July 30, 20112 (Thawhlehni) hi Thalai Kristian Pawl (TKP) din champha phak vawi 62-na a ni a. Hemi ni hi Mizoram pumah TKP member ten an hmang dawn a ni.  Kumin TKP Day thupui atan “Khawvel eng in ni e ” (Mathaia 5:14)  tih hman a ni ang. Headquarters atangin Progamme hman dan tur kaihhruaina  siamin hemi zulzui hian Unit tinah hman a ni ang:-

Hman dan tur :

1.   Unit tinin mahni remchan angin chhun / zan ah hman nise. Thupui atan, “Khawvel eng in ni e ” (Mathaia 5:14) thlan a ni.

2.   TKP Day pual Inkhawmah member tam takin chanvo an neih theih nan Unit in Programme tha takin ruahman nise.

3.   Thawhlawm lakkhawm tur a ni a, Bial kaltlangin MTKP ah thawn tur a ni a. Thawhlawm hmanna tur hi MTKP in a ngaihtuah ang.

4.   Unit remchan angin Zing kar/nileng hnatlang neiin Kohhran leh khawtlang tana tangkai tur thawh nise.

5.   TKP Day Programme tha taka hman anih theih nan Tualchhung Kohhranah thlenin Kohhran member leh Fellowship dang te pawh sawm nise.

6.   Mahni Unit dinhmun a zirin TKP Day hman dan tur ruahmanna hi Unit ten ansiamdanglam thei ang.

TKP din dan leh TKP Day :

A tirah chuan Thalai Pawl din chu hlauhthawn an neih avangin Kohhran Upaten an phurpui vak lova. Tihsual palh hlau takin  fimkhur leh uluk takin Serkawn Kohhran Upate chuankanZosap Missionary-te kaihhruaina hnuaiah kum 1951 July 30-zanah Serkawn M.E School (tuna BHSS Junior ) ah thalai thahnem tak kalkhawmin, phur takin Thalai Kristian Pawl chu an lo din ta a ni. Hemi zan hian hruaitu thlan a ni a, hengte hi thlan an ni:-

President         : Lungruala Vice-President        : Vanlalkunga General Secretary     : K.Lalliana Treasurer         : T. Ropianga

Senior Advisers :-   

1) Rev. H.S. Luaia 2) C.Saizawna 3) Lalmama 4) Mrs. F.J. Raper

Kum 1952 Presbytery Pukpuia neih chuan pawmpuiin Pastor Bial tinah din a phalsak bawk a. Hetih lai hian Mizoram chu Assam State hnuaia District pakhat mai a nih avangin TKP khaikhawmtu chu District TKP tih a ni a. District TKP Inkhawmpui hmasa ber chu Pukpuiah kum 1955 ah neih a ni a, he inkhawmpui ni hmasa zawk October 22 chu TKP Day atan hman a ni thin a. Amaherawhchu, hei hi dikhlel deuhva hriatna alo awm a, kum 1995 MTKP rorel Sethluna neih chuan Serkawna TKP din tan ni July 30 hi TKP Day atan hman nise a ti a. Hei hi BCM General Committee chuan pawmpuiin kum 1997 atang chuan TKP Day hi July 30 ah hman a lo ni ta a ni.

TKP chu kumin 2013 hian kum 62 a upa alo ni ve ta a, ‘Krista leh Kohhran Tan’ TKP hi din a ni tih hre thar leh ila, khawvelah hian Krista leh kohhran tan i inchhi eng zual zel ang u.

Mizoram Baptist Kohhran Inchhiarna (BCM Statistics -2012-13) a lan danin TKP te hi Pastor Bial 72 ah Unit 373 neiin , member  mipa 24810 leh hmeichhia 14643, a vaiin 39453 an awm a ni.

 .....................

TKP Rawngbawlna tlangpuite:

 1. Mission:

TKP hian a din tirh atangin Ramthim veina lian tak a neih nghal avangin Mission lamah hian theih tawpin hma a la ve thin a, tun thleng hian hei hi kan phak ang tawkin kan la kalpui ve zel a ni. Nikum 2010-2011 chhung khan Missionary Relief atangin Missionary dam lo leh tanpui ngaite tanpui nan Rs 40000.00 (Singli) hman a ni. Tin Bial 63 leh Unit 174 ten Missionary Support an pe a. MTKP Budget atangin Rs 135000.00 (Nuai khat leh singthum sangnga) Missionary Support atan pek a ni bawk.

