February 21, 2023 (Thawhlehni) Chawhnu dar 2:00 khan B.Sanghnuna Conference Hall, Christian Hospital, Serkawn-ah Hospital Management Committee Meeting neih a ni a. Meeting hi Committee chairman - Rev. R. Lalnunzira, AGS-Service-in a kaihruai a, Secretary Upa Dr. Lalramzauva, Director, Medical & Health Department-in report a pe.
Derector report chuan - Christian Hospital Serkawn Staff leh student te pualin Retreat hlawhtling tak neih a nih thu te, Dr. B. Lalrinzauvi'n December 1, 2022-a Christian Hopital Lawngtlai-ah Medical Superintendent hna a zawm thu te, BCM Sponsor-a MBBS CMC Vellore a zir tura inziak tling Jane K.Lalrohlui Johny K.Lalchungnunga fanu, Chanmari, Lunglei chuan December 1, 2022 atangin Class a tan tawh thu te tarlangin, Vision Centre Christian Hospital Serkawn leh Eyecare Hospital Aizawl tangkawpin Eye Camp hlawhtling tak an neih thu te, Mimal leh Pawl atanga tanpuina cheng nuai 47, sing 5, sang 2 (Rs 47,52,000/-) an dawn hmanga buatsaih - Inzaina Room (Operating Theater) chu sak zawh a nih tawh thu leh enchhinna pawh neih a nih tawh thu a tarlang.
Christian Hospital Serkawn kum za tlinna, Centenary lawmna February 10-ah BCM Hall-ah neih a nih thu leh hemi ni hian Hospital Centenary Building General Secretary-in a hawn thu te, Centenary hriatreng nana project hrang hrang - Hospital Centenary Building Radiology block sak thar te, Campus Renovation leh beautification lam te, Hospital Documentary and Souvenir, Hospital Management Information System (HMIS) te tihhlawhtlin leh kalpui mek a nih thu a tarlang bawk.
Hospital Centenary puala Tualchhung Kohhran hrang hranga special appeal siam atangin Rs 24,99,471/- hmuh a nih thu te, hei bakah hian Pawl leh mi mal 14 hnen atangin Centenary denchhenin tanpuina Rs.190,800/- leh Medical Department staff te atanga an thawhkhawm Rs 2,10,210/- an dawn thu te, Hospital Centenary denchhen hian February thla chhung atan damlo inentir te tan inentirna man la lova kalpui mek a nih thu te report ah hian tarlan a ni bawk.
Meeting thu rel zingah –Dam lo zaina Room (Operating Theater) thar hawnna leh Pathian hnena hlanna neih ni se, a hun leh tul dangte chu office lamin lo bawhzui se tih te, Ultrasound khawl tha leh changkang zawk pakhat lei belh turin hma lak ni se, Damlo na deuh te viltu – Patient Monitor pali awm mek chu indaihlohna a san tak em avangin pahnih dang lei belh turin hma lak ni se tih te remti-in, Hospital mamawh leh tul hrang hrang an thlirho bawk.
