Mizoram Baptist Kohhran, Assembly Committee lian pathum - Mission, Service leh Central Committee te chuan tunkar (August 23 - 25, 2017) hian Sap Upa leh Pu Buanga Hall, Serkawn-ah Meeting an nei chho mek a. Nimin lamah Mission Committee meeting an zo fel a, vawiin-ah Service Committee thukhawm lehin naktukah Central Committee Meeting-in a chhunzawm leh ang.
Nimin-a Mission Committee Meeting chuan Missionary Pension-a chhuak te leh Upgrade te chhuahsan post hum dilna - Substantive Post 2 leh Temporary Post 3 chu Assembly-a thlen chhoh turin a passed a, Baptist English School, Khawmawi Zirtirtu pakhat pek belh te, BCM leh Good News Society MoU chhunzawm te, BCM leh Galo Baptist Union(GBU) nena Agreement chhunzawm te an rel a, heng an thurel te hi Assembly Executive Committee-ah thlen chhoh leh a ni ang. heng bakah hian Department leh Institution hrang hrang te nikum (financial year 2016-2017) leh kum kal lai mek (2017-2018, April-July) Achievement Report leh General Report te an thlirho bawk.
Mission Committee-ah hian Pastor Bial aiawh leh Assembly aiawh member 100 vel an awm a ni.
Vawiin lama Service Committee Meeting neih mekah agenda langsar zual te chu:-
1. BCM Education Policy ruahmann(Draft) thlirho
2. BCM Samaritan siam dilna
3. BHSS Building sak belh nan Sunday vawi 1 thawhlawm dilna
4. Rehabilitation Centre din thu
5. Awizawl-ah A.V Worker neih thu
Service Department hnuaiah hian Department hrang hrang 7 leh Institution 7 a awm a, Service Committee-ah hian ABC aiawh palai te bakah Assembly aiawh leh Department aiawh te an awm a, an vaiin member 50 vel an ni.
