July 30, 2023 (Pathianni) hi Thalai Kristian Pawl (TKP) din champha vawi 72-na a ni a. Kumin TKP Day thupui chu “Pathian nen lo inrem rawh u’ (II Kor. 5:20) tih a ni ang.

Baptist Centre Lungphumna hi July 22, 2023 (Inrinni) khan, Falkland, Aizawl-a Baptist Multipurpose Centre-ah neih a ni a. Rev. C. Lalhungliana, Chairman, Area Development Committee, Aizawl-in hun kaihruaiin, Rev. R. Lalrintluanga, Executive Secretary-in Baptist Centre sakna tur atana ruahmanna leh hmalak dan tlangpui report a pe

Mission Convention hmun hnihah neih a ni Buarpui Kohhran, Rev. Dr. R. Lalthanmawia, AGS-Mission speaker-a hmangin July 22 & 23 chhung khan Mission Convention an nei a. Thupui-ah II Korinth 5:20 thu  “Krista aia palai” tih hman a ni. Mission Convention neih chhung hian Inrinni zan, Pathianni zing leh Pathianni zanah te Pathian Biak Inkhawm neih a ni a. Speaker thuchah bakah  Kohhran Zaipawl, Group zai leh mimal zaithiam te hnen atang in fakna hla ngaihthlak thin a ni. Khawtlangah chhiat tawk an awm avangin ruahman sa angin Pathiani chawhnu Inpawlhona erawh chu neih theih a ni ta lo a ni.

July 26, 2023 (Nilaini) chawhma dar 11:00 khan BCM thawktu Tv. F. Lalruatkima (Papuia), Headquarters Office, Serkawn-a LDC hna thawk, June 8, 2023-a chatuan ram pan ta chu BCM Workers Condolence Scheme (WCS) chuan an chenna In, Lawngtlai-ah an ral. Ralna-ah hian Headquarters Office-a hotute Rev. R. Lalbiakliana, General Secretary, Rev. R. Lalnunzira, AGS-Service te, WCS hruaitu (OB) te leh Executive Secretary Office, Lawngtlai-a thawktute an kal a ni.

ṬKP Republic Vengthlang Unit chuan July 24, 2023 (Thawhṭanni) zan khan an chhehvel a Hosteller te nen BCM Biak In, Republic Vengthlang ah Joint Fellowship an nei a. He hunah hian MṬKP hmalakna bawhzuiin, Intodelh Inzirtirna hun pawimawh tak hman a ni a. Pi Elvina L. Leivon (IA&AS) chu Resource Person ah hman a ni. Unit President-in Member kalkhawm te leh an mi sawm te lawmna thu sawiin, Unit Secretary-in report tlangpui a pe bawk.

July 21-23, 2023 chhung khan ṬKP Lawngtlai South Pastor Bial te chuan “Ngaih hlut tur dik, Lal Isua” tih thupuia hmangin Bial chhunga Unit hrang hrang  intawhkhawm hun an hmang a, Speaker-ah Pu T. Lalrinmuana Lunglei Chanmari hman a ni.

MBKHP hruaitute chuan July 23, 2023 (Pathianni) chawhnu dar 1:30 khan Serkawn Pastor Bial-BKHP te pualin Chhawmdawlna In Awareness an nei a. MBKHP Hruaitute - President  Pi PC Lalvohbiki leh Assistant Secretary Pi V, Biaklawmi leh Grace Society Board member Pi F. Lalthanzami ten hun an hmang  a ni. He hunah hian Bial chhunga Unit hrang hrang atangin member 140 zet an kal khawm a ni.

ṬKP Aizawl East Pastor Bial Hruaitu te chuan kumin a a hnuhnung ber atan July 24, 2023 (Thawhṭanni) zan khan Bial Hruaitu unit tlawh Programme hmangin, ṬKP Electric Unit, Aizawl an tlawh a, hun ṭha tak leh hlawk tak hman a ni.

July 22-23, 2023 chhung khan Bungtlang Pastor Bial BMP te chuan BCM Biak In, Khawnglung-ah  “Tunlai thil awm zia” (Rom 13:11) thupuia hmangin Bial BMP Meet an nei a,  Mizoram BMP Secretary Rev. H. Lalfakzuala chu  Speaker-ah hman a ni. Speaker hi Nl. Lalhlumawii leh Nl. MC Laldingliani Hnahthial ten zaia rawngbawlin an tawiawm.

July 21-23, 2023 chhung khan Kristian Naupang Pawl, Phuaibuang Unit chuan Crusade an nei a, Speaker-ah  Pi Ammie Lalnunpuii, KNP Triner an hmang. KNP ten Pathian thu an ngaithla tha-in an hlim hle a. Pathianni chawhnu-ah Nu leh Pa te pualin Inpawlhona neih a ni

TKP Aizawl East Pastor Bial chuan July 22, 2023 (Inrinni) khan Aizawl Area TKP Coordination Committee ruahmanna in Model Blood Bank, Civil Hospital Aizawlah  thisen pek runpui an nei a. He hunah hian Bial chhung Unit 6 atangin member 88 an kal a, thisen Unit 50 (Mipa 46 leh Hmeichhia 4) an pe a ni.

July 14-16, 2023 chhung khan Lawngtlai Area huamchhunga Bial Zaipawl te pualin intawhkhawmna (Bial Zaipawl Meet) BCM Biak In - Lawngtlai Vengpuiah neih a ni a. Thupuiah "Lalpa lawm tlak, Rawngbawlna" tih hman a ni.

​​​​​​​#Chhipphir Pastor Bial chuan Rev. R. Lalnunzira, AGS-Service speaker-a hmangin July 15 leh 16 hmang khan BCM Biak In, Chhipphir-ah Mission Convention an nei a. #Salem Kohhran, Lunglei chuan July 14-16 chhung khan Rev. Dr. R. Lalthanmawia, AGS-Mission speaker-a hmangin Mission Convention an nei a. Thupui-ah Isaia 6:9 – thu ‘Mi tir ta che” tih hman a ni.

July 16, 2023 (Pathiani) khan Shillong Pastor Bial chuan Sunday school inkhawmpui BCM Biakin, Madanriting-ah an hmang a. Rev F.Ramdinmawia'n inkhawmpui hawnna a nei a, Rev PC Lalnunzira, Regional Director, Guwahati Region in inkhawmpui thupui "Pathian thu nung" tih hmangin thuchah a sawi.

Aizawl Area TKP leh BMP Coordination Committee-in ruahmanna an siam angin,  July 15, 2023 (Inrinni) khan Baptist Multipurpose Centre (BMC), Falkland ah Hnatlang runpui neih a ni a. Aizawl City huam chhung, Pastor  Bial 10 atangin BMP member 102, TKP - Aizawl East Pastor Bial member 87 leh Mission Vengthlang Pastor Bial atangin mi 30 ten hnatlang hi thawkin, hruaitu te nen mi 200 chuang zet an thawk chhuak a ni.