North East India Christian Council hnuaia Kohhran hrang hrang inthlunzawm te chuan kum tina an tih thin ang in, tunkar Pathianni, OCtober 16, 2022 hian 'NEICC Tawngtai Ni' (NEICC Day of Prayer) a hmang dawn a. He ni denchhen hian NEICC member kohhran pawl hrang hranga Pastor te leh thusawi rawngbawltu engemawzat te pawh mahni kohhran ni lo, Kohhran pawl dang ah thusawi rawngbawlna nei in an in kal thelh dawn a ni.
Hetiah rual hian BCM tualchhung kohhran hrang hranga he mi ni hman dan tur kaihhruaina chu Administrative Committee in ruahmanna siam in tualchhung kohhran secretary ah a thawnchhuak a, a thawnchhuah hmasa ah tihdanglam ngai a awm hlek avangin, October ni 6 khan a tihdanglamna hriattirna pawh a thawnchhuak leh tawh a ni. Kumin NEICC Tawngtai Ni thupui hi 'Kohhran hi pumkhat a ni' tih Ephesi 4:4-6 behchhana lakchhuah a ni. Tawngtai thupui lawmthusawina pasarih leh dilna tawngtai thupui 7 siam a ni bawk.
NEICC hi North East India a Kohhran Pawl hrang hrang te inlungrualna ti nghet turin 1937 khan Assam Christian Council ti-a din a ni a, 1962 atangin North East India Christian Council tiin thlak a ni. Tun dinhmun ah NEICC hnuai ah hian kohhran pawl hrang hrang 37 intelkhawmin kohhran inpumkhatna leh thawhhona lama hma a lak thin mai bak ah, Shillong ah Higher Secondary School leh College te nei in zirlai sang chuang an awm a. Zirlai leh mamawh te tan Hostel tha tak a kalpui mek bawk.
