#Chakma Mission Director leh Chakma Baptist Church-a Executive Secretary mawhphurhna Director thar hnen ah hlan fel a ni ta.

Kar hmasa Irinni, March 19, 2021 chhun 12:00 khan Chakma Mission Director leh Chakma Baptist Church-a Executive Secretary mawhphurhna chu Rev. A. Zohranga hnen atangin Chakma Mission Director thar, Rev. Dr. C. Lalruatthanga'n a la fel ta. Rev. Dr. C. Lalruatthanga hi Serte Pastor Bial aṭangin Chakma Mission Director atana Pastoral Department in a dah a ni a, indaih lohna avangin Chakma Mission-a Director hian Chakma Baptist Church-a Executive Secretary hna hi a kawp rih a ni.

#TKP Electric Veng Unit Lawngtlai te'n Borapansury-II-ah work camp an nei.

Ṭhalai Kristian Pawl, Electric Veng Unit, Lawngtlai te chuan kum 2021 atana an Plan zinga pakhat, ‘Ramchhung Mission-a Work Camp neih’ tih bawh zui in, ni 17.3.2021 (Nilaini) aṭanga ni 20.03.2021 (Inrinni) inkar chhung khan Borapansury-II-a Missionary Quarters hnuaia Skill Training Centre tur buatsaih in an fehchhuak a, an cham chhung hian Training Centre ceiling siam, tukverh leh ventilation frame vuah leh bathroom siam hna te an thawh bak ah, Music Room tur lei laih leh skirting brick rem hna te an thawk a ni.

Work Camp-ah hian TKP member 23 (mipa 18 leh hmeichhia 5) leh Kohhran hruaitu (Rawngbawltu) pahnih an tel a ni.

Borapansury-II-ah hian kum 2019 atangin BCM in hma kan la a, missionary pahnih - Pu K. Lalbiaknunga leh Pi Saizami Sailo te (nupa) an awm a. Fellowship ding tawhin, member 30 vel an nei a. Tunah hian sawrkar sikul building chu quarters atan la luah rihin, sikul building-ah hian an inkhawm ṭhin a. Missionary Quarters tur building hi sak zawh leh peih fel thawkhat tawh niin, rei lo teah luah luh theih beisei a ni a, a hnuai hi puan ṭhui leh puan tah zirna 'Skill Training Centre' atan ruahman leh buatsaih mek niin, hawn thuai theih beisei a ni.

#Arunachal East Field, Pasighat-ah Salvation Camping neih a ni:

Kar hmasa Zirtawp ni, (March 19, 2021) zan atang khan Arunachal East Field, Pasighat Pastorate Circle thalai te pualin Salvation Camp neih a ni a, Speakers ah Field Director Rev Lalsangzuala Sailo, Rev Luke Taying leh Pu C Lalramnghaka te hman an ni. He Camping ah hian Thalai member mi 137 an lut a, intuaitharna hun tha tak an hmang in, Pathianni zan khan Camp hi an chhuak a ni.

#Baptist Church of  Jharkhand Inkhawmpui vawi 14-na hman a ni.

Jharkhand Mission Field-a Baptist Kohhran Inkhawmpui vawi 14-na (Baptist Church of Jharkhand 14th Annual conference) chu Field Headquarters, Mahadevraydih-ah March 19-21, 2021 khan neih a ni a. He khawmpui-ah hian “Thlen chin atanga hmasawn” Phil. 3:16 tih thupuiah hmangin, Speaker atan Rev. K. Lalhnehliana, Field Director hman a ni. He inkhawmpuiah hian Field chhung kohhran hrang hrang atangin palai 626 an kal kawm a ni. Inrinni nilengin Pathian thu leh hla-a intihsiakna hun hman a ni a, Pathianni ah ringthar mi 21 in baptisma changin Kohhran-ah lawmluh an ni.

#Bru nu hovin Bru zinga missionary hmeichhiate an rawngbawlna avanga lawmthu sawi na atan Hnam puan an hlan

Tunkar Pathianni, March 21, 2021 khan  Bru nu hovin Bru zinga missionary thawklai hmeichhiate an rawngbawlna avanga lawmthu sawi na atan Bru Hnam puan leh a bah hlanna hun Bru kohhran Bial hrang hrang ah a rual in neih a ni. He thilpek hi kum 2017-a Central Bru Baptist Broi Dol (Bru Baptist Hmeichhe Pawl) rorel bawhzuina niin, Sum tam tak sen a ngaih dawn avangin kumtin hemi pual hian sum an lo khawl ve țhin a. Kumin 2021 BBC Nu ho Inkhawmpui lianah thilpek hi hlan turin an rel a. Covid 19 avangin inkhawmpui pangngai neih theih a ni ta si lo va, Bialah a huhova hlan nise an ti ta a, March 21 khan he chawimawina hi a rualin Bial hrang hrangah an hlan ta a ni. Hetiang thilpek hlu tak an dawng hi Missionary hmeichhiate chuan lawmawm an ti in, BBC Hmeichhe Pawl hnenah lawmthu an sawi a ni.

#Tualchhung Kohhran leh School Chawma Missionary Kal tur te Orientation Neih a ni.

Tunkar Nilaini, March 24 khan Tualchhung Kohhran leh School Sponsor-a Missionary-a kal tur mi pali te chu BCM Committee Room, Headquarters Office, Serkawn-ah Orientation neihpui an ni a. Orientation hi Mission Coordinator Rev. R. Lalthangliana leh Mission Promoter Upa HL Liantluanga ten kaihruaiin, Missionary te tana hriat tur pawimawh hrang hrang hrang te zirtirin an kawhhmuh a ni.

Tuntuma Missionry Orientation pek te hi Nl. Vasty Lalramzuati, Tuidam (Kawrthah Bial) leh H. Rochansangpuia, Mualthuam ‘S’, Tawipui Bial te - Midland Education Centre, Ziro, Arunachal West field a thawk tur leh MEC in an sponsor nghal tur te, C. Vanlalhriata, Hnahthial Bazar Kohhran leh Sonachara (S.Colony) Hnahthial Bazar Kohhran in an sponsor Tripura Field-a awm tur te, Vansangkimi, Chhipphir - Raibasa, Tripura Field-a awm tur, S.Vanlaiphai Sikulveng Kohhranin an chawm tur te an ni.

Heng Missionary thar pali te hi anmahni chawmtu te leh an lawina Kohhrante ruahman angin Tirhchhuahna programme siam a ni ang a, April 5, 2021 ah an thawhna tur Field panin an chhuak ang.