April 27 leh 28 hmang hian BBC Rotlang West ah SS Training neih a ni a. Zirtirna pe hian Upa R. Lalhmingmawia leh Upa Pc Lalthansanga SS Trainer te an kal. He hunah hian missionary, kohhran hruaitute leh Sunday School zirtirtute bakah fellowship hrang hrang hruaitute mi 31 kalin, Inrinni nilengin Training neih a ni.

April 26-29, 2024 hmang khan Zohnuai East Kohhran chuan Mission Convention an nei a, Speaker-ah Pu T. Nghaksanga, Mission Promoter an hmang. Speaker hi F. Lalrohlua te nupa Arunachal field-a missionary leh Pu David Lalruatfela MP & MH Field-a thawk AICS-a Training tura rawn chhuak ten an tawiawm a, Serkawn Pastor Bial Zaipawl bakah Tualchhung Kohhran Zaipawl te leh KNP Zaipawl ten zaia rawngbawlna an nei bawk.

March leh April thla khan Upa MS Dawngliana Archivist chu, Thailand-a Dr. ZOthansiami Ralte rawngbawlna leh a hnathawhna hmuna zirlaite training leh rawngbawl zel dan tur ruahmanna te neihpui in a kal a.  Dr. Zothansiami Ralte te hi mahni a intum chawp (Tent making) Missionary ni in, Karen hnam zingah kum 38 zet a rawngbawlin a awm tawh a,  BCM recognized missionary a ni.

April 28, 2024 kha Mizoram Baptist Kohhran Ni pawimawh (Special Sunday) “Buhfaitham Pathianni” a ni a, Thufingte 11 : 24 thu “Sem darh chu pun lehzualna a ni”. tih chu thupuiah hman a ni.

Tunkar Thawhtanni, April 22, 2024 atang khan Headquarters Area te, Lawngtlai Area leh Aizawl Area –a Office hrang hrang leh zirna in, mission school telin, account audit a ni a, vawiin khan tluang takin an zo fel

April 26, 2024 (Zirtawpni) khan Baptist English School, Serkawn-a Zirtirtute chuan ni khat awh intuaitharna (Refresher Course Training) an nei a. Chawhma dar 10:00 ah hun khatna tan in Principal Pi C. Lalawmpuii’n a kaihruai a, Lalrinawma Pautu in Pathian hnena inkawltirna hun serh a hman zawhah  – Pi Lalrinpuii leh Pi Lalramhluni ten zirtirna neiin, Pi Lalrinpuii hian Primary leh Middle Section-a zirtirtute pualin hun a hmang a, Pi Lalramhluni’n KG leh Nursery Section te pualin zirtirna a nei.

Kan hriat theih chinah April 19-21, 2024 hmang khan heng Pastor Bial hrang hrangah te hian KNP Inkhawmpui an nei.

April 19-21, 2024 khan Lungsen Pastor Bial chuan BCM Biak In, Lungsen-ah Mission Convention an nei a, Speaker-ah Rev. Dr. R. Lalthanmawia, AGS (Mission) an hmang. Zirtawp zan, Inrinni zan, Pathianni zing leh zanah inkhawmah Speaker hnen atangin thuchah ngaihthlak thin a ni a. Inrinni chawhmaah Mission pualin inpawlhona neih a ni a, hetah hian Mission rawngbawlna kawnga hmalakna hrang hrangte Speaker hnen atangin ngaihthlak a ni a, zawhna leh chhanna hunte neih a ni bawk.

April ni 22 leh 23 hmang khan Kolkata BMS House-ah Baptist Youth Fellowship of India (BYFI) Executive Committee meeting neih a ni a. He Meeting-ah hian Rev. F. Zorinkhuma, MTKP Secretary chu a tel a,  Rev. F. Zorinkhuma hi BYFI hruaitu, Treasurer ni lai mek a ni.

Rev. R. Lalnunzira, AGS-Service chuan April 20-22 khan Sakawrdai Pastor Bial-a Kohhran te tlawhin a zin chhuak a.  April 20 leh 21 khan Bial chhunga Kohhran hrang hrang tlawhin Inrinni zan-ah Sakawrdai Kohhran-ah hun hmangin, Pathianni zing-ah New Vevek leh Pathianni chawhnu-ah Lungsum Kohhran-ah hun hmangin,Pathianni zanah Zohmun Kohhranah thuchah a sawi. Thawhtan zing karah Mauchar Kohhran tlawh-in, Biak In saklai a enpui a. Heng kohhran hrang hrang a tlawhnaah hian Bial leh Tualchhung Kohhran hruaitute nen a remchan angin inkawmhona a neihpui zel a ni.

General Secretary - Rev. R. Lalbiakliana chu April 22 khan Arunachal West Field tlawh turin Headquarters a chhuahsan a. April 25, ningani ah Apatani hnam zinga rawngbawlna Ziro an tlawh a, a tuk zirtawp ah Nissi hnam zinga kan rawngbawlna Naharlagun leh Itanagar te tlawhin zan an riak a, heng ah te hian missionary te leh a ram mi kan thawhpui kohhran hruaitu te nena inkawmhona hun te an nei a ni. General Secretary zinchhuak hi  a nupui Dr. Irene Cobert leh Upa R. Lalbiakmuana, Account Officer ten an tawiawm a ni.

Higher & Technical Institute, Mizoram (HATIM) –a thawk turin Assistant Professor hna pathum a ruak a. Pathian rawngbawlnaa ngaia thawk duh chuan dil theih a ni.  Hrechiang duh tan a hnuaia link-ahte hian en theih a ni e.

April 23, 2024 (Thawhlehni) hi Kristian Naupang Pawl (KNP) Din champhaphak (KNP Day) vawi 81-na a ni a. Kumin KNP Day thupui hi ‘Isua hmangaih naupangte’ (Marka 10:13-16) tih a ni a, School chawlh lai a nih loh a vangin KNP Unit tin ten an remchan angin kar hmasa inrinni lama he hun hi lo hmang lawk tawh te pawh an awm a, Pastor Bial thenkhatah chuan KNP Day chawlhkar-ah hian KNP Day thupui thlan sa hmangin Inkhawmpui an hmang bawk.

Valedictory Service hi Pastor Thanzinga Chapel, AICS-ah hman a ni a, Principal Rev. Dr. C. Vanlaldika'n he inkhawm hi kaihruai in, Rev. R. Lalnunzira, Associate General Secretary BCM chu Valedictory Speaker a ni.

April 18, 2024 (Ningani) khan  Relief & Development Department chuan Ralvawng-a thli leh rial avanga chenna in chhia chhungkaw 53 te chhawmdawlna atan Charity fund atangin cheng nuai khat an sem a. Tanpuina hi Rev. L. Vanlalsanga, Director R&D, Pu Lalrinawma, Coordinator leh Nl. Laldinthari Ralte, Field Facilitator ten a hmunah kalin an hlan a ni. He hunah hian Kohhran hruaitute bakah khawtlang hruaitu te engemawzat-in an tawiawm a ni.