni. A tu leh fate tan pawh an hming lamin a tawngtaisak thin. Tawngtai mi a ni nain, phur leh ring taka tawngtai bawrh bawrh ang chi erawh a ni lo a ni. A tu leh fate tawngkam vin takin a be ngai lo va, thil dik lo an tih palh pawhin an thil tih chu an hmalam hun atan a that loh tur thu dam dapin a hrilh thin a. Tawngkam vina hrawk aiin a thawk na zawk daih a ni.
2. ThilpêkahPathian ram thilpêk a ngai pawimawhin a pension hnu pawhin sawma pahnih aia tam mah a pe ziah thin a. Pathian hnena thilpek hlan tur kan nih thu hi a tu leh fateah pawh a tuh tha hle a ni.
3. Kohhran mahni ta anga neihKohhran a ta ang tak takin a en a. Kohhran inkhawm, tawngtai, zaikhawm, hnatlang, inpawlhonaah leh fellowship inkhawmah pawh a neitu chan changin a tel zel thin a. Tualchhung kohhranin Pathian ni tlai chawnghei tawngtai an neih thinah pawh kum 81 a nih thlengin pelh lovin a tel ziah thin a ni.
4. Mi rêl ngai loMi tute mah a rêl ngai lo. Mi rêl chu sawi loh, mi nihna dik tak pawh ni sela, an chanchin a chhe lam chu mi hriat ah a sawi ngai lo. A fapa Upa Biakthansanga Khiangte chuan, ‘ Ka pa hian mi chanchin tha lo zawnga a sawi vawi khat mah kan la hre lo,’ a ti.
5. Pa taimaPa taima eng hna pawh thawh hreh lo a ni a, hnathawh a zei lutuk lo nain a thawh ve theih tawhah chuan a tlannchhe ngai lo va, taima takin a theih ang tawkin a thawk thin a ni.
6. Thil vawngfelEnglish pachal nen hun eng emaw chen lo inhrawn tawh a nih avangin a invawng felin, chhungkaw thil leh kohhran thil pawimawh te ziakin a chhinchhiah thlap thin a. Zotlang TKP ten an Unit din ni tak hun rei tak an hriat loh pawh Upa KL Rokhuma diary atangin TKP din hun leh an dinna hmun te an hriat phah a ni.
7. Hriatnaa tuihalSap hoten hriatna lama tuihal an tih ang chi hi a ni a. Kohhran hruaitu tan leh zirtirtu tan chuan khawvel huapa thil thleng pawimawh hriat a tul tlat thin avangin khawvel huapa thil thleng pawimawh te Media hrang hrang atangin ni tin a ngaithla, a chhiarin, a thlir thin a ni.
A NAT DAN leh A HUN HNUHNUNGA vanneia, natna lutuk nei lovin a awm thin, 2002 ah lung lamah insawiselna a nei a tan a, 2010-ah Aizawl ah Dr. Loncy a pan a, damdawi ei tur a chawh a, chuta tang chuan nghei lovin a ei char char a. Mahse, taksaah harsatna lang tham a nei lo. Tualchhung kohhran committee-a a tel hnuhnun ber chu August 2013 a ni a, a inkhawm hnuhnun ber chu 2013 Krismas zing a ni.
March 1, 2014 zingah Stroke vangin ni khaw hre lovin a tlu a, chaw ei khamah Christian Hospital Serkawn-ah kan entir a, an lo admit a. Ni 10 dawn a awm hnuah dam takin a chhuak leh a. May 17, 2015-a a zing tho chu Mini Stroke bawkin a awm leh a, rei vak lo kan bawisawm hnuah a harh leh mai a. Hmu ta lo ila chu dawm hlum lovin a kal ngeiin a rinawm.
