Vawiin, May 29, 2014 (Ningani) hi Mizoram Baptist Kohhran Ni pawimawh (Special Day) “TKP Ramthim Ni”a ni a. Kuminah pawh he ni hi TKP Unit hrang hrangah urhsun taka hman a ni leh dawn a. Kumina TKP Ramthin Ni thupui atan “Krista aia Palai” (II Kor 5:20)  hman a ni ang a, Tawngtai thupui inkhawm hruaitu/Unit-in buatsaihin tawngtairualna neih a ni ang. Hemi ni (zan) Inkhâwm thawhlâwm chu Mission rawngbâwlna atân hman a ni bawk ang. Kuminah hian TKP Ram,thim Ni hi chhun lamah programme siam a ni lo va, zan lamah hemi ni pual hian TKP awmna Unit tinah Inkhawm programme siam tura beisei an ni.

Hriat tur pawimawh te:- 1. Thupui thlan chhuah, ‘Krista aia Palai’ tih hmang hian Unit tinin Inkhawm Programme hi mahni remchan dan angin ruahman tur a ni. 2. Kohhran member tam zawkin min telpui theih nan uar takin sawm ila, a theih chuan Fellowship dangte (BKHP, BMP, KNP) pawh chanvo siamsak ve nise 3. Thawhlawm lakkhawm a ni ang a, Bial kal tlangin MTKP-ah chhun luh tur a ni. Mission rawngbawlna atan hman tur a ni. 4. Missionary-te pualin Tawngtai rualna neih nise, Inkhawm hruaituin ruahmanna siam se. TKP Ramthim Ni lo chhuah dan: TKP te hian an din tirh atangin Ramthim veina lian tak an neih avangin Ramthim rawngbawlna lamah pawh hma an la tan hma hle a. District TKP inkhawmpui hmasa ber, Oct 21-23, 1955 (Pukpui) ah chuan Agenda “TKP hminga Thuhriltu tirh” tih hi ngaihtuah a ni a. Inkhawmpui vawi hnihna 1956 (Hnahchang) ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni. 1959-ah chuan ‘District TKP Tuikuk-Takam Ni’ atan October 5 (Thawhtanni) hman nise tih a ni a, 1960-ah chuan September thla Thawhtan ni hnuhnung ber hman nise tiin rel a ni a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta zel a ni. “Tuikuk-Takam Ni” tih chu huap zim deuha hriat a nih avangin 1969-ah chuan ‘Ramthim ni’ tiin thlak a ni. Amaherawhchu September thla hi Beirual thla a nih avangin TKP tana Ramthim ni hman hi a remchang tawk lo deuh thinin hriat a ni a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H.Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan kum tin TKP Ramthim Ni hi May 29-ah hman a lo ni ta a ni. TKP Ramthim Ni-ah hian inkhawm buatsaih thin a ni a. Heta thawhlawm lakkhawmte hi Headquarters-ah chhung lutin Mission rawngbawlna atan hman thin a ni. Mission Field leh Mission Station zat : BCM chuan tunah hian (August, 2013) Mission Field 11 (sawm leh pakhat) kan nei a, chungte chu : – 1) Chakma Mission (Ram chhung), 2) Tripura, 3) Assam, 4) Bengal, 5) MP&MS (Korku), 6) North India Mission (Delhi), 7) Arunachal West, 8) Arunachal East, 9) Arunachal Far East, 10) Nepal, 11) Bhutan. te an ni. Heng bakah hian Mission rawngbawlna hna kan thawhna hmun Mission Station 12 (sawm leh pahnih) a la awm bawk a, chungte chu – 1) Bru Baptist Church (Ram chhung), 2) Non Mizo Evangelism (Ram chhung), 3) Andaman & Nicobar Islands, 4) Miria (Bangladesh), 5) Yinchuan (China), 6) Ghana (W.Africa), 7) Kenya (E.Africa), 8) Bandung (Indonesia) 9) Cambodia, 10) Chiangmai (Thailand), 11) Banluang (Thailand), 12) Naa Nongthum (Thailand) te a ni. Mission Workers (as on August, 2013) : BCM Mission Workers zat chu hetiang a ni – (a) Substantive workers – mizo 132, native 15, total – 147. (b) Temporary – mizo 36, native 2, total 38. (c) Contract – mizo 123, native 301, total 424. (d) Recognised missionary – 20. (e) Missionary nupui / pasal – 102. (f) Mizo volunteers – 45. (g) Native volunteers – 45. (h) Private support – 70. Grand Total – 888. BCM member zawng zawng hi 155,883 kan ni a (2012-2013). Member 176 in mission worker pakhat tir ang kan ni. TKP leh Mission: 2012-2013 chhung khan TKP Bial 68 leh Unit 207 in Mission Support an pe a, Mission Support pe hi kan la pung zel a. Hemi kum chhung tho hian MTKP chuan Mission Support Rs 135000.00 a pe bawk a, MTKP hian missionary damlo leh tanpui ngaite tanpui nan TKP Ramthimni thawhlawm a dawn khawm atangin Mission Relief a sem ve thin bawk a ni. Heng bakah hian MTKP, bial leh unit ten Mission lama hma kan sawn theih nan thuzir tur te buatsaihin, mission consultation te neiin, work camp leh mission visit te neih thin a ni bawk.