Bazar Pastor Bial chuan an bial rorel bawhzuiin March 16 leh 17, 2024 hmang khan Muallianpui Pastor Bial an tlawh a. Kohhran member 49 leh Bazar Bial Zaipawl member 23 nen an vaiin member 72 an kal a. An zing ah hian group zai pakhat leh soloist 3 an kal tel bawk a. Bial chhung kohhran hrang hrang pali- Muallianpui North, Muallianpui South, Lungpuitlang, New Kawnpui ah te insem darhin hun an hmang a, South Lungleng erawh chu kalkawng a harsat deuh avangin tun tumah hian an tlawh thei ta lo a ni.

Mizoram Baptist Kohhran chuan Mission Field Director atana ruat thar - Rev. Zadingliana Pachuau -Tripura Field-a awm tur leh Rev. J. Lalpiantluanga, Jarkhand Field-a awm tur te leh an nupui te chu tunkar Pathianni, March 17, chawhma dar 10:00 khan Mizoram Baptist Kohhran Biak In, Zotlang North-ah Rev. R. Lalbiakliana, General Secretary-in a tirchhuak a.

Lawngtlai Area Ṭhalai Kristian Pawl Co-ordination Committee leh Department of Environment, Forest & Climate Change, LADC ṭangkawp-chuan ‘Ram kang chungchanga inzirtirna atan - Sawihona Hun' (Pannel Discussion) an buatsaih

March 16, 2024 (Inrinni) khan Vairengte Pastor Bial Upa leh Rawngbawltu te pualin Leadership Training BCM Town Church Vairengte-ah a neih a ni a. He hunah hian Rev R. Lalnunzira, AGS-Service chu zirtirtu atana hman a ni. Nilengin training hi neih a ni a, Bial chhunga Kohhran Upa leh rawngbawltu mi 32 an tel thei a ni. He hunah hian BCM Town Church, Vairengte-in Annual report, a bu-a buatsaih chu bialtu pastor Rev. C. Lalhmangaihzama’n a tlangzarh bawk.

Tunkar Ningani (March 14, 2024) zinglam dar 11:30 khan BCM Chanmari, Lunglei - Committee room-ah Mizoram Baptist Mipa Pawl Executive Committee meeting neih a ni a, MBMP President - Rbt Chawngrolura Chawngthu-in meeting a kaihruai a, committee memberte an kal ṭha hle.

Mizoram Baptist Kohhran, Assembly vawi 128-na chu BCM Biak In, Electric veng, Lungleiah neih chhunzawmin, vawiin, March 10, 2024 (Pathianni) zing dar 10:00 khan Pastor leh Minister nemngheh inkhawm (Ordination Service) neih a ni.

Vawiin chawhma dar 10 atanga tan Assembly rorel ni hnuhnung ber hi President Rev. F.Ramdinmawia’n kaihruaiin, Area Baptist Council, Assembly Executive Committee leh Administrative Committee atanga thu lut te ngaihtuah a ni a; kum 2024-25 chhunga Mizoram Baptist Kohhran  budget cheng nuai 12566.63 chu pawm a ni a, budget pumpui atanga kohhran in a thawhchhuah tur zat (Church Contribution) hi cheng nuai 8481.42 a ni.

Vawiin chawhma dar 10 atanga tan Assembly vawi 128 na rorel ni hnihna hi President Rev. F. Ramdinmawia'n a kaihruai a, Administrative Committee leh Assembly Executive atanga thu lut bak ah Area Baptist Council atanga thu lut te engemawzat ngaihtuah a ni.

March 8 hi Mizoram Baptist Kohhran  Nipawimawh, ‘Missionary Thlen Champha” a ni a.  He Ni hi Mizoram Baptist Kohhran Ni Pawimawh zingah telh niin kum tinin Kohhran hna thawkte chawlh atan hman thin a ni.

BCM Assembly 2019-in Mizorama Chanchintha lo thlen dan chanchin (documentary film) buatsaih ni se ti a a rel chu shooting zo fel tawh tlangzarh theih tura chulmam mek a ni a, Assembly thurel a nih avangin buatsaihtu lam pawhin Assembly ah ngei a film pum tlangzarh hman a nih loh pawhin a Trailer tal Assembly palai te en theih tura chhawpchhuak turin hma an la a. Assembly zan hnihna inkhawm ban rualin he documentary film, 'Mi ngo hnuhnung'  trailer hi Assembly palai te hma ah pho chhuah a ni a, President Rev. F. Ramdinmawia'n Pathian hnena lawmthu sawina leh tluang taka film pum peihfela tlangzarh thuai a nih theih nan tawngtaina-in a hlan.

March 7, 2024, Assembly Rorel Inkhawm-ah heng lehkhabu pathum - Baptist House Style, BCM Thurin chhuizauna leh Pathian Thu sawi zirna (Homiletics) te hi tlangzarh an ni a, Assembly palai te leh a duh apiang lei theihin Assembly nahmunah hian chhawpchhuah nghal a ni. Heng lehkhabute hi Baptist Publication Board tih chhuah a ni a, Baptist House Style hi cheng 50/-, Thurin Chhui zauna Rs 150/- leh Pathian Thu sawi zirna (Homiletics) Rs 100 te a lei theih an ni.

BMP  PangzawlPastor Bial chuan March 1-3, 2024 hmang khan BCM Biak In, Khawngbawk-ah Bial BMP Meet vawi 9-na an hmang a, Meet thupuiah ‘Krista aia palai’ tih thu thmangin, Speaker-ah MBMP President Rbt Chawngrolura Chawngthu an hmang a, Tv. H. Lalthanmawia, BCM Mualthuam ‘S’ in zaia rawngbawlin Meet hi a hmanpui bawk.

March 1-3, 2024 hmang khân ṬKP Chhipphir Pastor Bial Inkhawmpûi vawi 44-na leh Bial TKP Rorel vawi 50-na chu BCM Biak In, Lungmawi-ah neih a ni a. Inkhawmpui Thupûi-ah Thalaite mamawh Isua Krista ' tih hman a ni a, Speaker ah Rbt. C. Lalnunpuia, Bazarveng, Lunglei hmangin, Bazar Pastor Bial Zaipawl ten Inkhawmpui hi an hmanpui bawk.

Assembly rorel hi Rev. KV Thanga, President in bul a tan a, rorel palai lawmna thu a sawi  zawh a President thar Rev. F. Ramdinmawia hnenah President nihna a hlan a, ani hian rorel a kaihruai nghal a, palai lawmna a bul tanin rorel ni hmasa ber neih chhunzawm nghal a ni. Vawiin rorel-ah hian palai member 1561 in ro an rel a ni.

BCM Rorelna sang ber, Assembly vawi 128-na chu karleh nilaini March 6 atanga Pathianni March 10 chhung hian BCM Biak In, Electric Veng, Lunglei ah  neih a ni dawn a. Assembly thupui hi ‘inpumkhatna’ (Johana 17:21) tih a ni ang. Hun hman dan tur tlangpui kan han tarlang ang e.