Tualchhung Kohhran Media Committee hmalakna in April 15, 2024 (Thawhtan) zan inkhawm ah media awareness hi neih a ni a. MBMP Media Cell Committee Convener Pu Vanlalpeka chu Resource person-ah hman a ni a, MBMP Media Committee Secretary Rbt.J.Lalrosanga leh Pu R.Lalhlimpuia, Committee member ten an telpui bawk.

Bial TKP Sport hi Luangmual Indoor Stadium April ni 12, 2024 khan neih a ni a, Bialtu Pastor Rev. RC. Lalthanzama'n Pathian hnena hlanna leh hawnna a nei a, member 408  kal in, Bial ṬKP Sport neih tawh ah chuan kal ṭhat ber ṭum a la ni. Inelna hrang hrang- member kal tam-ah te, Fian sehkawha intlan siak te, thil in ei siak te, chana fang tla inchhar chak siak te leh Volleyball hmang te-in an nei a ni.

Kan hriat theih chinah April 12-14, 2024 hmang khan heng Pastor Bial hrang hrangah te hian KNP Inkhawmpui an nei.

#Buarpui ‘S’ Pastor Bialah BCM Biak In, Buarpui-ah Mission Convention hi nei in, Speaker-ah Rev. Dr. R. Lalthanmawia an hmang a. Zirtawp zan, inrinni chawhma, Inrinni zan leh Pathianni zing leh Pathianni zan Inkhawmah te Speaker hnen atangin thuchah ngaihthlak thin a ni a. Inrini chawhnu-ah Mission pualin inpawlhona neih a ni a, hetah hian ramthim rawngbawlna kawnga hmalakna hrang hrang te zirho in speaker-in a kaihruai a, zawhna leh chhanna hun te neih a ni bawk. Pathianni chawhnu-ah Mission pualin Kohhran inpawlhona nei lehin sawihona leh zawhna leh chhanna hun te hman a ni.

April 14, 2024 Pathianni chawhnu khan Chanmari Kohhran, Lunglei-ah Upa & Rawngbawltu leh Media Committee pualin Media Awareness & Training neih a ni a, C. Lalhmachhuana, Manager, Audio Visual Production in training hi neihpuiin zirtirna a pe.

April 13 & 14 hmang khan Lungsen Pastor Bial chuan BCM Biak In, Lungsen-ah Sunday School Training leh Tleirawl Pual Meet an nei a. Inrinni nilengin Sunday School zirtirtute leh Sunday School puipate pualin Biak In Hall-ah Sunday School Training hi neih a ni a, Upa HS Lalhmingthanga’n zirtirna a pe a, Bial chhunga Sunday School zirtirtu leh puipate mi 40 chuang an kal. Hetih lai hian Biak in lamah Tleirawl leh rawlthar (Baptisma, Intermediate leh Senior ‘A’ zirlai te) pualin Tleirawl Meet neih a ni bawk a. Nl. Lalhmingmawii Chongthu-in tleirawlte tana hriat tur pawimawh  zirtirin hun a hmang a, Bial chhunga Kohhran hrang hrang atangin mi 73 an kal khawm a ni.

April 12-14 hmang khan Sakawrdai pastor Bial chuan BCM Biak In, Sakawrdai-ah Worship & Music Training an nei a, C.Lalnuntluanga, Worship Trainerin training hi a neihpui.

April 12, Zirtawpni chawhma dar 11:00 khan Rev. Dr. HS Luaia hriatrengna atan a a tu leh faten Christian Hospital Serkawn-a inentir leh dam lote tana chawlhna (hulhliap) an buatsaih ‘Pastor Sawiluaia Chawlhbuk’ chu Rev. R. Lalbiakliana, General Secretary-in hawngin Pathian hnenah a hlan. Hawnna programme hi Upa, H. Lalnunsanga, Kanaan, Aizawl-in kaihruaiin, chhungkaw aiawhin thu a sawi nghal a, Rev. Dr. R. Lalthanmawia’n lawmthusawina leh malsawm tawngtaiin hun a khar a ni.

April 11,2024 (Ningani) chawhma dar 11:00 khan Synod Office, Aizawl-ah Kristian Hlabu ennawn Committee Meeting neih a ni a. Kohhran pahnih- Presbyterian Church, Mizoram Synod leh Mizoram Baptist Kohhran atanga hlabu ennawn sub-committee ve ve ten ruahmanna an siam leh an lo thlir lawk atanga rawtna hrang hrang te thlirin, hla thar engemawzat sengluh tura pawmin, siamthat ngai leh ennawn ngai ni-a an hriat te pawh lo zir chiang a, ennawn chhoh remtih a ni a, hma lak zel dan tur ruahmanna te an siam a ni.

Director, Medical & Health Department report in a tarlan danin – March 2024 chhungin Christian Hospital Serkawn-ah damlo 2124 in entirin, an zinga 301 admit an ni a, nau piang 49  an awm laiin mitthi 10 an nei thung.  Report kimchang hetiang hi a ni:-

April 11, 2024, ningani zan khan Khawvela Baptist Kohhran hruaitu liante; Rev. Dr. Elijah Brown, General Secretary, Baptist World alliance (BWA),   Rev. Dr. Vee Tetseo, General Secretary, Asia Pacific Baptist Federation (APBF) leh  Rev. Samaresh Nayak, General Secretary, National Council of Baptist Churches in India (NCBCI) te chuan Shillong an tlawh a.

April 5-7, 2024 chhung khan Cherhlun Pastor Bial leh BCM Chanmari, Lunglie-ah te Mission Convention leh Mission Weekend hman a ni

April 6 & 7 hmang khan Damdep Pastor Bialah Sunday School Training, BCM Biak In, Damdep-II ah neih a ni a, h Upa K. Lalnuntluanga leh Upa Laldingliana Lianhna, Sunday School Trainer ten training hi an neihpui a. Inrinni nilengin Sunday School zirtirtute leh Sunday School puipate pualin hun hmang in, mi 60 an kalkhawm a.  Inrinni zan, pathianni zing leh pathianni zanah te Sunday School Campaign neih nghal a ni a,bial chhung Kohhran hrang hrangah hun hmangin trainer te hian thuchah an sawi a ni.

April 6 leh ni 7 hmang khan Lunglei Town Area huam chhunga Bial TKP te pualin TKP Meet, BCM Biak In venglaiah neih a ni a.Thupuiah ‘Kohhran’ tih hman a ni. Inrinni zanah Rbt. F. Lalremruatpuia, Vice President MTKP-in thuchah sawiin, Pathianni zing inkhawmah Rev. F. Zorinkhuma, SecretaryMTKP in thuchah a sawi a, Pathianni chawhnu lamah Fellowship neiin Pathianni zan Inkhawm-ah  Upa R. Lalrochama, MTKP President-in thuchah a sawi.

Jubilee Bible School, Serkawn chuan April ni 2 atang khan kum 2024-2025 Session atan Class an tan a, kuminah hian zirlai 19 leh Missionary Training mi 5, an vaiin mi 24 an awm a, zirtirtu hi Principal nen mi 6 an awm a, UDC leh IV Grade pakhat ve ve an awm bawk.