BCM Assembly 2015-in a lo rel angin February 28, 2016 (Pathianni) Chawhma Inkhawm-ah Mizoram Baptist Kohhran huam chhunga Tualchhung Kohhran tinah Thianghlimna chungchang inzirtirna thupui hmangin Inkhawm neih a ni dawn a. Taksa, silh leh fên, ei leh in lama thianghlimna leh zûk leh hmuam laka thianghlimna sermon pualin hun hman a ni ang. He Inkhawm thupui atan “Nangni in thianghlim tûr a ni, kei ka thianghlim si a” (1 Petera 1:16) tih thlan a ni.
Thianghlimna Pual Pathianni (Temperance Service) sermon hi kohhran tinah kum khata Pathian ni tûk khat tal hman ni rawh se tih a nih angin, Worship & Music Committee chuan Tualchhung Kohhran tina hman theih tûrin Programme a siam a, Kohhran tina chhiar chhuah tur thuchah leh Programme tlangpui pawh Ni Pawimawh bu-ah dah nghal a ni.
................................
Biak In tina chhiar chhuah tur Thuchah:Thianghlimna
Pathian ze pui duhawm tak chu “Thianghlimna” hi a ni. Thil thianghlim tawh phawt hi chuan mi a hîpin duhawmna a nei thîn, chu mi piah lamah pawh zahawmna a keng tel zêl. Kan Pathian thuin “Nangni in thianghlim tûr a ni, kei ka thianghlim si a,” (1Petera: 1:16) tia thu min pêk pawh hi hmangaihtuin duhsak taka thu min pêk a ni. Thupêk hi miin a zâwmin a hnâwl thei a, thupêk zâwmtuin hamthatna leh malsâwmna tamtak a dawng thîn a, thupêk pawisa lo tuin harsatna leh buaina tamtak a tâwk bawk thîn. Kan Pathianin duhthlang tûrin zalênna min pe a ni ( Deut 30:19).
Kan thupuiin duhsak taka Pathian ze ropui tâwm tûra min kawhhmuh hi a hlu hle a ni. Hetih rual hian, Bible-in “Thianghlimna” a sawi hian a huamkim hle tih pawh hre thar leh ila. “Chutichuan duhtak te u, chûng thutiam chu kan neih avângin tisa leh thlarau bawlhhlawhna zawng zawngah i intifai ang u, Pathian tih dêk chunga thianghlimna tifamkimin” (II Kor 7: 1) a ti a.
Thenkhatin tisa lam thianghlimna an ngaihpawimawh hle laiin thlarau lam faina leh thianghlimna an ngaihthah hi a tâwk lova. A then thlarau lam faina uar tisa lama thianghlimna ngaihthah si pawh a awm theih bawk. Tûn tumah hian, Tisa leh Thlarau lam bawlhhlawhna zawng zawnga intifai/intithianghlim tûrin min duh a ni. Kan tisa leh Thlarau nun inbûk tâwk (balance) ngaihpawimawh hi kan Bible zirtîrna a ni.
Hun hmangtu tanpui thei awm Bible chângte:- (chhiar vek kher pawh a ngai lova, tanpuitu atân a ni): Taksa ngaihpawimawh a tûl (I Kor 6:19-20) hian min kawhhmuh.
Silh leh fên (Isaia 64: 6) silhfên bawlhhlawh ang lek ni tawh kan ni tih min kawhhmuh a, thianghlim tûra min duhtu thupêk hi a hlu a ni.
Thawmhnaw inbel chungchâng pawh a ngaipawimawh hle (Gen. 3:21) Savun kawrfual Adama te nupa a siamsak kha. (Deu 22:5) Silhfên Lalpa ngaiha tenawm a ni. ( I Petera 3: 3-4) tûl lêm lo inbel chungchâng a sawi.
Ei leh bâr lama thianghlimna.Sa ei thiang leh thiang lo ( Lev11: 1-47) Bible-in thiang a tih chi ho hi chu satui an ni zêl. Thiang lo a tih ho erawh chu sawimawi chawp ngaite an ni bawk.
Zûk leh hmuam laka thianghlimna:Kan pi leh pute atanga zûk leh hmuam uar hnam tia sawi kan ni thîn. Khawvêl changkâng zêlah zûk leh hmuamin hrisêlna a tihchhiat nasatzia leh sumpai, puar leh fânna ni si lova kan hman nasatzia pawh hi târlan tel a tûl. Civil supply-a tel chin hi chu a tha, a bâk sawimawi chawp ngaite hi chu intihbawlhhlawh nân hmang lo teh ang u. Kan lo hrisêl zâwk nân leh sum pai kan inrenchem nân te pawh a tûl a ni.
