February 8, 2023 (Ningani) chawhma dar 11:30 khan Baptist Higher Secondary School, Serkawn-a Administrative Building sak thar chu Rev. R. Lalnunzira, AGS Service-in hawngin Pathian hnenah a hlan.
Building hawnna Inkhawm hi Rbt R. Zosangliana, Principal, BHSS-in a kaihruai a, Rev. L. Vanlalsanga, Director Educatoin Dept.-in Building sak dan Report tlangpui a pek hnu-ah Rev. R. Lalbiakliana, General Secretary-in thu a sawiin, Building sakna atana sum thawhtu, NABARD te, Mizoram Sorkar, School Education Department leh BCM Property Committee te hnenah he building sak puitin a nih theih nana hma an lakna leh support naah lawmthu a sawi. Rev. R. Lalnunzira, AGS-Service in Building hawngin, Rev. Dr. Lalzarliana, Director, Communications Dept. in Malsawm tawngtaiin hun a khar a ni.
Director Report-in a tarlan danin, BHSS Administrative Building sakna hi NABARD atanga tanpuina sum dawn hmanga sak a ni a, BCM Property Department-in sak hna a thawk a. Building area hi a vang – 26ft leh a dung 79 ft niin, floor khat a ni. Building sak na sum hi NABARD atanga hmuh cheng Rs. 5,246,088/- (nuai nuai 52, sing 4, sang 6 leh 088) niin, Second Party-in an chanpual an lak hnuah cheng 4,246,088/- (nuai 42, sing 4, sang 6 leh 88) a dawn atangin a sak hna hi a thawk a. Hawn theiha sak puitlin nan hian RS. 4,672,095/- (cheng nuai 46, sing 7, sang 2 leh 095) hman ral a ni a. Sorkar atanga sum hmuh bakah hian BCM atanga sum sen belh zat chu Rs. 109,664/- (cheng nuai 1, sang 9 leh 664) a ni.