 2. Kohhran kutke tangkai:

TKP hian a din tirh atangin Kohhran tana kutke tangkai nih tumin theih tawpin hma a la ve thin. Music leh Zaipawl lamah hma kan sawn theihna turin Music Training, Musical Meet leh kawng dangtein hma a la ve thin a. BCM Project chi hrang hrang, Disaster Relief, Theological College, Hospital, Education leh Mission-ah te theih tawpin BCM tan tangkai a tum ve thin a. Bial leh Unit te pawh mahni bial leh kohhran tana tangkai turin kan la infuih ve reng a, mahni pual project-a inhmang zo ringawt lova, Kohhran tana a tam thei ang bera inhman hi kan tum fo a ni.

  3. Inkhawmpui & Palaina:

MTKP hian ama pualin inkhawmpui kum tin a nei thin a, kum 1986 hnu lamah chuan kum khat danah inkhawmpui hi neih thin a ni a, kum 2010 atang chuan kum hnih dana inkhawmpui neih nise tiin rorelna chuan a lo ruahman leh ta a ni. Heng inkhawmpuiah hian Thalaite tana rawngbawlna leh hmasawnna lam hawi prog tha tak tak buatsaih a ni thin. MTKP hian ram chhung leh pawn hmun hrang hrangah rawngbawlna leh inkhawmpuiahte palai a tir bawk thin a, India ram pawnah hian vawi sawm zet chu inkhawmpui leh Leadership training-ahte palai a lo tir ve tawh a. Exchange programme neiin India ram hmun hrang hrang pawh MTKP hming hian tlawh a lo ni ve tawh bawk a ni.

 4. Evangelical Cell & Junior TKP:

Thailaite thlarau nun tiharh tur leh thlarau lama hnung tawlh leh tanpui ngaite tiharha, tanpui turin TKP hian Camp, Crusade etc a buatsaih thin a, Tualchhung Kohhran leh bial nena tangkawpa hma an lak pawh a awm thin. Tin, hetiang lama chak zawka hmalak a nih theih nan Unit TKP hnuaiah Evangelical Cell pawh din a ni a. Unit hrang hrangah tangkai taka hman a ni. Thalai, kum lama naupang zawk ten ngampa zawka TKP huanga an rawn zuan luh theih nan Unit hrang hrangah Junior TKP kalpui a ni bawk a. Hei hi pawl thar din tumna leh TKP hnuaia group hran din tumna ni lovin naupang zawkte TKP huanga seng luhna kailawn tangkai tak atan kan hman thiam deuh deuh a duhawm hle.

 5. Social Service:

TKP te hian kan thutiamah khawtlang thatna tura inhmang tura kan intiam avangin kan theih tawkin khawtlang thatna tur leh hmasawnna turin hma kan la ve thin a. Mahni khawtlang theuh leh rampum huap pawhin kan theih tawkin kan la inhmang ve zel a ni. A langsar zual zingah chuan Voluntary Blood Donation, Environment humhalh (Kang mei ven, Nungcha humhalh, etc), khawtlanga mi harsa zawkte chhawmdawl leh khawtlangah faina kawnga hmalakte hi a ni awm e. Thahnemngai leh zuala tan la zel tur pawhin kan insawm nghal a ni.

 6.Thalai Entu:

MTKP Chanchin bu Thalai Entu hi 1978 atanga chhuah tan a ni a, tunah hian  thla khatah copy 9000 chuang zet sem chhuah mek a ni. Thalai Entu hi Pathian thua infuih thar nan te, chanchin inhriat tawn nante, rawngbawlna report tarlan nan te leh thalaite tana thu bengvar thlak tak tak inhrilh hriat nan te hman a ni thin a. TKP te rawngbawlna pawimawh tak a ni. Tun hnaiah hian thawktute thahnemngaihna azarah kan semchhuah zat pawh a pung nasa ve hle a, Unit leh Bial lam pawhin min phurpui a ni tih kan hriatin kan lawm hle a ni.. A man pek thuah thahnemngai lehzuala tan kan lak erawh kan duh hle a ni. Tin, hun rei tak atanga kan buaipui tawh RNI pawh tihfel a ni a, kan lawm hle. Kan Registration No chu MIZMIZ/2010/34665 a ni. Postal Registration pawh kan tifel ta a, hei hian a thawn chhuahna lamah min zangkhai hle a ni. Registration kan neih theihna atana thahnemngai taka thawktu zawng zawng chungah lawmthu kan sawi nghal a ni.

.............................