A taksa chak lo chho zel mah se, na han tlûkpui leh tawrh hreawm lutuk a nei lo. Na i nei em tih pawhin, ‘Nei lo,’ tiin min chhang mai thin. Alzheimer vanga hriatna a hloh pawh hi eng emaw zawng tak chuan a vanneihthlakna lai awmin kan hria a, rilru fim pu ni sela, rilru hah leh hreawm takin hun a hmang ang a, chutiang chu a neih loh avangin a zia zawk hle a ni. Zawi zawiin a chak lo chho telh telh a, a mu thei a, a chawi ei a tui. A hun tam ber chu khumah a hmang. October 1, 2015 chhunah a khua a sik a, chuta tang chuan chaw ei tur pawhin a rawn tho peih ta meuh lo va, a awmnaah kan pek chilh a. Chuta tang chuan a khua a sik ta zeuh zeuh a, zawiin zawiin a hniam telh telh a. Mi piangthar, Isua neitu a nih avangin a thih hnua a kalna tur a hre chiang a. Chak lo tak chunga khawvel a hun hman reng ai chuan kal chhuaha Krista hnen awm a nghakhlel em em tawh a. In nuam taka haw a chak tawh thu vawi eng emaw zat a sawi thin a. Rinna mitin, beiseina nen nghakhlel taka a thlir thin Pa hnena chawl turin November 3, 2015 (Thawhlehni) dar 6:10PM khan khawvel a lo chhuahsan ta a ni.
.................................................................................................................................... A chungchang thua hmun dang atanga thuthawn kan dawn thenkhat te:Upa KL. Rokhuma hi Mizoram Baptist Kohhranah PA chan chang berte zinga mi a ni a. Kohhrana thawktute (a bik takin Pastor-te) tana hriatthiamna zau tak nei a ni tih hi pastor bial ka enkawl chhung leh headquarters-a ka awm hnu thleng hian a taka hretu ka ni. Vawiina amah thlahnaa Committee pawimawh kan nei hi a pawi kan ti a. Thawktute zawng zawng aiawhin a kalsan tak chhungkua leh Kohhrante duhsakna kan hlan a, ropui leh zah takin kan hotupa hi in thlah liam dawn nia.
- Rev.H. Lianngaia, General Secretary, BCMUpa KL Rokhuma, ka va ui che êm. Zotlang biala ka rawn awm ve chhung khan i hnen atang khan thil tam tak ka zir asin. Kohhran hmangaihtu leh mi rilru ngil tak i ni kha ka ngaisâng bawk che. - Rev. R. Lalrinmawia, Thailand
Upa KL. Rokhuma hi chu sap hovin ‘legend’ tia an sawi thin ang hi a ni ve phain ka hria.
A chanchin leh mize ropui leh tha unique leh original bawk si hi mi sawi ka hre tamin ka hre zing êm mai.
- F. Lalzidinga Principal, Huto English School, AP West Sir, KL. Rokhuma,Zirna tha min pe a, mite rualpawl theia zirtirna min pêk avangin ka lâwm e. Ka ngaisâng che a, ka zah che a, ka chhuang a che.
I skul naupang thin, C. Lalkima, EE, PWD (Camp: Lawngtlai)Ka ui khawp mai, High school-a min zirtirtu, Kohhran ban rinawmte zinga mi a ni. Entawntlâk berte zinga mi a la ni e.
Hetiang mi hi chawimawitlak an ni. - Rev. Dr.F. Hrangkhuma, Ex. BCM Gen. Secy. (Camp: Bangalore)I zirtir thin naupang ka ni hi ka lawm a ni. Lunglei H/S tizahawmtu, English Grammer thiam, Sir, i chungah ka lawm e.
- Upa K. Laltlanthanga, Mizoram Information Commissioner (Retired) Zirtirtu ropui leh mi thiam chungchuang, chhim arsi lian a her liam ta maw! A nun leh chetziain a zirlai naupangte a control vek thei. A zirlaiten an hlau lo va, an zah êm êm thin a ni. - R. Lalbiakthanga, ZemabawkBCM rethei taka member tlêmtê kan la nih laia hotu hrang hrangte thawhpuitu leh tanpuitu thian rinawm, mahni infak leh intihlar tum ngai lo mi tha, mi zaidam kan thlah liam tur hi ka va ui tak êm. - Rev.Dr. PL. Lianzuala, Aizawl
Upa KL. Rokhuma hi Christian H/S din tirh atang leh ka pension thlenga ka thawhpui a ni. Amah hi mi rintlak, a tih apiang rinawm leh thahnemngai taka thawk thin, inngaitlawm, thawhpui nuam leh tangkai tak a ni. BCM tan mi pawimawh leh hriat reng turte zinga mi a ni. - Rev. Dr. CL. Hminga (Ex. General Secretary, BCM)
